1. O le masina o Nisani, o le lua o sefulu o tausaga o Aretaseta le tupu, ‘ua i ona luma le uaina; na ‘ou ‘ava‘e fo‘i le uaina ma avatu i le tupu. E le‘i mata fa‘anoanoa fo‘i a‘u i ona luma anamua.
2. ‘Ona fai mai lea o le tupu ‘iā te a‘u, “Se a le mea ‘ua e mata fa‘anoanoa ai, ‘ae leai sou ma‘i? ‘ua na o le fa‘anoanoa lava o le loto lenā.”‘Ona ‘ou matuā fefe ai lava lea,
3. ma ‘ou fa‘apea atu i le tupu, “‘Ia soifua e fa‘avavau le tupu; se a le mea ‘ou te lē fa‘anoanoa ai, o lo‘o fa‘atafunaina le ‘a‘ai, o le mea o i ai tu‘ugamau o o‘u tamā, ma ona puipui ‘ua fa‘aumatia i le afi?”
4. ‘Ona fa‘apea mai lea o le tupu ‘iā te a‘u, “Se a ‘ea le mea ‘e te mana‘o ai?”‘Ona ‘ou tatalo atu lea i le Atua o le lagi.
5. ‘Ona ‘ou fai atu lea i le tupu, “Pe ‘āfai e lelei i le tupu, ‘āfai fo‘i ‘e te alofa i lau ‘au‘auna, ‘ia e ‘auina atu a‘u i Iuta, i le ‘a‘ai o i ai tu‘ugamau o o‘u tamā, ‘ia ‘ou toe faia.”
6. ‘Ona fai mai lea o le tupu ‘iā te a‘u, (o lo‘o nofo fo‘i i ona tafatafa lana masiofo,) “Pe fia po ‘ea o lau malaga? ‘E te toe fo‘i mai fo‘i afea?” ‘Ua lelei fo‘i i le tupu, ‘ona ia ‘auina mai lea o a‘u; na ‘ou tu‘u po fo‘i ‘iā te ia.
7. ‘Ua ‘ou fai atu fo‘i i le tupu, “‘Āfai e lelei i le tupu, ‘ia ‘aumai ni tusi ‘iā te a‘u i ali‘i e pule i ona tala atu o le vaitafe, ‘ia latou momoli atu ‘iā te a‘u se‘ia ‘ou o‘o i Iuta;
8. ma se tusi ‘iā Asafo, le leoleo o le vao o le tupu, ‘ia ‘aumai ‘iā te a‘u o la‘au e fai a‘i fa‘alava o faitoto‘a o le ‘olo o le fale, ma le pā o le ‘a‘ai, ‘atoa ma fale ‘ou te alu ane i ai.” ‘Ona tu‘u mai lea e le tupu ‘iā te a‘u, e tusa ma le ‘a‘ao alofa o lo‘u Atua na ‘iā te a‘u.
9. ‘Ua ‘ou o‘o atu i ali‘i e pule i ona tala atu o le vaitafe, ‘ona ‘ou avatua lea ‘iā te i latou o tusi a le tupu. ‘Ua ‘a‘auina mai fo‘i ma a‘u e le tupu o ē ‘ave ‘au, ma ‘au e ti‘eti‘e i solofanua.
10. ‘Ua fa‘alogo e Sanepalata o le Horono, ma Tovia le ‘au‘auna, o lo sa Amonī, ‘ua sau le tagata e sā‘ili i se lelei mo le fānauga a Isaraelu, ‘ona matuā tigā tele lava lea o i lā‘ua.
11. ‘Ua ‘ou o‘o i Ierusalema, na ‘ou i ai i po e tolu.
12. ‘Ona matou tula‘i ai lea i le po, o a‘u ma nai tagata e to‘aitiiti na ‘iā te a‘u; na ‘ou lē ta‘u atu fo‘i i se tagata le mea na tu‘u mai e lo‘u Atua i lo‘u loto e faia i Ierusalema; ‘ua leai fo‘i se manu ‘iā te a‘u, na o le manu lava na ‘ou ti‘eti‘e ai.
13. ‘Ona ‘ou alu atu lea i le po i le faitoto‘a o le vanu, ma luma o le vaipuna o le tanimo, ma le faitoto‘a o le otaota, ma ‘ou matamata i pā o Ierusalema ‘ua sōloia, ma ona puipui ‘ua fa‘aumatia i le afi.
14. ‘Ona ‘ou alu atu lea i le faitoto‘a o le vaipuna, ma le vailepa o le tupu, a o leai se mea e sao atu ai le manu na ‘ou ti‘eti‘e ai.
15. ‘Ona ‘ou ui a‘e lea i le alia i le po, ma ‘ou matamata i le pā, ‘ona ‘ou toe fo‘i mai lea, ma ulu atu i le faitoto‘a o le vanu; ‘ona ‘ou fo‘i ai lea.
16. E le‘i iloa fo‘i e faipule le mea na ‘ou alu atu ai, ma le mea na ‘ou faia; ‘ou te le‘i ta‘u atu fo‘i i na ona po i sa Iutā, po o ositaulaga, po o ali‘i, po o faipule, po o ē na totoe sa fai le galuega.
17. ‘Ona ‘ou fai atu ai lea ‘iā te i latou, “‘Ua ‘outou silafia le malaia ‘ua ‘iā te i tatou, ‘ua fa‘atafunaina Ierusalema, ma ona puipui ‘ua susunu i le afi; ō mai ia, ‘inā tatou faia le pā o Ierusalema, ‘aua ne‘i fa‘alumaina pea i tatou.”
18. ‘Ua ‘ou ta‘u atu fo‘i ‘iā te i latou i le ‘a‘ao o lo‘u Atua sa lelei lava i luga ‘iā te a‘u, ‘atoa ma ‘upu a le tupu na ia fai mai ‘iā te a‘u.‘Ona fa‘apea mai lea o i latou, “‘Inā tula‘i ia, ‘inā tatou faia ia.” ‘Ona latou fa‘amalolosi ai lea i lenei galuega lelei.
19. ‘Ua fa‘alogo ai e Sanepalata o le Horono, ma Tovia le ‘au‘auna, o lo sa Amonī, ma Gesemu le Arapi, ‘ona latou tauemu mai lea ‘iā te i matou, ma ‘ino‘ino mai ‘iā te i matou, ma ‘ua fa‘apea mai, “Se a ‘ea lenei mea tou te faia? Pe tou te fouvale ‘ea i le tupu.”
20. ‘Ona ‘ou tali atu lea ‘iā te i latou, ma ‘ou fa‘apea atu ‘iā te i latou, “O le Atua o le lagi, o ia lava na te fa‘amanuia mai ‘iā te i matou; o le mea lea e tula‘i ai o i matou ana ‘au‘auna, ma faia le galuega; a o ‘outou, e leai so ‘outou tofi, po o se pule, po o se fa‘amanatuga i Ierusalema.”#