1. ‘Ona tali mai ai lea o Sofara o le Naama, ‘ua fa‘apea mai,
2. “E moni, o o‘u mafaufauga lava ‘ou te tali atu ai,‘ona o lo‘u popole fo‘i o i totonu ‘iā te a‘u.
3. ‘Ua ‘ou fa‘alogo atu i le a‘oa‘iga e fa‘amāina ai a‘u,o le fa‘autauta fo‘i o lo‘u loto ‘ou te tali atu ai.
4. ‘Ua e lē iloa ‘ea lenei mea talu mai le fa‘avavau,talu ‘ona tu‘uina o le tagata i le lalolagi,
5. e sa‘asa‘a le ‘alaga fiafia o ē amio leaga,o le ‘oli‘oli fo‘i o le tagata fa‘alēmata‘u o le ‘emo o le mata lea?
6. E ui lava ‘ina o‘o a‘e lona silisili i le lagi,ma papa‘i atu lona ulu i ao,
7. e fano o ia e fa‘avavau e pei o lona otaota;e fai mai i latou o ē na iloa o ia,‘O ifea o i ai o ia?’
8. E lele ‘ese o ia e pei o le li‘a, e lē maua fo‘i o ia:e tuli‘eseina lava o ia e pei o le mea e va‘aia i le po.
9. O mata na va‘ai ‘iā te ia, e lē toe iloa o ia;e lē toe iloa fo‘i o ia i le mea sa i ai o ia.
10. E fa‘alelei atu ona atali‘i i ē matitiva,ma toe avatua e ona lima lona ‘oloa.
11. ‘Ua tūtūmu ona ivi i ana agasala na faia ‘ina o taule‘ale‘a,e ta‘o‘oto fo‘i fa‘atasi ma ia i le ‘ele‘ele.
12. “E ui lava ‘ina suamalie le amio leaga i lona gutu,ma ‘ua ia natia ai i lalo o lona laulaufaiva;
13. e ui lava ‘ina fa‘apelepeleina ai e ia, ma na lē lafoa‘iina;‘ae tāofia pea i lona gutu;
14. ‘ae liua ana mea e ‘ai i lona manava,e ‘avea ma mea ‘o‘ona a asipi i totonu ‘iā te ia.
15. Na ia foloina le ‘oloa, ‘ae toe pua‘i mai ai,e fa‘ate‘aina ai e le Atua i lona manava.
16. E miti e ia le mea ‘o‘ona a asipi,e oti o ia i le laulaufaiva o le gata.
17. E lē va‘ai o ia i vaitafe,o tafe o alia o le meli ma le suāsusu.
18. E toe avatua e ia o le mea na ia galue ai, na te lē ‘ai ai fo‘i;e pei o ‘oloa e toe avatua, na te lē fiafia i ai.
19. Auā ‘ua ia fa‘asauāina ma tu‘ulafoa‘iina ē ‘ua matitiva;‘ua ia faoa le fale na ia lē faia.
20. “O le mea lea e lē iloa ai e ia se filemū i totonu ‘iā te ia,e lē fa‘asaoina e ia lana mea ‘ua ia mana‘o tele i ai.
21. E lē toe i ai sina ana mea e ‘ai;o le mea lea e lē tumau ai lona manuia.
22. E puapuagātia o ia a o faula‘i lava ana mea;e o‘o atu ‘iā te ia lima uma o ē ‘ua tigāina.
23. A o fa‘atumuina lona manava,e fa‘ao‘oina e le Atua ‘iā te ia lona to‘asā tele,e fa‘atotō ifo ai fo‘i e ia i luga ‘iā te ia a o ‘ai o ia.
24. E sola ‘ese o ia i le ‘au‘upega u‘amea,e fana ‘ia ati i le ‘aufana ‘apamemea.
25. E tōina ia, e fa‘ate‘a‘eseina fo‘i i le tino;e alu atu le pelu pupula a‘i lona au ‘o‘ona;‘ua i ona luga o mea e mata‘utia.
26. ‘Ua teteu pouliuli uma e fai mōna ‘oloa;e ‘aina o ia e le afi ‘ua lē ulaina;e malaia lē ‘ua toe i lona fale ‘ie.
27. E fa‘aalia e le lagi lana amioleaga;e tula‘i atu fo‘i le lalolagi e tete‘e ‘iā te ia.
28. E ‘ave‘esea le ‘oloa o i lona fale,e tāfea i le aso o lona to‘asā.
29. O le tofi lenei o le tagata amio leaga mai le Atua,o le tofi fo‘i ‘ua tofia ‘iā te ia e le Atua.”