1. O lenei, se a ‘ea se mea e sili ai le Iutaia? pe aogā i ni a le peritome?
2. E tele lava i mea uma; ‘ae muamua lenei, ‘ona ‘ua tu‘uina atu ‘iā te i latou o afioga a le Atua.
3. A fa‘apefea? ‘āfai ‘ua lē fa‘amaoni nisi, pe fa‘alēaogāina ‘ea le fa‘amaoni o le Atua i lo latou lē fa‘amaoni?
4. ‘Aua ne‘i fa‘apea, ia tu‘u le fa‘amaoni i le Atua, a o le pepelo i tagata uma lava; pei ‘ona tusia,“‘Ina ‘ia ta‘uamiotonuina oe i au afioga,ma ia ē mālō pe a fa‘amasinoina oe.”
5. ‘Ae ‘āfai o fa‘aalitinoina le amiotonu a le Atua i la tatou amioletonu, se a ‘ea sa tatou ‘upu e fai? ‘Ua amioletonu ‘ea le Atua, o lē na te tu‘uina mai le to‘asā? (O ‘upu a tagata ‘ou te fai atu ai nei.)
6. ‘Aua ne‘i fa‘apea; a fa‘apea, pe fa‘apefea ‘ona fa‘amasinoina le lalolagi e le Atua?
7. Auā a fa‘ateleina le fa‘amaoni o le Atua e tupu ai lona vi‘iga ‘ona o lo‘u pepelo, e fa‘amasinoina a‘u i se a, pei o sē ‘ua agasala?
8. A o lē se‘i fa‘apea ‘ea, (pei ‘ona ‘upuleagaina i matou, pei ‘ona fai ane fo‘i e nisi, ‘ua fa‘apea la matou ‘upu,) “‘Ia tatou fai mea leaga, ‘ina ‘ia tupu ai mea lelei?” E tusa ai la latou sala.
9. O lenei, pe fa‘apefea? ‘ua matou silisili ‘ea? E leai lava; auā ‘ua uma ‘ona molia e i tatou o Iutaia ‘atoa ma Eleni, o lo‘o nofo sala i latou uma lava;.
10. fa‘apei ‘ona tusia:“E leai sē amiotonu, e leai lava se tasi,
11. e leai se na te lagona,e leai sē sā‘ili i le Atua.
12. ‘Ua latou ō ‘ese uma lava,‘ua leaga fa‘atasi i latou,e leai sē ‘ua amio lelei, ‘ua leai lava se tasi.”
13. “‘Ua se tu‘ugamau ‘ua fa‘amaga o latou fa‘aī,‘ua ‘ole‘ole o latou laulaufaiva.”“O i o latou laugutu le mea ‘o‘ona o le asipi.”
14. “‘Ua tumu o latou gutu i le fetu‘u ma le ‘upu fa‘afiufiu.”
15. “‘Ua tele vavave o latou vae e sasa‘a ai le toto,
16. o i o latou ala le olopalaina ma le puapuagātia;
17. ‘ua latou lē iloa fo‘i le ala o le manuia.”
18. “E leai lava so latou mata‘u i le Atua.”
19. O lenei, ‘ua tatou iloa, o mea uma ‘ua fai mai e le tulafono, ‘ua fai mai lava i ē ‘ua i ai le tulafono, ‘ina ‘ia punitia ai gutu uma lava, ma ‘ia nofo sala le lalolagi uma i luma o le Atua.
20. Auā “e lē ta‘uamiotonuina se tagata e to‘atasi i ona luma” i galuega o le tulafono; auā o le tulafono e iloa lelei ai le agasala.
21. A o lenei, ‘ua fa‘aalia mai le amiotonu a le Atua, e lē o i ai le tulafono, ‘ua molimau i ai e le tulafono ‘atoa ma le ‘au perofeta;
22. o le amiotonu lea a le Atua i le fa‘atuatua ia Iesu Keriso, e o‘o i tagata uma, mo tagata uma fo‘i o ē fa‘atuatua; auā e lē ‘ese‘ese lava.
23. Auā ‘ua agasala tagata uma lava, ma ‘ua lē o‘o i le mamalu o le Atua;
24. ‘ua ta‘uamiotonuina fua i lona alofa tunoa i le togiola e a Keriso Iesu,
25. o lē ‘ua tu‘uina mai i luma e le Atua, o le taulaga mo agasala i lona toto; e maua i le fa‘atuatua ‘ina ‘ia fa‘aalitinoina mai lana amiotonu i le lē tauia o agasala ‘ua mavae, i le fa‘apalepale o le Atua;
26. ‘ina ‘ia fa‘aalitinoina mai fo‘i lana amiotonu i ona po nei, ‘ina ‘ia iloa ai o ia o lē amiotonu, ‘ina ‘ua ta‘uamiotonuina e ia lē ‘ua fa‘atuatua ‘iā Iesu.
27. O lenei, o ifea le mitamita? ‘Ua vaoia. I se fea tulafono? O le tulafono i galuega ‘ea? E leai, a o le tulafono i le fa‘atuatua.
28. O lenei, ‘ua tatou tāofi, e ta‘uamiotonuina le tagata i le fa‘atuatua, e lē o i ai galuega o le tulafono.
29. Po o le Atua ‘ea o le Atua na o Iutaia. E lē ‘atoa ‘ea fo‘i ma nu‘u ‘ese? Ioe, ‘atoa fo‘i ma nu‘u ‘ese.
30. Auā fo‘i o le Atua e tasi lava na te ta‘uamiotonuina i le fa‘atuatua lē ‘ua peritomeina, ‘atoa ma lē ‘ua lē peritomeina, ‘ua i ai le fa‘atuatua.
31. O lenei, e fa‘alēaogā ‘ea e i tatou le tulafono i le fa‘atuatua? ‘Aua ne‘i fa‘apea; a ‘ua tatou fa‘atumauina ai le tulafono.#