1. O le ‘upu moni ‘ou te fai atu ai i luma o Keriso, ‘ou te lē pepelo, ‘ua molimau mai ‘iā te a‘u lo‘u loto fuatia ifo i le Agaga Pa‘ia,
2. le tele lo‘u fa‘anoanoa, e lē aunoa fo‘i le puapuagā o lo‘u loto;
3. auā ‘ou te mafaia ‘ona fia anatema o a‘u ‘ia te‘a ma Keriso e sui a‘i o‘u uso, o lo‘u ‘āiga i la le tino;
4. o sā Isaraelū i latou, o tamafai i latou ‘ua i ai fo‘i le mamalu, ma feagaiga ma sauniga o le tulafono, ma le tapua‘iga ma ‘upu na folafolaina;
5. o ‘iā te i latou tupuga, mai ‘iā te i latou fo‘i le Keriso i la le tino, o lē pule aoao ia, o le Atua e vi‘ia e fa‘avavau. Amene.
6. ‘Ae lē peiseaī ‘ua i‘u vale le afioga a le Atua; auā o tagata mai ‘iā Isaraelu, e lē o Isaraelu i latou uma lava;
7. e lē o le fānau fo‘i i latou uma auā na tupu mai ‘iā Aperaamo i latou, ‘ae fa‘apea mai, “E vala‘auina lau fānau ‘iā Isaako.”
8. O lona uiga lenei, o le fānau a le tino e lē o le fānau a le Atua i latou; ‘ae peita‘i o le fānau o i le ‘upu ‘ua folafolaina, e ta‘ua i latou o le fānau.
9. Auā o lenei le ‘upu na folafolaina, “E fa‘apenā i le la tausaga, ‘ou te sau ai, o maua fo‘i e Sara sana tama tane.”
10. E lē na o lea, a ‘ua tō fo‘i Repeka i le tasi, o lo matou tamā o Isaako lea;
11. a o le‘i fānau mai ana tama, a o le‘i fai fo‘i e i lā‘ua se mea lelei, po o se mea leaga, ‘ina ‘ia tumau le finagalo o le Atua i la le filifiliga, e lē ‘ona o galuega, a ‘ona o lē na vala‘au mai,
12. na fetalai atu ‘iā te ia, “E ‘au‘auna ulumatua i le ui‘i.”
13. Pei ‘ona tusia, “‘Ua ‘ou alofa ia Iakopo, a ‘ua ‘ou ‘ino‘ino ‘iā Esau.”
14. O lenei, se a ‘ea sa tatou ‘upu? O i le Atua ‘ea le amioletonu? ‘Aua ne‘i fa‘apea.
15. Auā na ia fetalai atu ia Mose, “‘Ou te alofa atu i lē ‘ou te fia alofa atu i ai, ‘ou te alofa mutimutivale fo‘i i lē ‘ou te fia alofa mutimutivale i ai.”
16. O lenei, e lē mai lē ‘ua mana‘o, o lē mai lē ‘ua tausiniō, ‘ae mai le Atua o lē alofa mai.
17. Auā ‘ua fa‘apea mai le Tusi ‘iā Farao, “O lenei lava le mea ‘ua ‘ou fa‘atū ai ‘iā te oe, ‘ina ‘ia ‘ou fa‘aalia lo‘u mana ‘iā te oe, ‘ina ‘ia ta‘ua fo‘i lo‘u igoa i le lalolagi uma lava.”
18. O lenei, e alofa ia i lē ‘ua ia finagalo i ai; ‘ae fa‘ama‘a‘a e ia i lē ‘ua ia finagalo i ai.
19. ‘Anei ‘e te fai mai ‘iā te a‘u, “Pe se a le mea e a‘oa‘i mai ai pea ia? Auā o ai sē ‘ua tete‘e atu i lona finagalo?”
20. Sōia, o oe le tagata, o ai ‘ea oe o lē fīnau atu i le Atua? E fai atu ‘ea le mea na faia i lē na faia o ia. “Se a ‘ea ‘ua e fai ai a‘u fa‘apea?”
21. O le fai ipu ‘omea o le pule ‘ea o ia i le ‘omea, e fai ai i le paluga e tasi o le tasi ipu o le mea lelei, a o le tasi o le mea fa‘atauva‘a?
22. ‘Āfai ‘ua ‘onosa‘i le Atua, ma ‘ua matuā fa‘apalepale i ipu o le to‘asā ‘ua fa‘atatauina i le malaia, ‘ina ‘ua finagalo o ia e fa‘aali mai ai lona to‘asā, ma fa‘ailoa mai ai lona mana;
23. e fa‘ailoa mai ai fo‘i le faula‘i o lona vi‘iga i ipu o le alofa, na ia mua‘i saunia e o‘o i le manuia.
24. O i tatou fo‘i na vala‘auina e ia, e lē gata i Iutaia, ‘ae ‘atoa fo‘i ma nu‘u ‘ese.
25. Pei ‘ona fetalai mai o ia i le Hosea,“‘Ou te ta‘ua lea nu‘u ‘o lo‘u nu‘u,’sa lē so‘u nu‘u‘ou te ta‘ua fo‘i o ia ‘ua ‘alofaina,sa lē alofaina.’”
26. “O i le mea sa fa‘apea atu ai ‘iā te i latou,‘E lē so‘u nu‘u ‘outou,’e i‘u fo‘i ‘ina ta‘ua i latou, o atali‘i o le Atua soifua.”
27. ‘Ua ‘alaga fo‘i Isaia ‘iā Isaraelu, “E ui lava ‘ina fa‘apei o le oneone i le sami le to‘atele o le fānauga a Isaraelu, e fa‘aolaina ē ‘ua totoe;
28. auā e fa‘auma e ia le mea ma fa‘asa‘asa‘aina i le amiotonu, e fa‘asa‘asa‘a e le Ali‘i ‘ona faia o le mea i le nu‘u.”
29. Pei ‘ona fai mai fo‘i anamua e Isaia,“‘Ana lē fa‘atotoeina e le Ali‘i o Sapaota ni fānau mo i tatou,po ‘ua ‘avea i tatou e pei o Sotoma,ma fa‘atatauina i tatou ‘iā Komoro.”
30. O lenei, se a ‘ea sa tatou ‘upu? ‘Ua maua le amiotonu e nu‘u ‘ese na latou lē sā‘ili i le amiotonu, o le amiotonu lava lea e maua i le fa‘atuatua.
31. A o Isaraelu na sā‘ili i le tulafono o le amiotonu, e le‘i o‘o i latou i le tulafono o le amiotonu.
32. ‘Ona o le a ‘ea? ‘Ona ‘ua lē sā‘ilia i le fa‘atuatua, ‘ae peiseaī o galuega o le tulafono; auā na latou tausuai i le ma‘a e tausuai ai.
33. Pei ‘ona tusia,“Fa‘auta, ‘ou te tu‘u i Siona le ma‘ae tausuai ai,ma le papa e tautevateva ai;e lē mā fo‘i se tasi e fa‘atuatua ‘iā te ia.”