Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10

Feagaiga Tuai

Feagaiga Fou

Esara 8 O LE TUSI PA'IA - Ekalesia Katoliko Roma (RSCB)

O le Malaga a Esera i Ierusalema

1. O i latou nei o matai sili ma le tusi gafa o i latou o ē na ō mai fa‘atasi ma a‘u a‘i Papelonia i le nofoa‘iga a le tupu o Aretaseta:

2-14. O lo le fānauga a Fineaso, o Keresona;O lo le fānauga a Itamaro, o Tanielu; o lo le fānauga a Tavita, o Hatusa.O lo le fānauga a Sakania, o lo le fānauga a Parose, o Sakaria; ma ‘ua ‘iā te ia ē ‘ua tusigafaina o tane e to‘aselau ma le to‘alimagafuluO lo le fānauga a Paka-moapi, o Elioenai le atali‘i Serakia ma ‘ua ‘iā te ia o tane to‘alua selauO lo le fānauga Sekania; o le atali‘i o Iaaseelu ma ‘ua ‘iā te ia o tane e to‘atolu selauO lo le fānauga a Atini, o Epete le atali‘i o Ionatana ma ‘ua ‘iā te ia o tane e to‘alimagafuluO lo le fānauga a Elama, o Isaia le atali‘i o Atalia ma ‘ua ‘iā te ia o tane e to‘afitugafuluO lo le fānauga a Sefatia, o Sepatia le atali‘i o Mekaeli ma ‘ua ‘iā te ia o tane e to‘avalugafuluO lo le fānauga a Ioapo, o Opetaia le atali‘i o Ikieli ma ‘ua ‘iā te ia o tane e to‘alua selau ma le to‘atinoagafulu ma le to‘avalu.O lo le fānauga a Salome, o le atali‘i o Iosefia ma ‘ua ‘iā te ia o tane e to‘aselau ma le to‘aonogafuluO lo le fānauga a Pepai, o Sakaria le atali‘i o Pekai ma ‘ua ‘iā te ia o tane e to‘aluafulu ma le to‘avaluO lo le fānauga a Asegata, o Iokana le atali‘i o Hakatana ma ‘ua ‘iā te ia o tane e to‘aselau ma le to‘asefuluO le fānauga a Atonikama, o ē na mulimuli, o latou igoa fo‘i nei, o Elipelete, o Ieielu ma Semaia ma ‘ua ‘iā te i latou o tane e to‘aonogafuluO le fānauga a Pikevai; o Utai ma Saputo ma ‘ua ‘iā te i lā‘ua o tane e to‘afitugafulu

‘Ua Tofia e Esera o sa Levī e Galulue i le Malumalu

15. ‘Ua ‘ou fa‘apotopotoina i latou i le vaitafe ‘ua tafe atu i Aava; ‘ona nonofo lea o i matou i lea mea i aso e tolu; ‘ua ‘ou su‘esu‘e fo‘i i le nu‘u ma le ‘au ositaulaga, ‘ae le‘i maua i lea mea ni o le fānauga a Levī.

16. ‘Ona ‘ou ‘a‘amiatua lea o Elisara ma Arielu ma Semaia ma Elenatana ma Iaripa, ma Elenatana ma Natano ma Sakaria ma Mesulama, o ali‘i i latou; ‘atoa ma Iaripa, ma Elenatana, o tagata popoto i lā‘ua.

17. ‘Ua ‘ou ‘a‘auina atu i latou ‘iā Itu le ali‘i i le nu‘u o Kasipeia, ‘ua ‘ou tu‘uina atu fo‘i ‘iā te i latou o ‘upu latou te fai atu ai ‘iā Itu ma ona uso o ‘au‘auna o le malumalu, na i le nu‘u o Kasipeia, ‘ia latou tu‘uina mai ‘iā te i matou ni ē ‘au‘auna i le fale o lo matou Atua.

18. ‘Ona latou tu‘uina mai lea ‘iā te i matou, e tusa ma le ‘a‘ao alofa o lo matou Atua na ‘iā te i matou, o le tagata fa‘autauta o lo le fānauga a Maali le atali‘i o Levī, o le atali‘i ia o Isaraelu; ma Serepeia, ma ona atali‘i ma ona uso, e to‘atinoagafulu ma le to‘avalu;

19. ma Hasapea ma ‘ua ‘iā te ia Isaia o lo le fānauga a Merari, o ona uso ma o latou atali‘i e to‘aluafulu;

20. ma nisi o ‘au‘auna o le malumalu o ē na tofia e Tavita ma ali‘i i le galuega a sa Levī, o ‘au‘auna o le malumalu e to‘alua selau ma le to‘aluafulu na ta‘ua i latou uma i o latou igoa.

