1. O lenei, ‘ua leai se fa‘asala i ē o ‘iā Keriso Iesu, o ē le sāvavali i la le tino, ‘ae i la le Agaga;
2. auā o le tulafono a le Agaga o le ola ‘ua ia Keriso Iesu ‘ua tu‘usaunoa mai lea ‘iā te a‘u nai le tulafono a le agasala ma le oti.
3. Auā o le mea na lē mafaia i le tulafono, ‘ina ‘ua vaivai ia ‘ona o le tino, ‘ua faia lea e le Atua i lona ‘auina mai o lona lava Alo, ‘ua tino e pei o tagata agasala, o le taulaga fo‘i mo agasala, na ia fa‘asalaina ai le agasala i le tino;
4. ‘ina ‘ia ‘ato‘atoa ai le amiotonu i la le tulafono ‘iā i tatou, o ē le sāvavali i la le tino, ‘ae i la le Agaga.
5. Auā o ē i la le tino o loto atu i latou i mea a le tino; a o ē i la le Agaga e loto atu i mea a le Agaga.
6. Auā o le loto i la le tino o le oti lea; o le loto i la le Agaga o le ola lea ma le manuia;
7. auā o le loto i la le tino o le ita lea i le Atua; auā e lē usiusita‘i i le tulafono a le Atua, e lē mafai fo‘i i ai.
8. O i latou fo‘i o i lā le tino, e lē mafai ‘ona fiafia i ai le Atua.
9. A o ‘outou, tou te lē i la le tino, ‘ae i la le Agaga, pe ‘āfai e nofo le Agaga o le Atua i totonu ‘iā te ‘outou. ‘Ai se tasi ‘ua lē ‘iā te ia le Agaga o Keriso, e lē fai lea mōna.
10. ‘Ae ‘āfai ‘ua i totonu ‘iā te ‘outou Keriso, ‘ua oti ai le tino ‘ona o le agasala, a ‘ua ola le agaga ‘ona o le amiotonu.
11. ‘Ae ‘āfai e nofo i totonu ‘iā te ‘outou le Agaga o lē na toe fa‘atū mai ‘iā Iesu nai ē ‘ua oti, e fa‘aola mai fo‘i o ‘outou tino ‘auga vale e lē na toe fa‘atū mai ‘iā Keriso nai ē ‘ua oti, e lona Agaga o lo‘o nofo i totonu ‘iā te ‘outou.
12. O lenei, le ‘au uso e, ‘ua ‘iā te i tatou e taui atu, ‘ae lē o le tino, tatou te amio ai i la le tino;
13. auā ‘āfai tou te amio i la le tino, e oti ai ‘outou; ‘ae ‘āfai e fasiotia e ‘outou amioga a le tino e le Agaga, tou te ola ai.
14. Auā o i latou uma ‘ua ta‘ita‘iina e le Agaga o le Atua, o atali‘i i latou o le Atua.
15. Auā ‘ua ‘outou lē maua le agaga o le pologa, e toe fefefe ai; a ‘ua ‘outou maua le Agaga o tamafai, tou te vala‘au atu ai, “Ava, le Tamā e.”
16. O lo‘o molimau mai lea lava Agaga i o tatou agaga, o fānau i tatou a le Atua.
17. ‘Āfai fo‘i o fānau i tatou, o suli fo‘i, o suli lava o le Atua, o suli fa‘atasi ma Keriso; pe ‘āfai tatou te tigā fa‘atasi ma ia, ‘ina ‘ia fa‘amanuiaina fo‘i i tatou fa‘atasi ma ia.
18. Auā o lo‘u manatu e lē tatau ‘ona fa‘atusaina le tigā i nei ona po ma le manuia atalī e fa‘aalia mai ‘iā te i tatou.
19. Auā o lo‘o fa‘atalitali mea uma na faia ma le naunau i le fa‘aalia mai o atali‘i o le Atua.
20. Auā ‘ua fa‘ato‘ilaloina mea uma na faia i le i‘u vale, e lē o lona loto lea, ‘ae peita‘i ‘ona o ia na na fa‘ato‘ilaloina ai,
21. ma le fa‘amoemoe ia tu‘usaunoa ia lava mea na faia ia lē fa‘apologaina e le i‘u vale, ‘ae o‘o i le sa‘olotoga o le fānau a le Atua e manuia ai.
