1. “A o ona po nei ‘ua tapisa mai ai ‘iā te a‘u i latou e itiiti o latou aso i o‘u;ta ‘ino‘ino e tu‘u fa‘atasi o latou tamā ma ta‘ifau o lo‘u lafu mamoe.
2. A o le malosi o latou lima se a ‘ea lona aogā ‘iā te a‘u,o ē ‘ua mavae lo latou malosi?
3. O le mativa ma le oge na tino vavale ai i latou;na sōsōla atu i le nu‘u naumati,o le pouliuli, o le ta‘aligoligoa ma le gaogao.
4. O ē na fafati i maluka i tafatafa o vao iti,ma a‘a o ratami e fai mā latou mea e ‘ai.
5. Na tuli‘esea i latou i le mea o i ai tagata,na latou tuli‘alaga ‘iā i latou e pei o se gaoi.
6. Na latou nonofo i vanu,ma ana fo‘i o le lau‘ele‘ele ma papa.
7. Na latou fētāgisi i totonu o vao iti,e pei o asini o le vao;na fa‘apotopotoina i latou i lalo o le vao ogoogo.
8. O le fānau i latou a tagata vālea;o le fānau fo‘i a ē ‘ua lē igoā;na tuli‘eseina i latou i le nu‘u.
9. “A o ona po nei ‘ua ‘avea ai a‘u ma a latou pese,‘ua fai fo‘i a‘u ma fa‘atauemuga ‘iā te i latou.
10. ‘Ua latou ‘ino‘ino mai ‘iā te a‘u,ma ‘alo‘alo mamao ‘iā te a‘u;‘ua latou le tāofia o latou feanuga i o‘u luma.
11. Auā ‘ua tatalaina e le Atua la‘u maea ma na fa‘atigāina a‘u,‘ina ‘ia latou fa‘atauemu mai ‘iā te a‘u.
12. ‘Ua tula‘i mai tama leaga i lo‘u itū taumatau,‘ua latou tavae mai i o‘u vae,‘ua latou tanu fo‘i o latou ala ‘ia malaia ai a‘u.
13. ‘Ua latou lepeti lo‘u ala,‘ua latou fa‘ateleina lo‘u malaia,e leai se fesoasoani mai ‘iā te i latou.
14. ‘Ua latou feosofi mai i le malae laolao;ma latou osofa‘i a‘u i le taimi e tasi.
15. ‘Ua fa‘asagasaga mai ‘iā te a‘u mea mata‘utia;‘ua latou tuliloa mai i lo‘u mamalu e pei o le matagi:‘ua mavae atu fo‘i lo‘u manuia e pei o le ao.
16. “O lenei, ‘ua fa‘avaivaia lo‘u loto i totonu ‘iā te a‘u;‘ua maua a‘u i aso o le puapuagā.
17. ‘Ua tigā tele lava o‘u ivi i le po,e lē mapu i le gāoi o lo‘u tino.
18. O lo‘u ma‘i ‘ina ‘ua matuā tele ‘ua fai mo‘u ‘ofu;‘ua fusi ‘iā te a‘u e pei o le ua o lo‘u ‘ofu tino.
19. ‘Ua ia lafotūina a‘u i le palapala;‘ua ‘avea fo‘i a‘u e pei o le efuefu ma le lefulefu.
20. ‘Ua ‘ou ‘alaga atu ‘iā te oe, a ‘e te lē tali mai ‘iā te a‘u;‘ua ‘ou tu atu, a ‘e te le‘i silasila mai ‘iā te a‘u.
21. ‘Ua liua oe ‘ua e fa‘atigā ‘iā te a‘u;‘ua e tuliloa mai ‘iā te a‘u i lou ‘a‘ao malosi.
22. ‘Ua e si‘itia a‘u, ‘ua e fa‘ati‘eti‘e ‘iā te au i le matagi;‘ua e fa‘avaivaia ma fa‘amata‘utia a‘u.
23. Auā ‘ua ‘ou iloa ‘e te ‘avea a‘u i le oti,ma le fale ‘ua tofia mo tagata ola uma lava.
24. “‘Ae peita‘i na te lē fa‘ao‘o atu lona ‘a‘ao i le tu‘ugamau,pe ‘āfai e i ai ‘iā te i latou le tatalo i lona fa‘ao‘oina o le malaia.
25. ‘Ou te le‘i tagi ‘ea ‘ona o lē na puapuagātia?E le‘i fa‘anoanoa ‘ea lo‘u loto ‘ona o lē ‘ua mativa?
26. Na ‘ou fa‘atalitali i le lelei, ‘ona o‘o mai ai lea o le leaga;na ‘ou fa‘amoemoe fo‘i i le malamalama, ‘ona o‘o mai ai lea o le pogisā.
27. ‘Ua sapotuvale lo‘u manava ma ‘ua lē to‘a filemū;‘ua o‘o mai ‘iā te a‘u aso o le puapuagā.
28. ‘Ua ‘ou fealua‘i ‘ua uliuli ‘ae lē o le lā;‘ua ‘ou tula‘i i le fa‘apotopotoga ma ‘ou ‘alaga.
29. ‘Ua ‘avea a‘u ma uso o tanimo ma uō o iaena.
30. ‘Ua uliuli lo‘u lava pa‘u, ‘ua mū fo‘i o‘u ivi i le vevela.