1. ‘Ua o‘o i le masina e fitu, ‘ua i ai fo‘i le fānauga a Isaraelu i o latou ‘a‘ai, ‘ona fa‘apotopoto ai lea o le nu‘u, e pei o se tagata e to‘atasi i Ierusalema.
2. ‘Ona tutū mai lea o Iosua le atali‘i o Iosataka ma ona uso le ‘au ositaulaga ma Serupapelu le atali‘i o Salatielu ma ona uso, ‘ona latou ati a‘e lea o le fatafaitaulaga o le Atua o Isaraelu, ‘ina ‘ia fai ai i ona luga o taulaga, e pei ‘ona tusia i le tulafono a Mose le tagata o le Atua.
3. ‘Ua latou fa‘atūina le fatafaitaulaga i ona fa‘avae; auā ‘ua latou matata‘u i tagata o ia nu‘u, ‘ona latou fai taulaga ai lea i ona luga i taulaga mū i le ALI‘I; o taulaga mū i le taeao ma le afiafi.
4. ‘Ua faia fo‘i e i latou le tausamiga o fale apitaga, e pei ‘ona tusia, ma taulaga mū o lea aso ma lea aso e tusa ma le faitau, e tusa ma le tu, o le aso ma le mea e fai ai;
5. e mulimuli ane fo‘i o taulaga mū e lē aunoa e faia i masina fa‘ato‘ā va‘aia, ‘atoa ma tausamiga uma o le ALI‘I na fa‘apa‘iaina, ‘atoa ma taulaga a tagata uma ‘ua manatu i ai o latou loto e fai i le ALI‘I.
6. O le aso muamua o le masina e fitu ‘ua latou amata ai ‘ona fai taulaga mū i le ALI‘I, a o le malumalu o le ALI‘I e le‘i fa‘avaeina.
7. ‘Ua latou avatua ario i ē talai ma‘a ma tufuga ma mea e ‘ai ma mea e inu ma suāu‘u, i tagata Saitonu ma tagata Turo, latou te ‘aveifoa la‘au o arasi mai Lepanona i le sami o Iopa, e pei ‘ona pule mai ‘iā te i latou e Kuresa le tupu o Peresia.
8. O le lua o tausaga talu ‘ona latou o‘o mai i le fale o le Atua i Ierusalema, o le lua o masina, ‘ua amata ai e Serupapelu le atali‘i o Salatielu, ma Iosua le atali‘i o Iosataka ma ē ‘ua totoe o latou uso le ‘au ositaulaga ma sa Levī, ma ē ‘ua ō mai uma mai le tāfeaga i Ierusalema ma latou tofia sa Levī, e āfua i ē ‘ua luafulu o latou tausaga ma ē ‘ua matutua ai, e pule i le galuega o le fale o le ALI‘I.
9. ‘Ona tutū mai lea fa‘atasi o Iosua, o ona atali‘i ma ona uso, o Katameeli ma ona atali‘i, o le fānauga a Iuta, e pule i le faiga o le galuega o le fale o le Atua; o atali‘i o Henatati, o latou atali‘i ma o latou uso o sa Levī.
10. ‘Ua fa‘avaeina e tufuga ati fale le malumalu o le ALI‘I, ‘ona latou tofia lea o le ‘au ositaulaga ‘ua ‘o‘ofu i latou, ‘ua i ai fo‘i pū ma sa Levī o le fānauga a Asafo ‘ua i ai sumepalo, e vivi‘i atu i le ALI‘I e tusa ma le pule a Tavita le tupu o Isaraelu.
11. Sa latou pepese i vi‘iga ma fa‘afetai i le ALI‘I,“Auā e lelei o ia,auā e fa‘avavau lona alofa ‘iā Isaraelu.”‘Ona ‘alaga lea o le nu‘u uma i le ‘alaga tele i vi‘iga i le ALI‘I, ‘ona ‘ua fa‘avaeina o le fale o le ALI‘I.
12. E to‘atele o le ‘au ositaulaga ma sa Levī ma matai sili ma tagata matutua o ē na latou va‘aia le ulua‘i fale, sa fētāgisi ma le leo tele ‘ina ‘ua fa‘avaeina o lenei fale i o latou luma; e to‘atele fo‘i na ‘alalaga ‘ona o le fiafia ‘ua leo tetele.
13. ‘Ua lē iloga e le nu‘u le leo o le ‘alaga o le fiafia ma le leo o le fētāgisi auā sa ‘alalaga le nu‘u i le ‘alaga tele, ‘ua lagona atu le leo i le mea mamao.