22. Auā ‘ua tatou iloa, ‘ua ōi fa‘atasi, ma ‘o‘ono fa‘atasi mea uma lava na faia, ‘ua o‘o mai lava i ona po nei.
23. E lē gata fo‘i i lea, a o i tatou lava ‘ua i ai mea fa‘apolopolo a le Agaga, tatou te feoi, o i tatou lava i totonu ‘iā te i tatou, o lo‘o fa‘atalitali atu ‘ia ‘avea ma tamafai, o le fa‘aolaina lea o tatou tino.
24. Auā e fa‘aolaina i tatou i le fa‘amoemoe; a o le fa‘amoemoe ‘ua va‘aia, e lē o le fa‘amoemoe lea; auā pe fa‘apefea ‘ona toe fa‘amoemoe se tasi i le mea ‘ua va‘aia?
25. ‘Ae peita‘i a tatou fa‘amoemoe i le mea ‘ua lē va‘aia, tatou te fa‘atalitali atu i ai ma le ‘onosa‘i.
26. E fa‘apea fo‘i le Agaga ‘ona fesoasoani mai i lo tatou vaivai; auā tatou te lē iloa mea tatou te ole atu ai ma le tusa, ‘ae peita‘i o le Agaga, e fautua o ia mo i tatou i lē ōi e lē mafai ‘ona talatalaina.
27. A o lē su‘esu‘e i loto, ‘ua silafia e ia le finagalo o le Agaga; auā o lo‘o fautua o ia mo le ‘au pa‘ia e tusa ma le finagalo o le Atua.
28. ‘Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo.
29. Auā o ē na silafia e ia anamua, na ia tofia anamua fo‘i, ia foliga i latou i lona Alo, ia foliga ‘iā te ia, ‘ina ‘ia ‘avea o ia ma ulumatua o le ‘au uso e to‘atele.
30. O ē na tofia anamua e ia, ‘ua vala‘auina fo‘i i latou e ia; o ē ‘ua vala‘auina e ia, ‘ua ta‘uamiotonuina fo‘i i latou e ia; o ē ‘ua ta‘uamiotonuina e ia, ‘ua fa‘amanuiaina fo‘i i latou e ia.
31. O lenei, se a sa tatou ‘upu i nei mea? ‘Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?
32. O ia lava sa na lē fa‘asaoina lona lava Alo, a ‘ua tu‘uina mai o ia ‘ona o i tatou uma lava, e lē foa‘i fua mai ‘ea e ia ‘iā te i tatou mea uma lava fa‘atasi ma ia i se a?
33. O ai sē na te molia le ‘au filifilia a le Atua? O le Atua o lē ta‘uamiotonuina mai,
34. o ai sē na te fa‘asalaina mai? O Keriso o ia na maliu, a ‘ua toetū mai lava o ia; o lo‘o i le itū taumatau fo‘i o le Atua, o lo‘o fautua fo‘i o ia mo i tatou.
35. O ai sē na te fa‘ate‘a‘eseina mai i tatou i le alofa o Keriso? O le puapuagā ‘ea, po o le atuatuvale, po o le sauā, po o le oge, po o lē lavalavā, po o le pagātia, po o le pelu?
36. Fa‘apei ‘ona tusia,“‘Ona o oe na fasiotia ai i matou i aso uma,‘ua fa‘atatauina i matou e pei o mamoe ā fasia.”
37. A ‘ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou.
38. Auā ‘ua ‘ou mautinoa, e lē mafaia e le oti, po o le ola, po o agelu, po o ali‘i, po o ē malolosi, po o mea i nei ona po, po o mea atalī,
39. po o le maualuga, po o le loloto, po o se tasi mea na faia, e lē mafaia e ia mea ‘ona fa‘ate‘a‘eseina mai i tatou i le alofa o le Atua, o lo‘o ‘iā Keriso Iesu lo tatou Ali‘i.