1. ‘Ua fa‘alogo Sanepalata, ma Tovia, ma Gesemu le Arapi, ‘atoa ma i latou uma o ē na ita mai ‘iā te i matou, ‘ua atia e a‘u le pā, ma ‘ua lē toe i ai se mea e solo; (a ona po ia na ‘ou lē fa‘atūina ai puipui i faitoto‘a;)
2. ‘Ona sau lea ‘iā te a‘u o le fe‘au a Sanepalata ma Gesemu ‘ua fa‘apea mai, “Sau ia, ‘inā tatou fetaia‘i i ‘a‘ai i le fanua laugatasi o Ono.” A ‘ua latou manatu e fai se mea leaga ‘iā te a‘u.
3. ‘Ona ‘ou ‘auina atu lea o le sāvali ‘iā te i latou, ‘ua fa‘apea atu, “O lo‘o faia e a‘u le galuega tele, ‘ou te lē mafai ai ‘ona alu ifo. Se a le mea e tu‘ua ai le galuega i lo‘u tu‘ulafoa‘i ma alu ifo ‘iā te ‘outou?”
4. A ‘ua fo‘i fa‘afā mai la la fe‘au fa‘apenā ‘iā te a‘u; ‘ua fa‘apenā fo‘i ‘ona ‘ou tali atu ‘iā te i latou.
5. ‘Ona ‘auina mai lea e Sanepalata o lana ‘au‘auna ‘iā te a‘u i le fe‘au fa‘apenā lava, o le atu lima lea; ‘ua i lona lima fo‘i le tusi e le‘i fa‘amauina.
6. ‘Ua tusia ai:“‘Ua logoa mai i nu‘u, ‘ua fai mai ai fo‘i Gesemu, ‘ua e manatu oe ma sa Iutā e tete‘e mai; o le mea lea ‘ua e ati ai le pā, ‘ia fai oe ma tupu ‘iā te i latou e tusa ma nei ‘upu.
7. ‘Ua tofia fo‘i e oe o perofeta e tala‘iina oe i Ierusalema, o lo‘o fa‘apea atu, ‘O lo‘o i ai le tupu o Iuta.’ O le a logo atu i le tupu e tusa ma ia ‘upu. O lenei, ‘inā sau ia oe, ma ‘ia tā talanoa e tusa ma lenei matā‘upu.”
8. ‘Ona alu atu lea o la‘u fe‘au ‘iā te ia, ‘ua fa‘apea atu, “E leai ni mea ‘ua faia e pei o ia mea ‘ua e fai mai ai, a ‘ua e fatu fua ai i lou lava loto.”
9. Auā na fa‘amata‘u i latou uma ‘iā te i matou, ‘ua fa‘apea ane, E fa‘avaivaia o latou lima i le galuega, ‘ia lē faia. “O lenei, le Atua e, ‘ia e fa‘amalosi mai o‘u lima.”
10. ‘Ona ‘ou alu atu lea i le fale o Semaia le atali‘i o Talaia, le atali‘i ia o Meatapala, sa puipuia fo‘i o ia; ‘ona fai mai lea o ia ‘iā te a‘u, “‘Ia tā ō fa‘atasi i le fale o le Atua i totonu o le malumalu, ma pupuni faitoto‘a o le malumalu; auā latou te ō mai e fasioti ‘iā te oe i le po nanei.”
11. ‘Ona ‘ou fai atu lea, “E sola ‘ea le tagata e pei o a‘u? O ai ‘ea e pei o a‘u e alu i le malumalu ‘ia ola ai o ia? ‘Ou te lē alu lava.”
12. Fa‘auta fo‘i, na ‘ou iloa e le‘i ‘auina mai o Semaia e le Atua; a ‘ua fai mai e ia lenei valo‘aga ‘ia leaga ai a‘u; auā na fa‘aosoosoina lava o ia e Tovia ma Sanepalata.
13. O le mea lea na fa‘aaogā ai o ia, ‘ina ‘ia ‘ou mata‘u, ma ‘ia ‘ou fa‘apea ‘ona fai, ‘ou te agasala ai, ‘ia maua e i latou se mea e fai ma tala leaga ‘ina ‘ia ta‘uleagaina ai a‘u.
14. Lo‘u Atua e, ‘ia e manatu ‘iā Tovia ma Sanepalata e tusa ma ia mea ‘ua la faia, ‘atoa fo‘i ma le perofeta fafine o Noataia, ma isi perofeta o ē na taufa‘amata‘u mai ‘iā te a‘u.
15. ‘Ua fa‘auma fo‘i le pā i le aso e luafulu ma le lima o le masina o Elula; ‘ua faia i aso e limagafulu ma le lua.
16. ‘Ua fa‘alogo i latou uma o ē na ita mai ‘iā te i matou, ma ‘ua iloa e nu‘u uma na vagavagai ‘iā te i matou, ‘ona matuā fa‘avaivai lea o i latou; auā ‘ua latou iloa o lo tatou Atua na fai ai lenā galuega.
17. O na ona aso fo‘i ‘ua ‘aveina atu ai e ali‘i o Iuta tusi e tele ‘iā Tovia, ‘ua o‘o mai fo‘i tusi a Tovia ‘iā te i latou.
18. Auā e to‘atele tagata o Iuta na ‘au ‘iā te ia, auā o le tane o ia o le afafine o Sekania o le atali‘i o Araka; na fai avā fo‘i lona atali‘i o Ioanana i le afafine o Mesulama le atali‘i o Perekia.
19. ‘Ua latou talatala mai fo‘i lona agalelei i o‘u luma, ‘ua ta‘u atu fo‘i a‘u ‘upu ‘iā te ia. ‘Ua ‘aumai fo‘i e Tovia o tusi e fa‘amata‘u mai ‘iā te a‘u.