1. ‘Ona tali atu ai lea o Iopu, ‘ua fa‘apea atu,
2. “‘Ua fa‘apefea ‘ea ‘ona e fesoasoani i lē ‘ua leai sona malosi,ma fa‘amalosia le lima vaivai?
3. ‘Ua fa‘apefea ‘ea ‘ona e fa‘atonu i lē ‘ua leai sona poto,ma fa‘ailoa tele mai le tonu?
4. ‘Ua e ta‘u mai ‘ea ia ‘upu ‘iā te ai?Se atamai ‘ea o ai ‘ua o‘o mai mai ‘iā te oe?
5. E gatete agaga o ē ‘ua oti ‘ua i lalō,o le moana fo‘i ‘atoa ma mea o i ai.
6. ‘Ua ta‘atia fua seoli i ona luma,e leai fo‘i se ufiufi o le mea o i ai le malaia.
7. ‘Ua ia folasia le itū i matū i luga o le vā nimonimo,‘ua ia tautauina le lalolagi, ‘ae leai se tautaulaga.
8. ‘Ua ia ‘ofu‘ofuina vai i ona ao uliuli,‘ae lē māsae le ao i lona mamafa.
9. ‘Ua ia puipuia luma o lona nofoāli‘i,‘ua ia fofola ifo lona ao i ona luga.
10. ‘Ua tusi fa‘ata‘ali‘oli‘o e ia tulu‘iga o le fogātai,e o‘o i le gata‘aga o le malamalama ‘atoa ma le pouliuli.
11. ‘Ua lūlūina pou tu o le lagi,‘ua femēmēa‘i fo‘i i lana a‘oa‘iga.
12. O lona mana na te fa‘amalūina ai le sami,o lona poto fo‘i na te taia ai lona fa‘amaualuga.
13. O lona agaga ‘ua ia fa‘amatagofie ai le lagi;‘ua manu‘a fo‘i i lona ‘a‘ao le gata televave.