1. Upeicha ramo mbaépa yaeta? ¿Ñañemo angaipa tapiápa Tûpâ Ñandeyára pya pôrâ oñemboyoá jaguâ ñandeve?
2. Mbaevéicharamo! Ñande ñañemo manova pe angaipa gui, ¿maichapa icatune yaicove ipype yepe gueteri?
3. ¿Terâpa ndapeicuaai opa ñañemongarai vaecue Cristo Jesus rejeguarâ ñañe mongarai imano jaguepe?
4. Upeicharamo ñande voi ñañeñoty Jendive voí imano jaguepe ñañe mongarai jague rupi, icatu jaguâ Cristo oicove yeby jagueicha umi omano vaecue apytegui pe Tûvâ Ñandeyára puaca tuvicha rupi, upeicha ñande avei yaico co ñande reco ipyajúvape.
5. Ja ñañe moingo jague reje peteîcha Jendive yaico jague reje Jaeicha imano jaguepe, upeicha avei yaicone peteîcha Jendive oicove yeby jaguepe.
6. Cova yaicuaa voi pe ñande reco ituyáva oñemoî jague curusu reje Jendive voí, icatu jaguâ co ñande reco ybypóra angaipavóra rejeguáva oñembyaipa yayeyocuáiucá-vé-ŷ-jaguâ co angaipápe.
7. Upe omano vaecue voi ipôtíma pe angaipa gui.
8. Ja ñande ñamano jague reje Cristo ndive, yarovia yaicove vaerâ jaguâ avei Jendive.
9. Yaicuaa voi oicove yeby jague Cristo umi omano vaecue paûgui, ja ndicatuveijá omano. Pe ñemano voi ndicatuveichene ipuaca Jeseve.
10. Pe omano pype, omano peteî yeby nte ipajá pe angaipa gui, ja oicove yeby pype oicove Tûpâ Ñandeyára peguârâ.
11. Upeicha avei peê peyerereco añete pemano vaecueicha angaipa gui ja peyerereco peicovéva ramo Tûpâ Ñandeyárape, Cristo Jesúrejegua járeje peê.
12. Ani ipuaca pende reje, upeicharamo, pe angaipa pende ruvicha ramo pende rete omano vaerâme, ani jaguâ pembuaye oyerure jaichante pende rete.
13. Upeicha avei ani peiporucá pende rete pe angaipápe pe tecovaí rembiporu ramo, upea rangue peyeporucá Tûpâ Ñandeyárape peicove yeby vaicha omano vaecue apytegui, ja peiporucá pende rete Tûpâ Ñandeyárape pe teco pôrâ rembiporu ramo.
14. Pe angaipa noñembo tuvichaichene ipuaca jaguâ pendereje. Ndajaei peê Moises ñeêngue rejeguáva, pe Tûpâ Ñandeyára pya pôrâ rejeguavante peê.
15. ¿Mbaepa, upeicharamo? Ñañemo angaipánepa ndajaei járeje Moises ñeêngue rejeguava, ja Tûpâ Ñandeyára pya pôrâ rejeguavante? Mbaeveichavo!
16. ¿Nda peicuaaipa oime ramo peteîva peyeporucajá jembiguai ramo, peê pene ñeê rendu jaguâ ichupe, upéva pene ñeêrendújá, upeva rembiguai peê, pe angaipa rembiguai peê pemano jaguâ, terâ pe neê jecopegua rembiguai peê peico jaguâ jecópe.
17. Anga yarojorŷna Tûpâ Ñandeyárape! angaipa rembiguai rire yepe peê, peê pene ñeêrendúnerae pende pyaite guive pe temimboe jecopegua peñemboe jaguepe.
18. Ja coanga peñerenôjêma ramo pe angaipa guŷ gui, peyeyapomanerae pe teco marangatu rembiguai ramo.
19. (Cuimbaeichante añeê, peêcuera pendeyejegui voi pende pituájá reje.) Ja peiporuca jagueicha pende rete pe teco tieŷ ja pe teco ñaña rembiguai ramo, upeicha coanga peê peiporuca vaerâ pende rete pe teco pôtí rembiguai ramo pene marangatuite jaguâ.
20. Pe angaipa rembiguai ramo guare peê peico rei rei vaecue pe teco marangatuva gui.
21. ¿Mbaépa, upeicharamo, penojê vaecue umimbae gui umi coanga peême penemotîva. Umimbae pajá voi oñemano jaguâ.
22. Coanga peñerenojêma ramo pe angaipa guŷgui ja peyeyapoma ramo Tûpâ Ñandeyára rembiguai ramo, coanga penojê umimbae gui peñemomarangatu jaguâ ja umimbae pajá ramo oimene pejupity pe tecove iyapyraŷva.
23. Pe angaipa repycue voí upéva ñemano ja pe Tûpâ Ñandeyára remimeêmbyre rei voí, upeva pe tecové iyapyraŷva Jesu Cristo Ñandeyára rupigua.