Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16

Feagaiga Tuai

Feagaiga Fou

O Tusi i Roma 7 O LE TUSI PA'IA - Ekalesia Katoliko Roma (RSCB)

O le Tau‘a o Mana‘o Leaga ma Mana‘o Lelei

1. Le ‘au uso e, tou te le‘i iloa ‘ea, auā ‘ou te fai atu i ē ‘ua iloa le tulafono, e pule le tulafono i le tagata na o aso e ola ai o ia?

2. Auā o le fafine nofo tane, ‘ua noanoa ia e le tulafono i lana tane a o ola o ia; ‘ae ‘āfai ‘ua oti le tane, ‘ona tālaina lea o ia a‘i le tulafono i le tane.

3. O lenei fo‘i, ‘āfai e nofo tane o ia i se tasi, a o ola lana tane, e ta‘ua ia o le mulilua; peita‘i ane, ‘āfai ‘ua oti lana tane, ‘ona tu‘usaunoa lea o ia i le tulafono; i le a nofo o ia i se tasi tane e lē mulilua ai o ia.

4. E fa‘apea fo‘i ‘outou o‘u uso e, ‘ua oti ‘outou i la le tulafono, i le tino o Keriso; ‘ina ‘ia ‘outou nonofo i le tasi, o lē na toetū mai nai ē ‘ua oti, ‘ina ‘ia fua mai ai i tatou ni fua i le Atua.

5. Auā ‘ua galulue mana‘o leaga talu le tulafono i o tatou tino, ‘ina o i lā le tino i tatou, e fua mai ai ni fua e oti ai;

6. a o lenei, ‘ua tatalaina i tatou nai le tulafono sa tāofia ai i tatou, ‘ina ‘ua tatou oti, o lea ‘ua tatou ‘au‘auna ai, i la le agaga fou, ‘ae lē i la le tusi tuai.

O le Tulafono ma le Agasala

7. O lenei, se a ‘ea sa tatou ‘upu? O le agasala ‘ea le tulafono? ‘Aua ne‘i fa‘apea. E moni lava, ‘ana lē se anoa le tulafono, po ‘ua ‘ou lē iloa le agasala; auā ‘ana lē fai mai le tulafono, “‘Aua ‘e te tu‘inanau, po ‘ua ‘ou lē iloa le tu‘inanau.”

8. A ‘ua maua e le agasala se togafiti i le poloa‘iga, ‘ona fa‘atupu ai lea i totonu ‘iā te a‘u o tu‘inanau uma lava. Auā ‘ua oti le agasala, a o leai se tulafono.

9. Sa ‘ou ola fo‘i anamua ‘ina ‘ua lē o‘o mai le tulafono; ‘ua o‘o mai le poloa‘iga, ‘ona toe ola mai ai lea o le agasala, ‘ona ‘ou oti lea.

10. ‘Ua iloa fo‘i e a‘u o le poloa‘iga na saunia e ola ai, o lea ‘ua o‘o mai ai le oti;

11. auā na maua e le agasala le togafiti, ‘ona fa‘asesē mai ai lea o ia ‘iā te a‘u e le poloa‘iga, o lea fo‘i na fasioti ai o ia ‘iā te a‘u.

12. O lenei fo‘i, e pa‘ia lava le tulafono, ma le poloa‘iga e pa‘ia, le tonu, ma ‘ua lelei.

13. ‘Ia, ‘ua ‘avea ‘ea le mea lelei ma mea e oti ai a‘u? ‘Aua ne‘i fa‘apea; a o le agasala ‘ina ‘ia loa mai o le agasala lea, o lē na te fa‘atupuina le oti ‘iā te a‘u i le mea lelei, ‘ina ‘ia iloa i le poloa‘iga o le agasala e matua agasala lava.

O le Fete‘ena‘iga i Totonu ‘iā te i Tatou

14. Auā ‘ua tatou iloa o lo‘o i la le Agaga le tulafono, a o a‘u ‘ou te i la le tino, ‘ua fa‘atauina atu a‘u e fai ma tagata o le agasala.

15. Auā ‘ou te lē iloa mea ‘ou te faia, auā o le mea ‘ou te faia ‘ou te lē loto i ai, a o le mea ‘ou te ‘ino‘ino i ai o lea ‘ou te faia.

16. ‘Āfai fo‘i i ‘ou te faia le mea ‘ou te loto i ai, ma te ‘au ‘upu fa‘atasi ma le tulafono, e lelei ia.

17. O lenei, e lē o a‘u e toe faia lea mea, a o le agasala o lo‘o nofo i totonu ‘iā te a‘u.

18. Auā ‘ua ‘ou iloa e leai se mea lelei ‘ua nofo i totonu ‘iā te a‘u, o lo‘u tino lea; auā ‘ua ‘iā te a‘u le loto atu, a ‘ou te le‘i iloa ‘ona fai o le mea lelei;

19. auā ‘ou te lē faia o le mea lelei ‘ou te loto i ai, a o le mea leaga ‘ou te lē loto i ai, o le mea lea ‘ou te faia.

20. ‘Āfai fo‘i ‘ou te faia le mea ‘ou te lē loto i ai, ‘ua lē o a‘u e toe faia, a o le agasala o lo‘o nofo i totonu ‘iā te a‘u.

21. O lenei, ‘ua ‘ou iloa peiseaī se tulafono na ‘iā te a‘u; pe a ‘ou loto atu i le lelei e fai, ‘ua ‘iā te a‘u le leaga.

22. Auā ‘ou te fiafia i le tulafono a le Atua i le tagata i totonu.

23. A ‘ua ‘ou iloa le tulafono ‘ese i ‘ou tino, o lo‘o tau le tau‘a i le tulafono a lo‘u mafaufau, ‘ua fai fo‘i a‘u ma tagata o tau‘a i le tulafono a le agasala o lo‘o i ‘ou tino.

24. Auē o a‘u le tagata malaia! O ai sē lavea‘i ‘iā te a‘u a‘i le tino o lenei oti?

25. ‘Ou te fa‘afetai lava i le Atua, auā o Iesu Keriso lo tatou Ali‘i. O lenei fo‘i, o a‘u nei lava ‘ou te ‘au‘auna i le tulafono a le Atua i lo‘u mafaufau, a o le tulafono a le agasala i lo‘u tino.#