1. Upeicharamo ¿mbaépa yaeta ojupity vaecue pe Abraam ñande ru ypycue?
2. Oñembo jecomarangatu rire Abraam jembiapocue reje, jae mo oguereco rae oñemombeu guasu jaguâ, na Tûpâ Ñandeyára guivoi yepe.
3. ¿Mbaépa oyee pe Santa Escriturape? Oyee voi: Abraam oyerovia Tûpâ Ñandeyára reje ja upea opyta ichupe pe jecomarangatu voí ramo.
4. Oime ramo yepe ombaapóva, ndayaei pe jembiapo repycue opytajá ichupe oñemeê reívaicha, oñembojecoviá voí vaerâjá ichupe jecópe.
5. Upeicha avei oime ramo ombaapo-ŷ-va ogueroviávánte pe ombo jecomarangatúva umi jecoñañávape, pe iyeroviajá opyta ichupe jeco marangatu ramo váicha.
6. Upeicha avei pe David jei jeco oryetéjá pe cuimbae upe Tûpâ Ñandeyára omoî jague jeco marangatu ramo vaicha jembiapo pôrâ ŷ reje yepe.
7. Upeva jei voi: Jeco orŷete umi jecovaícue oyepea jague ja iñangaipa oyeyajoí jague.
8. Jeco oryete pe cuimbae omboya ŷ jaguâ iñangaipa Tûpâ Ñandeyára.
9. ¿Co teco ory umi Judiova peguarâ añontepa? ¿terâpa umi Judioŷvapeguarâ avei? Yae voí Abraampe opyta jague iyerovia jague jeco marangatu ramo vaicha.
10. ¿Mbaeichapa, upeicharamo, opyta ichupe? ¿Icaraípepa terâpa icaraíŷme? Ndopytai ichupe icaraijápe, icaraiŷme guarénte gueteri.
11. Uperirente oñemboe ichupe ojaângámoî jaguâ taŷrape oapyra pireó rupi, oyecuaauca jaguâ oñembo jeco marangatu jague oyerovia jague rupi pe icaraiŷme gueteri yepe, icatu jaguâ oico jae opa umi oyeroviava ru ramo, icaraiŷva ramo yepe jaecuera, icatu jaguâ opyta ichupecuera upeicha avei co teco marangatu,
12. ja oico jaguâ umi icarai vaecue ru, nda icarai jague rejei, oicojague rejente pe ñande ru Abraam pe pŷpóre reje oico jague jae oyeroviajápe jae oñemongarai mboyve gueteri yepe.
13. Ja nda pe Moises ñeê jecopegua rupiri oñecuameê vaecue Abraampe ja jeŷícuerape oyapyjy jaguâ co yby iyárarâ jaguâ, oñecuameênte ichupe oñembo jeco marangatu jague rejente oyeroviáreje.
14. Jaecuera ramo iyapyjŷjarâ iyárarâ umi oñembo jecomarangatu vaecue pe Moises ñeêngue rupi, upeicharamo oñemonandí pe yerovia ja pe Ñandeyára remicuameêngue opyta reí.
15. Pe ñeê jecopegua oyepŷucá añete, ja mamo oime ŷ jápe ñeê jecopegua ndipori avei yayeyaby jaguâ.
16. Upévareje yayerovia jague rejente, yajupity icatu jaguâ Tûpâ Ñandeyára pya pôrâ guinte yajupity pe imeêmbyre reí, icatu jaguâ pe oñecuameê vaecue ichupe opyta tápiaguârâ opa umi jeŷícuerape ja na pe ñeê jecopegua rejeguape añoi, upe oyeroviavape avei oyerovia jagueicha Abraam. Upeva voí opavave ñande ru ypycue.
17. (Oyee jaicha Santa Escriturape: Jeta tetaŷgua ru ramo Che romoingo ndeve.) Upeicha voí jae ñande ru ypycue Tûpâ Ñandeyára ypype pe iyeroviajá, upe omoingovéva umi omano vaecuepe ja ojenoîva umi mbae oimeŷva umi mbae oimevaicha.
18. Ja oime ŷ ramo yepe ojaârô jaguâ, jae oyerovia jâtâ oico jaguâ jeta ybypóra rú ramo, upe oyee jagueicha ichupe: Upeicha jeta vaerâ nde reŷícuera.
19. Ja nda ipyamîrîri oyeroviajápe ja na imanduai omanovaichajá jete, ogueroguata jina voi cien años, ja ndoyepyapyi Sara ryguepy iyŷpímajá reje.
20. Ja Tûpâ Ñandeyára remicuameêngue gui noñemondyi oyeroviaŷjá gui, jâtâvente meme oyerovia ombuetevo Tûpâ Ñandeyárape.
21. Ja oguerovia jaguereje ipya apyte guive opa mbae, Jae oicuameê vaecue ipuacajá avei oyapo jaguâ jecópe,
22. upeagui avei pe iyerovia opyta ichupe jeco marangatu ramo vaicha.
23. Ja nda jesejápe añoi oñemoî Santa Escriturape pe opyta jague ichupe upeicha,
24. oyeénte ñande rejejápe avei opyta voi vaerâja ñandeveguarâ avei yayeroviáva pe omopuajaré Jesu Cristope umi omano vaecue paûgui reje.
25. Upéva oñemeê omano jaguâ ñane rembiapo vaí cue reje ja oñemoingove yeby ñañembo jecomarangatu jaguâ rejejápe.