1. E mulimuli ane fo‘i i nei mea i le nofoa‘iga a Aretaseta le tupu o Peresia, ‘ua alu a‘e ai Esera le atali‘i o Seraia, o le atali‘i ia o Asaria, o le atali‘i ia o Hilikia,
2. o le atali‘i ia o Saluma, o le atali‘i ia o Satoka, o le atali‘i ia o Akitopo,
3. o le atali‘i ia o Amaria, o le atali‘i ia o Asaria, o le atali‘i ia o Meraiota,
4. o le atali‘i ia o Serakia, o le atali‘i ia o Usi, o le atali‘i ia o Puki,
5. o le atali‘i ia o Apisua, o le atali‘i ia o Fineaso, o le atali‘i ia o Eleasaro, o le atali‘i ia o Arona le ositaulaga sili.
6. O Esera lea na alu a‘e nai Papelonia; o le tusi‘upu poto fo‘i o ia i le tulafono a Mose, na tu‘uina mai e le ALI‘I le Atua o Isaraelu; ‘ua tu‘uina mai fo‘i e le tupu ‘iā te ia ‘atoa uma mea na ia fai atu ai, e tusa ma le ‘a‘ao o le ALI‘I lona Atua na ‘iā te ia.
7. ‘Ua ō a‘e fo‘i nisi o le fānauga a Isaraelu ma nisi o le ‘au ositaulaga ma sa Levī ma ē pepese ma leoleo faitoto‘a ma ‘au‘auna o le malumalu i Ierusalema, i le fitu o tausaga o le tupu o Aretaseta.
8. ‘Ua o‘o fo‘i o ia i Ierusalema i le lima o masina o le fitu o tausaga o le tupu.
9. Auā o le aso muamua o le masina muamua na amata ai ‘ona alu a‘e o ia nai Papelonia; o le aso muamua fo‘i o le lima o masina na o‘o atu ai o ia i Ierusalema, e tusa ma le ‘a‘ao alofa o lona Atua ‘ua ‘iā te ia.
10. Auā na saunia e Esera lona loto e sā‘ili i le tulafono a le ALI‘I ma fai ai ma a‘oa‘o atu i Isaraelu i le tulafono ma fa‘amasinoga.
11. O le ata lenei o le tusi na avatua e le tupu o Aretaseta ‘iā Esera le ositaulaga le tusi‘upu, o le tusi‘upu lea i ‘upu o poloa‘iga a le ALI‘I ma ana tulafono ‘iā Isaraelu.
12. “O Aretaseta le tupu o tupu ‘iā Esera le ositaulaga, o le tusi‘upu o le tulafono a le Atua o le lagi; ‘ia ‘ato‘atoa lou manuia, ‘ua fa‘apea:
13. ‘Ou te fai atu, o i latou uma o le nu‘u o Isaraelu ma ona ositaulaga ma sa Levī, o i lo‘u mālō, o ē loto ‘ina ō, ‘ia latou ō fa‘atasi ma oe i Ierusalema.
14. ‘Ona ‘ua ‘auina oe e le tupu ma ali‘i e pule e to‘afitu ‘ua ‘iā te ia, e su‘esu‘e ‘iā Iuta ma Ierusalema, e tusa ma le tulafono a lou Atua ‘ua i ou lima.
15. ‘E te avatua fo‘i le ario ma le auro ‘ua foa‘i ma le loto e le tupu, ma ali‘i e pule ‘ua ‘iā te ia, i le Atua o Isaraelu o lē ‘ua i ai i Ierusalema lona malumalu,
16. ‘atoa ma le ario uma ma le auro ‘e te maua i le itū mālō uma o Papelonia ma mea ‘ua foa‘i ma le loto e le nu‘u ma ositaulaga, e foa‘i ma le loto mo le fale o lo latou Atua o i Ierusalema.
17. ‘Ina ‘ia matuā fa‘atali i nei tupe, o povi po‘a, o mamoe po‘a, o tama‘i mamoe, ma o latou taulaga i mea e ‘ai, ma o latou taulaga i mea e inu, ma fai taulaga a‘i i le fatafaitaulaga o i le fale o lo ‘outou Atua o i Ierusalema.
18. O le mea fo‘i e lelei ‘iā te oe ma ou uso e fai i toe o ario ma auro, ‘ia faia lea e tusa ma le finagalo o lo ‘outou Atua.
19. O ipu fo‘i ‘ua avatua ‘iā te oe e ‘au‘auna a‘i i le fale o lou Atua, ‘ia e tu‘uina atu ai i luma o le Atua o Ierusalema.
20. O isi mea fo‘i e aogā i le fale o lou Atua, ‘e te manatu i ai e avatu, ‘ia avatua nai le fale ‘oloa o le tupu.
21. “O a‘u fo‘i, o a‘u le tupu o Aretaseta, ‘ua ‘ou poloa‘i atu i tausi ‘oloa uma o i ona tala atu o le vaitafe, ‘ia matuā faia mea uma e fai atu ai ‘iā te ‘outou e Esera le ositaulaga, o le tusi‘upu o le tulafono a le Atua o le lagi,
22. e o‘o i le selau o taleni o ario, e o‘o fo‘i i le selau o kori o saito, e o‘o fo‘i i le selau o paita o uaina, e o‘o fo‘i i le selau o paita o suāu‘u, ma masima ‘ua lē tusia sona fua.
23. O mea uma ‘ua poloa‘i mai ai e le Atua o le lagi, ‘ia matuā faia mo le fale o le Atua o le lagi; auā se a ‘ea le mea e o‘o ai le to‘asā i le mālō o le tupu ma ona atali‘i?
24. ‘Ua matou fa‘ailoa atu fo‘i ‘iā te ‘outou ‘ia le ‘au ositaulaga uma, ma sa Levī, o le ‘au pepese, o le ‘au leoleo faitoto‘a, o ‘au‘auna o le malumalu ma le ‘au faigaluega i lenā fale o le Atua, ‘aua ne‘i totogi atu ‘iā te i latou ‘ia faia taulaga ma taulaga i mea ‘ese‘ese ma taulaga o ala.
25. “O oe fo‘i Esera e, ‘ia e tofia, e tusa ma le poto o lou Atua o ‘iā te oe, o fa‘amasino ma fa‘atonu, latou te fa‘atonuina atu i le nu‘u uma o i ona tala atu o le vaitafe, o i latou uma o ē iloa le tulafono a lou Atua; o i latou fo‘i o ē lē iloa, ‘ia e a‘oa‘o atu ‘iā te i latou.
26. ‘Ai so latou na te lē faia le tulafono a lou Atua ma le tulafono a le tupu, ‘ia matuā fa‘asalaina o ia, po o le oti, po o le tafia, po o se totogi ‘ia faia, pe ‘ia noanoatia.”
27. ‘Ia fa‘afetaia le ALI‘I le Atua o tatou tamā, o lē na tu‘uina mai lenei mea i le finagalo o le tupu, e fa‘amatagofie ai le fale o le ALI‘I o i Ierusalema;
28. ma na fa‘ao‘o mai le alofa ‘iā te a‘u i luma o le tupu, ma ana faipule, ma luma fo‘i o ali‘i fitafita uma o le tupu. Na fa‘amalosia fo‘i a‘u e tusa ma le ‘a‘ao o le ALI‘I lo‘u Atua na ‘iā te a‘u, ‘ua ‘ou fa‘apotopotoina fo‘i mai ‘iā Isaraelu o ali‘i matou te ō a‘e ma a‘u.#