Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13

Feagaiga Tuai

Feagaiga Fou

Neemia 11 O LE TUSI PA'IA - Ekalesia Katoliko Roma (RSCB)

O ē na Tofia e Nonofo i Ierusalema

1. Sa nonofo ali‘i o le nu‘u i Ierusalema; a o ē na totoe o le nu‘u ‘ua latou fai le vili, e ‘aumai le tasi mai ta‘ito‘asefulu e nofo i Ierusalema le ‘a‘ai pa‘ia, ‘ae tu‘ua le ta‘ito‘aiva i nisi ‘a‘ai.

2. ‘Ona fa‘amanuia lea e le nu‘u o tagata uma, o ē na ofo fua e nonofo i Ierusalema.

3. O matai nei o le nu‘u o ē sa nonofo i Ierusalema; o ē ‘ua nonofo i ‘a‘ai o Iuta ta‘ito‘atasi i lona tofi i o latou ‘a‘ai, o Isaraelu, o ositaulaga, ma sa Levī ma ‘au‘auna o le malumalu, ma le fānauga a ‘au‘auna a Solomona.

4. Sa nonofo fo‘i i Ierusalema nisi o le fānauga a Iuta, ma nisi o le fānauga a Peniamina. O le fānauga a Iuta; o Ataia le atali‘i o Usi, o le atali‘i ia o Sakaria, o le atali‘i ia o Amaria, o le atali‘i ia o Sefatia, o le atali‘i ia o Maalaelu, a‘i le fānauga a Faresa.

5. O Maaseia fo‘i le atali‘i o Paruka, o le atali‘i ia o Kolokuse, o le atali‘i ia o Hasaia, o le atali‘i ia o Ataia, o le atali‘i ia o Ioiaripa, o le atali‘i ia o Sakaria, o le atali‘i ia o Seloni.

6. O le fānauga uma a Faresa o ē sa nonofo i Ierusalema e fa selau ma le to‘aonogafulu ma le to‘avalu, o tagata malolosi.

7. O le fānauga fo‘i nei a Peniamina o Salu le atali‘i o Mesulama, o le atali‘i ia Ioeta, o le atali‘i ia o Petaia, o le atali‘i ia o Kulaia, o le atali‘i ia o Maaseia, o le atali‘i ia o Itielu, o le atali‘i ia o Isaia.

8. E aupito ane fo‘i ‘iā te ia o Kapai, ma Salai, e to‘aiva selau ma le to‘aluafulu ma le to‘avalu.

9. Na pule fo‘i ‘iā te i latou o Ioelu le atali‘i o Sekeri; o lona lua fo‘i o pule i le ‘a‘ai, o Iuta lea le atali‘i o Senua.

10. O ositaulaga; o Ietaia le atali‘i o Ioiaripa ma Iakinu,

11. o Seraia le atali‘i o Hilikia, o le atali‘i ia o Mesulama, o le atali‘i ia o Satoka, o le atali‘i ia o Meraiota, o le atali‘i ia o Akitopo, na pule ia i le fale o le Atua.

12. O latou uso fo‘i o ē na fai le galuega i le fale, e valu selau ma le to‘aluafulu ma le to‘alua i latou o Ataia fo‘i le atali‘i o Ieroama, o le atali‘i ia o Pelalia, o le atali‘i ia o Amesi, o le atali‘i ia o Sakaria, o le atali‘i ia o Pasura, o le atali‘i ia o Malekia,

13. ma ona uso o matai sili, e lua selau ma le to‘afagafulu ma le to‘alua; ma Amasesai le atali‘i o Asareelu, o le atali‘i ia o Aasai, o le atali‘i ia o Meselemita, o le atali‘i ia o Imeru,

14. o latou uso fo‘i, o toa malolosi, e selau e to‘aluafulu ma le to‘avalu; na pule fo‘i ‘iā te i latou o Sapetielu le atali‘i o Hagetolima.

15. O sa Levī fo‘i; o Semaia le atali‘i o Hasupo, o le atali‘i ia o Aserikama, o le atali‘i ia o Hasapea, o le atali‘i ia o Puni.

16. O Sapetai fo‘i ma Iosapata, o matai o sa Levī, na la pule i lē galuega i fafo o le fale o le Atua.

17. O Matenaia fo‘i le atali‘i o Mika, o le atali‘i ia o Sapata, o le atali‘i ia o Asafo, o le matai lea e amata ai le fa‘afetai ma le tatalo; o Pakepuka fo‘i, o lona lua lea i ona uso ma Apeta, le atali‘i o Samua, o le atali‘i ia o Kalali, o le atali‘i ia o Iutana.

18. O sa Levī uma i le ‘a‘ai pa‘ia, e lua selau ma le to‘avalugafulu ma le to‘afa i latou.

19. O leoleo faitoto‘a fo‘i, o Akupa ma Talemoni, ma o latou uso o ē na leoleo i faitoto‘a, e tasi le selau ma le to‘afitugafulu ma le to‘alua i latou.

20. O ē na totoe o Isaraelu, o ositaulaga ma sa Levī sa i ‘a‘ai uma o Iuta i latou ta‘ito‘atasi i lona tofi.

21. A o ‘au‘auna o le malumalu, ‘ua latou nonofo i Ofele; na pule fo‘i i ‘au‘auna o le malumalu o Seka ma Gisepa.

22. O lē na pule fo‘i i sa Levī i Ierusalema, o Usi le atali‘i o Pani, o le atali‘i ia o Hasapea, o le atali‘i ia o Matania, o le atali‘i ia o Mika. O le fānauga a Asafo, o ē pepese na pule i latou i le galuega i le fale o le Atua.

23. Auā o le poloa‘iga a le tupu ‘iā te i latou, ‘ia fai le vaega o mea e ‘ai a ē pepese i lea aso ma lea aso.

24. O Petakia fo‘i le atali‘i o Mesesapelu, a‘i le fānauga a Sera le atali‘i o Iuta, sa i tafatafa o le tupu ia i mea uma a le nu‘u.

O Tagata i isi ‘A‘ai ma Taulaga

25. O faoa ‘a‘ai fo‘i ma o latou fanua; sa nonofo nisi o le fānauga a Iuta i Kiriata-arapa ma ona faoa ‘a‘ai ma Tipona ma ona faoa ‘a‘ai ma Kapeseelu ma ona faoa ‘a‘ai,

26. ma Iosua ma Molata ma Petepaleta,

27. ma Hasarasualo ma Peresepa ma ona faoa ‘a‘ai,

28. ma Sekeleka, ma Mekoni ma ona faoa ‘a‘ai,

29. ma Ainorimoni ma Sorea ma Iaremuta,

30. o Sanoa, o Atulama ma o la faoa ‘a‘ai, o Lakisa ma ona fanua, o Aseka ma ona faoa ‘a‘ai. ‘Ua latou nonofo fo‘i e pau mai Peresepa ‘ua o‘o atu i le vanu o Hinoma.

31. O le fānauga fo‘i a Peniamina e pau mai i Kipea e pau mai fo‘i i Mekemase ma Ai ma Peteli ma o latou faoa ‘a‘ai,

32. o Anatota, o Nove, o Anania,

33. o Hasora, o Rama, o Kitaima,

34. o Hatito, o Sepoima, o Nepalatu,

35. o Loto ma Ono o le vanu o tufuga.

36. Sa i ai fo‘i i Iuta ma Peniamina o vasega o sa Levī.