1. ‘Ua tali mai pea Eliu, ‘ua fa‘apea mai,
2. “Fa‘afogafoga mai i a‘u ‘upu o ‘outou o ē popoto;o ‘outou o ē silafia mea, ‘inā liliu mai ia o ‘outou fofoga ‘iā te a‘u.
3. Auā e fa‘amasino e le taliga i ‘upu,e pei ‘ona tofotofo e le gutu i mea e ‘ai.
4. ‘Inā tatou filifili ia le tonu mo i tatou;‘ia tatou iloa e i tatou lava, po o le a le lelei.
5. Auā ‘ua fa‘apea mai Iopu,‘‘Ua ‘ou amiotonu; ‘ua ‘ave‘esea fo‘i e le Atua lo‘u fa‘amasinoga.
6. ‘Ua ‘avea a‘u ma pepelo i lo‘u fa‘amasinoga,‘ua manu‘a leaga lava a‘u, ‘ae leai so‘u solitulafono.’
7. O ai ‘ea se tagata e tusa ma Iopu,o lē ‘ua inu i le fāifāiga e pei ‘ona inu i le vai.
8. O lē ‘ua fefa‘auōa‘i fo‘i ma i latou ‘ua fai amioletonu,ma feoa‘i ma tagata amio leaga.
9. Auā, ‘ua ia fai mai,‘E lē aogā i le tagata ‘ona ia fiafia o ia i le Atua.’
10. “O lenei, tagata atamamai e, fa‘afogafoga mai ia ‘iā te a‘u;e mamao ma le Atua ‘ona ia amio leaga,ma Lē e ona le malosi uma lava ‘ona ia amioletonu.
11. Auā e taui atu e ia i le tagata lana lava galuega;na te fa‘atatau fo‘i i tagata ta‘ito‘atasi e tusa ma lona ala.
12. E moni lava e lē amioleaga le Atua,e lē fa‘api‘opi‘oina fo‘i e Lē e ona le malosi uma lava le fa‘amasinoga.
13. O ai ‘ea ‘ua tofia o ia e pule i le lalolagi?Po o ai fo‘i na saunia le atu laulau uma lava?
14. ‘Āfai e fa‘apea ‘ona finagalo o ia ‘iā te ia,na te fa‘afoisia ‘iā te ia lona agaga ma lana mānava;
15. ‘ona oti ai lea o tagata uma lava fa‘atasi,ma toe fo‘i atu tagata i le ‘ele‘ele.
16. “‘Āfai ‘ua ‘iā te oe le mafaufau,‘inā e fa‘afofoga mai ia i lenei mea;liliu mai ia ou fofoga i a‘u lava ‘upu.
17. E pule ‘ea lē ‘ua ‘ino‘ino i le tonu?‘e te fa‘asalaina ‘ea fo‘i lē ‘ua matuā amiotonu lava?
18. E fai atu ‘ea i le tupu, ‘‘Ua e ulavale?’ma ali‘i, ‘‘Ua amio leaga ‘outou?’
19. Pe fai atu ‘ea i lē na te lē fa‘ailogaina ali‘i sili,ma ‘ua lē sili lona silasila i mau‘oa i lona silasila i le mativa?auā o le galuega a ona ‘a‘ao i latou uma.
20. E oti fa‘afuase‘i i latou,o le tulua o po ma ao e fa‘agateteina ai le nu‘u,ma mavae atu ai; e ‘ave‘esea fo‘i o ē malolosi,‘ae lē o se lima e ‘ave‘ese ai.
21. “Auā ‘ua silasila o ia i ala o tagata ta‘ito‘atasi,‘ua ia silafia fo‘i ona sāvaliga uma.
22. E leai se pouliuli, e leai fo‘i se ata o le oti,e lalafi ai o ē fai amio leaga.
23. Auā e lē tatau i le tagata ‘ona mana‘o pea‘ia alu atu i le Atua e fai se fa‘amasinoga.
24. E tu‘imomomoina e ia o ē malolosi e lē mafaitaulia,ma fa‘atūina e ia nisi e sui a‘i i latou.
25. ‘Ua ia silafia a latou galuega,o le mea lea ‘ua ia lafoia ai i latou i le po,‘ona tu‘imomomoina ai lea o i latou.
26. ‘Ua amio leaga i latou,o le mea lea ‘ua ia sasa ai ‘iā te i latou,i le mea e va‘ava‘ai ai tagata;
27. ‘ina ‘ua latou ō ‘ese ‘ua lē mulimuli ‘iā te ia,ma ‘ua lē manatu i latou i se tasi o ona ala.
28. ‘Ua o‘o atu ai ‘iā te ia le ‘alaga o lē ‘ua mativa,‘ua ia fa‘afofoga fo‘i i le ‘alaga o ē ‘ua puapuagātia.
29. A tu‘uina mai e ia le filemū, po o ai ‘ea na te fa‘aatuatuvaleina?A ‘alo fo‘i ona fofoga, po o ai sē na te iloa o iape faia i se nu‘u, po o se tagata e to‘atasi;
30. ‘ina ne‘i fai ma tupu le tagata amio fa‘alēmata‘u,ne‘i maileia ai le nu‘u.
31. “E tatau lava ‘ina fai atu i le Atua,‘‘Ua a‘oa‘iina a‘u, ‘ou te lē toe agaleaga.
32. O se mea ‘ua ‘ou lē iloa ‘ia e a‘oa‘o mai ai e oe ‘iā te a‘u;‘āfai ‘ua ‘ou faia se amio leaga, ‘ou te lē toe faia.’
33. Pe fa‘atatau ‘ea i lou manatu ‘ona taui atu ai e ia i amio,auā ‘ua e tete‘eina atu po ‘ua e loto i ai lava oe, ‘ae lē o a‘u?O lenei, ta‘u mai ia se mea ‘ua e iloa.
34. E fai mai ‘iā te a‘u tagata atamamai,ma le tagata poto o lē fa‘alogo mai ‘iā te a‘u.
35. ‘‘Ua tautala Iopu ma le lē iloa,‘ua fai ana ‘upu ma le lē mafaufau.’
36. O lo‘u loto lenei,‘ia matuā su‘esu‘eina lava Iopu,‘ona o ana tali e pei o tagata amio leaga.