1. ‘Ona lē toe tali mai ai lea o ia tagata e to‘atolu ‘iā Iopu, auā ‘ua amiotonu o ia i lona lava manatu.
2. ‘Ona tupu ai lea o le ita o Eliu le atali‘i o Parakelu, o le sa Pusā o so le ‘āiga o Rama, na tupu lona ita ‘iā Iopu, ‘ina ‘ua ta‘uamiotonuina o ia e ia lava, ‘ae lē o le Atua.
3. ‘Ua tupu fo‘i lona ita i ana uō e to‘atolu, ‘ina ‘ua latou le mautali, a ‘ua latou fa‘asala pea ‘iā Iopu.
4. ‘Ua fa‘atalitali Eliu ‘iā Iopu, se‘ia uma atu ‘upu, auā ‘ua toeaina i latou, ‘ae itiiti o ia.
5. ‘Ua va‘ai atu Eliu, ‘ua leai se tali i fofoga o ia tagata e to‘atolu, ‘ona tupu ai lea o lona ita.
6. ‘Ona tali mai ai lea o Eliu le atali‘i o Parakelu, o lo sa Pusā, ‘ua fa‘apea mai,“‘Ou te itiiti a‘u, ‘ae toeaina lava ‘outou,o le mea lea sa ‘ou mata‘u ai,ma ‘ou fefe e fa‘ailoa atu ‘iā te ‘outou la‘u tāofi.
7. Sa ‘ou fa‘apea,‘‘Ia tautala mai aso, ‘ia fa‘ailoa mai le poto e le tele o tausaga.’
8. ‘Ae peita‘i o i ai lava le agaga i totonu o le tagata;o le mānava fo‘i a Lē e ona le malosi uma lava e fa‘apopotoina ai i latou.
9. E lē laupopoto ē ‘ua sili;e lē lausilafia fo‘i le tonu e toeaina.
10. O le mea lea ‘ou te fai atu ai,‘Fa‘afofoga mai ia ‘iā te a‘u,‘ou te fa‘aali atu fo‘i e a‘u la‘u tāofi.’
11. “Fa‘auta, ‘ua ‘ou fa‘atalitali ‘iā ‘outou fetalaiga;‘ua ‘ou fa‘alogologo atu ‘iā ‘outou mafaufauga,se‘ia filifili ni a ‘outou fetalaiga.
12. ‘Ua ‘ou mafaufau fo‘i ‘iā ‘outou ‘upu; fa‘auta fo‘i,e leai so ‘outou ‘ua na a‘oa‘i tonu ‘iā Iopu, po ‘ua tali atu i ana ‘upu.
13. Ne‘i ‘outou fai ane,‘‘Ua maua e i matou le poto;‘ua faia‘ina o ia i le Atua lava, ‘ae lē o tagata.’
14. ‘Ua ia lē sauni ana ‘upu ‘iā te a‘u,‘ou te lē tali atu fo‘i ‘iā te ia ‘iā ‘outou ‘upu.
15. “‘Ua femēmēa‘i i latou; ‘ua lē toe tali mai;‘ua latou tu‘u a latou fetalaiga.
16. ‘Ua ‘ou fa‘atalitali fo‘i ‘ina ‘ua latou lē tautala;a ‘ua fa‘alologo i latou, ‘ua latou lē toe tali mai.
17. O a‘u fo‘i ‘ou te tali atu lava a‘u,o a‘u lava; ‘ou te fa‘aali atu la‘u tāofi.
18. Auā ‘ua tumu a‘u i ‘upu,‘ua u‘una‘i mai ‘iā te a‘u le agaga o i totonu ‘iā te a‘u.
19. Fa‘auta, o lo‘u loto ‘ua pei o le uaina e le‘i tālaina,‘ua tāli pā e pei o fagu pa‘u fou.
20. ‘Ou te tautala atu, ‘ia ‘ou mānava ai,‘ou te fa‘amaga o‘u laugutu ma ‘ou tali atu ai.
21. ‘Aua lava ne‘i ‘ou fa‘ailogaina se tagata;‘aua fo‘i ne‘i ‘ou fa‘ane‘ene‘e i se tagata.