1. Che Pablo, Jesu Cristo rembiguai, añejenoî vaecue Apostolrâ, ayepea vaecue Tûpâ Ñandeyára Evangelio rejeguarâ,
2. upe oicuameê vaecue yma guive voi umi oñemoñeêjára cuera yuru rupi umi Santa Escriturape pe Itayra gui guaré,
3. upéva David rejegua ñemoñaré voi oñembojeté ramo guare.
4. Upéva oyejechauca vaecue Tûpâ Ñandeyára Raŷjá añetejápe pe Espiritu Marangatu rupi ipuaca rejeve oñemoingove yeby jague reje umi omano vaecue apytegui, Jesú Cristo Ñandeyára upeva,
5. ja Jaerupi rojupity ore pya pôrâ jaguâ ja ore rendâguâ Apostol recóperâ, orepá opa tetâmegua oreñeêrendú ja roguerovia jaguâ Jéra rejejápe.
6. Umichagua paûgui voi peê peñejenoî vaecue avei Jesu Cristo rejegua jaguâ.
7. Opa peê peiva Romape Tûpâ Ñandeyára penderaŷjúva peñejenoî vaecue pene marangatuvarâ, tápene mbopyapôrâ ja ta pene mbopyáguapŷ peême Tûpâ Ñandeyára ñande Rú ja Ñandeyára Jesu Cristo.
8. Tenonde opambaegui arojory raê Tûpâ Ñandeyárape Jesu Cristo rupi opavave pende rejecuera oñemojerâcuâ járeje peyeroviájá jecópe oparupi yby yere reje.
9. Oicuaa voí Tûpâ Ñandeyára, pe che yocuaijára, che pyaite guive aicovo pe Taŷra Evangelio rejejápe, che apytuu ŷ reje che manduajá pendereje tapia che ñemboepe,
10. ayerurévo sapya iya jaguâ cheve icatu ipajápe yepe, Tûpâ Ñandeyára oipota ramo, ajávo che mârâŷreje pene rendape.
11. Che pya yerureté voí pojecha jaguâ peême amboyao jaguâ peême pe Espiritu cheve omeêvaecue penemo mbaraete jaguâ,
12. yaicuaa, che pyaguapy jaguâ penendive yayerovia járeje peteîcha peêcuera ja che avei.
13. Che aipota, che reŷicuera, peêcuera peicuaa pôrâ jeta yeby añemoî jague aja jaguâ pene rendape (coanga pevente ndaiyai cheve gueteri) icatu jaguâ oime pende apytepe avei ajupity vaerâ umi ambuecue pytagua apytepe guaicha.
14. Oime umi Griegope ja umi pytaguape, umi iñarandúvape ja umi itabyvape che ambojecovia vaerâ.
15. Upeareje icatu jagueicha che aicopama voi che kyreŷjápe añemoñeê jaguâ co Evangelio gui peême avei peimeva Romape.
16. Che na ñemotîri co Evangelio rupi. Tûpâ Ñandeyára puacájá voí upéva ombojeco marangatu jaguâ opa ogueroviávape guive, umi Judiope añete raê tenonde, ja upeicha avei umi Griegope.
17. Oime ipype voí oyecuaáucá pe teco imarangatúva Tûpâ Ñandeyára guivó yaroviávo yoájápe, oyee jagueicha Santa Escriturape: Upe marangatu jecopegua oicove vaerâ upe oyeroviájá reje.
18. Oyecuaáucáma voi yvagagui Tûpâ Ñandeyára ipochyjá opa umi ybypóra iñemboécatúŷvape ja umi jecope oicoŷvape, oñemoîva jembiapo vai rejeve pe jecopegua reje.
19. Pe Tûpâ Ñandeyára gui oyecuaa vaerâ ichupecuera voi, oñemo jesâcâ voí ichupecuera. Tûpâ Ñandeyára voi ojechauca ichupecuera.
20. Umimbae oyejechaŷva, oyejechacuaa voínte co yby oyeyapo yby guive yepe umimbae oyapo vaecue reje: oyejechacuaa voi ipuacacue opa ŷ vaerâjá ja Tûpâ Ñandeyáraité rejeguajá. Upeicharamo ndipori mbaeve oñeê vaerâ umia iyejecuera.
21. Umiva oicuaa pôrâ ramo yepe Tûpâ Ñandeyárape, nombo tuvichai yepe Ichupe Tûpâ Ñandeyára ramo, ja ndo guerojoryi Ichupe jecópe. Upea rangue oyeyaby oyoyuabyjápe oñondive, ja iñâcâ tabŷjápe iñypytûmba ipya.
22. Jei pype iñarandujá oyeyapo itabŷraíva ramo.
23. Ja ombuecoviá pe Tûpâ Ñandeyára tuvichaite imarangatuva ja omano ŷ vaerâ reje pe ybypóra omano vaerâ raângá reje ja guyra raânga reje ja maŷmba ipy irundŷva raângá reje, ja mbói rejegua raângá reje.
24. Upeareje voí Tûpâ Ñandeyára opoí ichuguicuera oyapo jaguâ jaecuera oipota jaichaguánte ipyapype, oñemotieŷvo, ja upeicha omomârâ oguete cuera oyeje voínte.
25. Jaecuera oguerová Tûpâ Ñandeyára ñeê añetegua iyapúva reje ombotuvichavévo ja ombuetévévo umi iyapopyrépe pe ñande apojarépe gui. Upéva voí pe imombeu guasu catu pyrâ tapia guârâ. Amen.
26. Upévareje Tûpâ Ñandeyára opoí ichuguicuera iya jaguâ ichupecuera oñembotieŷ jaguâ, ja umi cuña cuera yepe oyeporúrucá rangue jecope oico jecoŷjápe.
27. Upeicha avei umi cuimbae cuera oiporú rangue jecópe umi cuñáme, jacu oyueje oyouvo, oyapovo mbae itieŷva oñondive umi cuimbae cuera. Upeicha oyeju ichupecuera voi jetepe cuera pe oyeyaby jague repycuerâ.
28. Ja na jiâi ramo ichupecuera imanduá jaguâ Tûpâ Ñandeyára reje, Tûpâ Ñandeyára voí opoí ichuguicuera iñâcângusu jaguâ ja oñembo pochŷ jaguâ ja oyapo jaguâ pe iporaŷva.
29. Umiva jenyjêmba jicuai opambae jecopeguaŷ gui, jeco vaíetéjá, ipo yeyopŷjá, ipya vaíjá, jâcâteŷetéjá, oporoyucájá, oyuaby tapiájá, oporombotabŷ catújá, oyepŷséjá oñeê ñemíséjá,
30. oporomoî vaí reíjá, oñamotareŷjá Tûpâ Ñandeyárape, oporojecájá jaecuerantéséjá, oñembotuvichajá, omoingova angaipa ipyajújá, ombueteŷjá ituvape cuera,
31. iñâcâ tabŷjá, yeroviaŷjá, oporojayju ŷ já jecópe, oñyrôcuaaseŷjá, oporo poriajuvereco cuaaŷjá.
32. Upeicharamo oicuaa ramo yepe Tûpâ Ñandeyára jei jague umi oyapova umichagua mbae omano vaerâjá, oyapo meme umimbae jaecuera ae, ja oguerojory avei umi ambuecue cuerape oyapova upeicha avei.