1. ‘Ona tutū lea i luga o Eliasipa le ositaulaga sili, ma ona uso o ositaulaga, ma ‘ua latou faia le faitoto‘a mamoe; ‘ua latou fa‘apa‘ia i ai, ‘ua latou fa‘atūina fo‘i ona puipui; e o‘o i le ‘olo o Meaa ‘ua latou fa‘apa‘ia i ai, e o‘o atu i le ‘olo o Hananiali.
2. Na ati e aupito ane ‘iā te ia o tagata o Ieriko.Na ati e aupito ane ‘iā te i latou o Sakuro le atali‘i o Imeru.
3. A o le faitoto‘a o i‘a na faia lea e le fānauga a Hasenaa, ‘ua latou fa‘atatauina ona la‘au, ma ‘ua latou fa‘atūina ona puipui, o ona fa‘amau, ma ona fa‘amaufa‘alava.
4. ‘Ua ati e aupito ane ‘iā te i latou o Meremota le atali‘i o Uria, o le atali‘i ia o Kosa.‘Ua ati e aupito ane ‘iā te i latou o Mesulama lē atali‘i o Perekia, o le atali‘i ia o Mesesapelu.‘Ua ati e aupito ane ‘iā te i latou o Satoka le atali‘i o Paana.
5. ‘Ua ati e aupito ane ‘iā te i latou o tagata o Tikoa; a o latou ali‘i, ‘ua latou le fesoasoani i le galuega a lo latou Ali‘i.
6. ‘Ua fai e Ioata le atali‘i o Pasea, ma Mesulama le atali‘i o Pesotia le faitoto‘a tuai; na la fa‘atatauina ona la‘au, ma ‘ua la fa‘atūina ona puipui, ma ona fa‘amau, ma ona fa‘amaufa‘alava.
7. ‘Ua ati e aupito ane ‘iā te i lā‘ua o Melatia le Kipeona, ma Iatonu le Marono, o tagata o Kipeona ma ē o Mesepa, ‘ua o‘o i le nofoāli‘i o le ali‘i e pule i ona tala mai o le vaitafe.
8. ‘Ua ati e aupito ane ‘iā te ia o Usialu le atali‘i o Haraia, o lo le ‘au tufuga fai mea auro.‘Ua ati e aupito ane ‘iā te ia o Hanania le atali‘i o le tasi o le ‘au fai mea manogi; na tu‘ua fo‘i e i latou o Ierusalema ‘ua o‘o i le pā lautele.
9. ‘Ua ati e aupito ane ‘iā te i latou o Refaia le atali‘i o Huro o le ali‘i e pule i le tasi itū o Ierusalema.
10. ‘Ua ati e aupito ane ‘iā te i latou o Ietaia le atali‘i o Harumapu, i luma fo‘i o lona fale.‘Ua ati e aupito ane ‘iā te ia o Hatusa le atali‘i o Hasapenia.
11. ‘Ua toe ati e Malekia le atali‘i o Harima, ma Hasupo le atali‘i o Paka-moapi le tasi ‘ogāpā, ma le ‘olo o ‘ogāumu.
12. ‘Ua ati e aupito ane ‘iā te ia o Saluma le atali‘i o Halokesu o le ali‘i e pule i le tasi itū o Ierusalema, o ia ma ona afafine.
13. ‘Ua faia e Anuni ma tagata Sanoa le faitoto‘a o le vanu, ‘ua latou fai ai, ma fa‘atūina ona puipui, ma ona fa‘amau, ma ona fa‘amaufa‘alava, o le afe fo‘i o kupita i le pā, ‘ua o‘o i le faitoto‘a o le otaota.
14. ‘Ua faia le faitoto‘a o le otaota e Malekia le atali‘i o Rakapa, o le ali‘i e pule i le tasi pito nu‘u o Peteakarema; na ia fai ai, ma fa‘atūina ona puipui, o ona fa‘amau, ma ona fa‘amaufa‘alava.
15. ‘Ua toe faia le faitoto‘a o le vaipuna e Saluna le atali‘i o Kolukose, o le ali‘i e pule i le tasi pito nu‘u o Mesepa; na ia faia, ma ufiufi ai ma fa‘atūina ona puipui, o ona fa‘amau, ma ona fa‘amaufa‘alava, ma le pā o le vailepa o Seloa i tala ane o le fa‘ato‘aga o le tupu, ‘ua o‘o fo‘i i le ala fa‘a‘apefa‘i e ui ifo ai mai le ‘a‘ai o Tavita.
