1. Upea jague seis arajápe Jesús ojenôi Pedrope ja Santiagope ja tybyra Juanpe, ja oguerajá ichupecuera jaeñojápe peteî itáatŷra yvaté ári.
2. Ja upepe Jae oñemoambué jesápe cuera voí, ja ojesapé verá jová cuarajŷicha, ja iyao oñemo morotîmba ára resâcâicha.
3. Ja sapyaite oyejechauca ichupecuera Moises ja Elías oñemonguetávo Jendive.
4. Uperamo Pedro oñeê, ja jei Jesúspe: Ore Yára, ipôrâ voí ore roime coápe. Reipota ramo Nde, tayapo coápe mbojapy cuarajyá, peteî Ndeveguârâ, ja ambue Moises peguârâ ja ambue Elías peguârâ.
5. Ja oñeê aya gueteri jina, sapyaite ogueyŷ peteî arai ojesapéva, ja oyajoí ichupecuera, ja oñejendu sapyaité pe arai apytegui peteî osapucaiva jeivo: Peva catu Che Ray ajayjúetéva Che arojorŷ tuvichaite Ichupe. Pejendú catu Ichupe!
6. Ja ojendú pypé upea, jemimboe cuera oñesû ovapŷvo, ja okyjyŷé tuvichaite.
7. Upei catu Jesús ou Jendápe cuera, ja opoco jesecuera ja jei: Pepuânte! Ani pekyjŷyé.
8. Upei catu jaecuera omaê yeby ja ndo jechaveima avavépe, Jesúspe añonte.
9. Upegui ogueyŷ aya pe itáatŷra ári gui Jesús omboe ichupecuera jeivo: Ani peye avavépe co pejecha vaecue reje oicove yeby peve co Caraí Raŷ umi omano vaecue paûgui.
10. Upei catu oporandu Ichupe jemimboe cuera jeivo: ¿Mbaerejépa, upeicharamo, jei umi iñarandúva tecôtevêjá ou jaguâ pe Elias raê?
11. Ja Jae jei ichupecuera: Añeté nico ou vaerâ raê pe Elias, ja jae omyatyrômbane opambae.
12. Che jae peême catuetei ouma jague pe Elias, ja jaecuera ndo jechacuaai raé ichupe. Oyaponte raé jese opa oipota vaecue. Upeichaite ojasa asy vaerâ ichugui cuera co Caraí Raŷ avei.
13. Upeagui catu oicuaa jemimboecuera Jae oñeê jague ichupecuera pe Juan Bautista gui.
14. Upemaramo ôguajê vove pe iyatŷjápe umi ybypóra, oime ou Jendápe peteî cuimbae oñesûvo Ichupe, ja jeivo:
15. Ore Yára, eiporiajuverecomi co che raŷmíme. Iñâcâ taby ja ojasa asy vaí. Amome joa tatape, amome ŷpe.
16. Ja aru curi ichupe co Ne remimboe cuerape, ja jaecuerante ndicatui omojesâi ichupe.
17. Upei catu Jesús oñeê, ja jei: Peê umi oyeroviaŷetéva rejegua ja umi iñâcâ jâtâva ja oyabŷcuaaséva rejegua! ¿Aracaépevépa ai vaerâ penendive? ¿Aracaépevépa po guero kîrîrî vaerâ peême? Erúnte ichupe ape Che rendape.
18. Upei catu Jesús oyao pe mbaepochype, ja osê voí ichugui, ja uperamoite guive voí jesâi opytávo pe mitâ.
19. Upemaramo jemimboe cuera ôguajê Jesús rendape jaeñojápe jeivo: ¿Mbaérejépa raé ore ndicatui roity ichupe?
20. Ja Jae jei ichupecuera: Pende yerovia mîrî eté guinte. Che jae peême catuetei, pereco ramo peyerovia jaguâ peteî mostaza raŷîmicha, mo peye co itáatŷrape: Evá catu coágui pe amongoty peve, ja upevove mo ová, ja ndipori moai mbaeve iyaŷvaerâ peême.
21. Coaichagua mbaepochy voi nosê moai peñemboe aré ŷ reje pya nandi rejeve.
22. Uperire oguata oicovo jaecuera Galilea retâ rupi, ja Jesús jei ichupecuera: Co Caraí Raŷ oñemeêtama jina umi ybypóra pope,
23. ja oyucáne Ichupe, ja Jae oicove yebyne mbojapy arajápe. Upeagui jaecuera ombuasŷ eterei yoa.
24. Uperire ôguajêma ramo Capernaumpe, ou Pedro rendape umi mbaerepy monoôjára ja jei Ichupe: Co pene mboejárapa nomeêi jecópe pe mocoî mbaerepŷ ñameê vaerâ mburuvichape? Ja jae jei: Jeê, omeê.
25. Upei catu oiké pypé ógape oñeê raê Jesús ja jei ichupe: ¿Mbaépa jiâ ndeve, Simon? ¿Umi mburuvicha guasu co ybyari gua mávaguipa omonoôucá mbaerepy? ¿Tayra cuera guipa terâpa umi pytaguagui cuera?
26. Ja jae jei: Umi pytaguagui cuerante. Ja jei ichupe Jesús: Upeicha ramo, ojo rei vaerâ umi tayra cuera.
27. Opaichavévonte, anichene jaguâ ñambo pyávaí reí ichupecuera, terejó pe ŷguasupe, eity ne pindá, ja pe pirá tenonde oyáva enôjênte, eipeá iyurú ja reyujúne ipypé peteî mbaerepŷ. Eipyjy upea, ja emeênte jecope Chereje, ja ndereje.