1. Upeicharamo ñande ñande puacáva tecôtevê ñaipytyvô umi ipuacaŷvape ja yarokîrîrî icatuŷjápe jaecuera, ja ani yayerojory ñandeyupénte.
2. Peteî teîva ñandejegui toguerojory japichápe mbae ichupe ipôrâ vaerâme oñemombaraete jaguâ.
3. Cristo voi ndoyererojoryi iyupe voi. Upeicha voi oyee Santa Escriturape: Umi nde yao moâ vaecue jicuai nde rerecomêguâjápe, Cheve Che yao nderecoviá.
4. Opa umi mbae yma oñemoî vaecue Santa Escriturape, oñemoî vaecue cuatiápe ñanemboe jaguâ ñandeve icatu jaguâ ñande pya rôsâ ja ñañe angapyjy pe Santa Escritura rupi guagui ñajaârô yaicovo.
5. Upeicharamo, Tûpâ Ñandeyára ñanembo pyarôsâjára ja ñane angapyjyjára, Jae voi tomeê peême peñemomandua peteîcha oñondive Cristo Jesus oyapo jagueicha,
6. icatu jaguâ pende yoya oñondive peteî pya ja peteî yurúpeichante pembo tuvicha jaguâ Tûpâ Ñandeyárape, Ñandeyára Jesu Cristo Rúpe.
7. Upeareje peyoguerojory oñondive Cristo ñande rerojory jagueicha avei, oñembo tuvicha jaguâ Tûpâ Ñandeyára.
8. Coanga che jae Cristo oyeyapo jague tembiguaicha umi Judiope Tûpâ Ñandeyára ñeê añetegua rejejápe omoañeté jaguâ umi mbae oñecuameê vaecue ore rú ypycuepe,
9. ja umi pytagua avei ombotuvichama jague Tûpâ Ñandeyárape oyeporiajuvereco jague reje. Upeicha voí oyee Santa Escriturape: Upéva reje che amombeune Ndejegui umi pytagua paûme ja apurajeine arojoryvo Nde réra.
10. Upeicha avei oyee: Pende rory peê pytagua Jesecueragua ndive.
11. Upeicha avei oyee: Pembuete Ñandeyárape peê pytagua cuera, ja pembo tuvicha Ichupe, opa tetaŷgua cuera.
12. Ja upeicha avei jei Isaias: Oimene Jessé rapó rejegua ja oimene pe opuâ vaerâ umi pytagua ruvicha guasurâ, ja umi pytagua oyeroviane Jese.
13. Upeicharamo, Tûpâ Ñandeyára, ñande yeroviajá, ta pene mbojoryeté ja tapene mbopya guapŷeté, peê peyerovia járeje Jesé, pereco jaguâ catuetei pejaârô vaerâ pe Espiritu Santo penembo puacajára rupi.
14. Anga che aroviaite, che reŷicuera, che vointe aicuaa pôrâ pendejegui, jetaitema penembae pôrâvajá ja peê voi pejechacuaapámajá icatu jaguâicha yepe peñomboe oyupe.
15. Ja che vointe añeê peême co cuatiápe, che reŷicuera, poro poŷjúŷme pomomandua jaguâichante peême pe Tûpâ Ñandeyára ipya pôrâ gui che mbopuacájárupi,
16. aico jaguâ Jesu Cristo rembiyocuai ramo umi pytagua paûme añemoñeêvo co tembiapo caraí Tûpâ Ñandeyára Evangeliopeguare icatu jaguâ umi pytagua mbae caraícha oyererojorŷ avei imomarangatúpyré Espiritu Santo rupi.
17. Areco, upeicharamo, che añemombeu guasu jaguâ Cristo Jesús rupi, umi mbae Tûpâ Ñandeyára rejegua guivope.
18. Che aipoŷjú voí añeê jaguâ mbae Cristo oyapouca vaecue cherejeŷ. Oime voi umi ogueroviauca vaecue umi pytaguape, oico jaguâ jecope iñeême ja jembiapópe,
19. mbaeguasu ja jechapyrâ rupi pe Espiritu puacá rupi. Che voínte Jerusalem guive iyerecuevo Ilirico peve yepe añemoñeê jecópe opavavépe oparupi co Cristo Evangelio gui.
20. Upevareje añejaâ aico yojeipyre, añemoneê-ŷ-vo co Evangelio gui pe yma voí Cristo oñemojerâcuâ jaguepe, anichene jaguâ amboyoa ambuecue rembiapó ári.
21. Che añejaâ voi, oyee jagueicha pe Santa Escriturape: Umiva ojechane umi oñemo jerâcuâ-ŷ-jague, ja umi ojendu-ŷ-vaecue ojechacuaane.
22. Upeareje voi jeta yeby ayeyoco ayu jaguâ pene rendape.
23. Coanga catu ndiporivéima ramo che rendâguâ coa tetâ rupi, ja ymaite guive voi ajase jague reje pene rendape,
24. anga ajávo Españape ajaârô ajasávo pojecha jaguâ peême ja peê che moîrû jaguâ upepeve, icatu rire penendive rae abyá sapyami.
25. Coangaite rupi aja aina Jerusalempe aipytyvô jaguâ umi oñemboecatúvape.
26. Umi Macedoniaŷgua ja Acayaŷgua ipya pôrâ gui omonoô tûpâmbae umi iporiajuva iñemboecatúva jicuaiva Jerusalempe guârâ.
27. Obya voi oyapovo upeicha ipya pôrâ gui, ja oime voi iyáva umivape ombojecovia jaguâ ichupecuera, oñemeê jague reje umi pytaguape oico jaguâ oyorerecua ramo umi mbae Espiritu rejegua yvapeguagui; tecôtevê, upeicharamo, jaecuera ombojecovia umi Judiope mbae ybypegua jecôtevê râme.
28. Upeicharamo, ayapopama ramo cova ja aicuaama ramo oñemeêjá jecópe ichupecuera co tûpâmbae, uperamo ajasane peê peîjá rupi Españape ajávo.
29. Ja che aicuaa ajávo pene rendape âguajê jaguâ peême pe Cristo che mbopyapôrâva jina torypáitépe voi.
30. Anga ayerure peême, che reŷicuera, Ñandeyára Jesu Cristo rérape ja pe Espiritu oyojaŷjúucáva ñandeve rupi che pytyvô jaguâ peyerurévo peñemboe jaguâ catuetei chereje Tûpâ Ñandeyárape,
31. che mârâ-ŷ-jaguâ umi tecove tieŷ itabyva Judeape jicuaiva pogui, ja co tûpâmbae che amonoôucá vaecue umi iñemboecatúva Jerusalempegua peguârâ oyererojory pôrâ jaguâ,
32. icatu jaguâ che che roryjápe âguajê penerendape Tûpâ Ñandeyára oipota ramo, ja apytuu jaguâ penendive cuera abyajápe.
33. Tûpâ Ñandeyára penembo pyaguapŷva toico opavave penendive. Amen.