1. ‘Ia usiusita‘i tagata uma i faipule silisili; auā e leai se pule pe ā lē mai le Atua; o pule uma lava o lo‘o fai nei, ‘ua fa‘atūina e le Atua.
2. O lenei, o lē na te tete‘e i le pule, ‘ua tete‘e e ia i le sauniga a le Atua; o ē tete‘e fo‘i e sala lava i latou.
3. Auā o ali‘i, e lē se fa‘amata‘u i latou e amio lelei, na o ē amio leaga. O lo‘u mana‘o ‘ea ‘ia e lē fefe i le pule? ‘Ia e amio lelei, ‘ona ta‘uleleia mai lea o oe e ia.
4. Auā o le ‘au‘auna ia a le Atua ‘iā te oe, ‘ia lelei ai; ‘ae ‘āfai ‘e te amio leaga, ‘ia e fefe ai, auā e lē fai fua o ia lana pelu; auā o le ‘au‘auna o ia a le Atua, o lē na te taui atu i le to‘asā i lē amio leaga.
5. O lenei, e tatau ‘ona usiusita‘i, e lē gata ‘ona o le to‘asā, ‘ae peita‘i ‘ona o le loto fuatia ifo.
6. O le mea fo‘i lea tou te avatu ai taulaga, auā o ‘au‘auna i latou a le Atua, o lo‘o finafinau i lenei lava mea.
7. O lenei, ‘ia avatu i tagata uma lava a latou mea; o le lafoga i ē ‘ua tatau i ai le lafoga; o le tiute i ē ‘ua tatau i ai le tiute; o le mata‘u i ē ‘ua tatau i ai le mata‘u; o le fa‘aaloalo i ē ‘ua tatau i ai le fa‘aaloalo.
8. ‘Aua ne‘i ‘iā te ‘outou se mea e tasi a se tasi tagata; ‘ae tau lava o le fealofani; auā ‘ai sē alofa atu i se tasi tagata, ‘ua ‘ato‘atoa ‘ona faia e ia o le tulafono.
9. Auā o ‘upu ia, “‘Aua le mulilua, ‘Aua le fasioti tagata, ‘Aua le gaoi, ‘Aua le molimau pepelo, ‘Aua le tu‘inanau;” ‘āfai fo‘i ‘ua toe se isi poloa‘iga, o lo‘o ‘ua aofia lava i lenei ‘upu, “‘Ia e alofa atu i lē lua te tuā‘oi, ‘ia pei o oe lava ‘iā te oe.”
10. E lē agaleaga atu le alofa i lē la te tuā‘oi; o lenei, o le alofa o le ‘ato‘atoa lea o le tulafono.
11. ‘Ia fa‘apea fo‘i, ‘ina ‘ua tatou iloa ona po, ‘ua o‘o i le itū po ē ala ai ē na momoe; auā ‘ua latalata nei ‘iā te i tatou le ola, sa mamao ‘ina o tatou ulua‘i fa‘atuatua.
12. ‘Ua leva le po, ‘ua lata mai le ao; o lea ‘ia tatou fa‘ate‘a ‘ese ai galuega o le pogisā, a ‘ia tatou ‘o‘ofu i ‘ofu tau o le malamalama.
13. ‘Ia tatou sāvavali ma le matagofie e tusa i le ao; ‘aua le poula ma le ‘onā, ‘aua le faita‘aga ma le mataitu, ‘aua le femisa‘i ma le matau‘a.
14. A ‘ia ‘outou ‘o‘ofu i le Ali‘i o Iesu Keriso; ‘aua fo‘i le sauniuni mo le tino, e o‘o ai ona tu‘inanau.#