16. E aupito ane ‘iā te ia ‘ua ati e Neemia le atali‘i o Asepuka, o le ali‘i e pule i le tasi itū o Petesura, e o‘o i luma o tu‘ugamau o Tavita mai le vailepa na faia, e o‘o fo‘i i le fale o ē malolosi.
17. E aupito ane ‘iā te ia ‘ua ati e sa Levī, o Rekumu le atali‘i o Pani.‘Ua ati e aupito ane ‘iā te ia o Hasapea o le ali‘i e pule i le tasi itū o Kaila i lona pito nu‘u.
18. E aupito ane ‘iā te ia ‘ua ati e o latou uso, o Pavai le atali‘i o Henatati, o le ali‘i e pule i le tasi itū o Kaila.
19. ‘Ua ati e aupito ane ‘iā te ia o Esera le atali‘i o Iosua, o le ali‘i e pule i Mesepa, o le tasi ‘ogāpā i luma o le mea e alu a‘e ai i le fale o le ‘au‘upega i le tulimanu.
20. E aupito ane ‘iā te ia ‘ua ati ma le fa‘amalosi e Paruka le atali‘i o Sapai, o le tasi ‘ogāpā, e āfua i le tulimanu ‘ua o‘o i le faitoto‘a o le fale o Eliasipa le ositaulaga sili.
21. E aupito ane ‘iā te ia ‘ua ati e Meremota le atali‘i o Uria le atali‘i o Kosa, o le tasi ‘ogāpā, e āfua i le faitoto‘a o le fale o Eliasipa ‘ua o‘o i le mea e gata mai ai le fale o Eliasipa.
22. E aupito ane ‘iā te ia ‘ua ati e le ‘au ositaulaga, o tagata o le fanua laugatasi.
23. E aupito ane ‘iā te i latou ‘ua ati e Peniamina ma Hasupo i luma o lo la fale.E aupito ane ‘iā te ia ‘ua ati e Asaria le atali‘i o Maaseia o le atali‘i ia o Anania i ona tafāfale.
24. E aupito ane ‘iā te ia ‘ua ati e Penui le atali‘i o Henatati o le tasi ‘ogāpā, e āfua i le fale o Asaria ‘ua o‘o i le gauaiga o le pā ‘ua o‘o fo‘i i le tulimanu.
25. ‘Ua ati e Palala le atali‘i o Usai i luma o le gauaiga o le pā, ma le ‘olo ‘ua sili atu i le fale maualuga o le tupu e lata ane i le lotoā o le fale puipui.E aupito ane ‘iā te ia o Petaia le atali‘i o Parose.
26. Sa nonofo fo‘i ‘au‘auna o le malumalu i Ofele, e o‘o i luma o le faitoto‘a o le vai i sasa‘e, ma le ‘olo ‘ua sili atu.
27. E aupito ane i ai ‘ua ati e tagata Tikoa o le tasi ‘ogāpā, e āfua i luma o le ‘olo tele ‘ua sili atu, ‘ua o‘o fo‘i i le pā o Ofele.
28. ‘Ua ati e le ‘au ositaulaga na fua mai i luga o le faitoto‘a o solofanua, ta‘ito‘atasi i lona lumāfale.
29. E aupito ane ‘iā te i latou ‘ua ati e Satoka le atali‘i o Imere i lona lumāfale.E aupito ane fo‘i ‘iā te ia ‘ua ati e Semaia le atali‘i o Sekania, o le leoleo o le faitoto‘a i sasa‘e.
30. E aupito ane ‘iā te ia ‘ua ati e Hanania le atali‘i o Selemia, ma Anuni o lona to‘aono o atali‘i o Salafa, o le tasi ‘ogāpā.E aupito ane ‘iā te ia ‘ua ati e Mesulama le atali‘i o Perekia i luma o lona potu.
31. E aupito ane ‘iā te ia ‘ua ati e Malekia le atali‘i o le tufuga fai mea auro e o‘o i le fale o le ‘au netini, ma tagata fa‘atau, i luma o le faitoto‘a o Mefekato e o‘o fo‘i i le afeafe aupitoaluga o le tulimanu.
32. ‘Ua ati e tufuga fai mea auro ma tagata fa‘atau i le vā o le afeafe aupitoaluga o le tulimanu e o‘o i le faitoto‘a o mamoe.#