‘Ua Tatalo Esera ma Anapogi Fa‘atasi ma Tagata

21. ‘Ona ‘ou tala‘iina lea o le anapogi i lea mea i le vaitafe o Aava ‘ia fa‘atigāina i matou e i matou i luma o lo matou Atua, o sā‘ili mai ‘iā te ia se ala tonu mo matou ma o matou tamaiti ma a matou mea uma.

22. Auā na ‘ou mā i fa‘atoga i le tupu i se ‘au ma ni ē ti‘eti‘e i solofanua e fesoasoani ‘iā i matou i ē sauā mai i le ala; auā na matou fai atu i le tupu, ‘ua fa‘apea, o le ‘a‘ao o lo matou Atua ‘ua i luga ‘iā te i latou uma o ē sā‘ili‘ili atu ‘iā te ia e lelei ai i latou; a o lona mamana ma lona to‘asā ‘ua i luga ‘iā te i latou uma o ē tu‘ua o ia.

23. ‘Ua matou anapopogi fo‘i ma sā‘ili‘ili i lo matou Atua ‘ona o lea mea ma ‘ua fa‘afofoga mai ai o ia ‘iā te i matou.

O Mea Alofa mo le Malumalu

24. ‘Ona ‘ou vavae‘eseina lea ni ali‘i o le ‘au ositaulaga e to‘asefulu ma le to‘alua, o Serepeia, ma Hasapea ma ‘ua ‘iā te i lā‘ua ni o latou uso e to‘atinoagafulu.

25. ‘Ona ‘ou fuatia lea ‘iā te i latou o le ario ma le auro ma ipu, o taulaga i le fale o lo matou Atua na faia e le tupu ma ana faipule ma ali‘i ‘ua ‘iā te ia ma Isaraelu uma o ē na i ai i lea mea;

26. na ‘ou fuatia i o latou lima o taleni o ario e ono selau ma le limagafulu ma taleni e selau o ipu ario ma taleni o auro e selau;

27. o ipu auro fo‘i e luafulu, e afe o tareki ia; ma ipu ‘apamemea pupula e lelei e lua e tāua e tusa ma auro.

28. ‘Ona ‘ou fai atu lea ‘iā te i latou, “‘Ua pa‘ia ‘outou mo le ALI‘I; ‘ua pa‘ia fo‘i ipu; o le ario fo‘i ma le auro o le taulaga lea ‘ua fai ma le loto i le ALI‘I le Atua o ‘outou tamā.

29. ‘Ia ‘outou mataala ma tausi i ai se‘ia ‘outou fuaina atu ai i luma o ali‘i o le ‘au ositaulaga ma sa Levī ma matai sili o Isaraelu, i Ierusalema, i potu o le fale o le ALI‘I.”

30. ‘Ona talia lea e le ‘au ositaulaga ma sa Levī o le fua o le ario ma le auro ma ipu, e fa‘ao‘o ai i Ierusalema i le fale o lo matou Atua.

O le Toe Fo‘i atu i Ierusalema

31. ‘Ona matou ō ai lea nai le vaitafe o Aava i le aso e sefulu ma le lua o le masina muamua, o le a ō i Ierusalema; na i ai le ‘a‘ao o lo matou Atua i luga ‘iā te i matou ma ‘ua ia lavea‘iina i matou a‘i lima o ē sauā ma ē lamalama mai i le ala.

32. ‘Ua matou o‘o fo‘i i Ierusalema ma nonofo ai i aso e tolu.

33. O le fa o aso fo‘i na fuaina ai le ario ma le auro ma ipu i le fale o lo matou Atua i le lima o Meremota le atali‘i o Uria le ositaulaga, ‘ua ‘iā te ia fo‘i Eleasaro le atali‘i o Fineaso; ‘ua fa‘atasi fo‘i ma i lā‘ua o Iosapata le atali‘i o Iosua ma Noateia le atali‘i o Pinui o sa Levī i lā‘ua.

34. ‘Ua faitauina ma fuatia ia mea uma ma ‘ua tusia le fua o ia mea uma i lea lava aso.

35. O ē na ō mai mai le tāfeaga, o tagata na ‘aunu‘ua, na latou osia taulaga mū i le Atua o Isaraelu, o povi po‘a e sefulu ma le lua mo Isaraelu uma ma mamoe po‘a e ivagafulu ma le ono ma tama‘i mamoe e fitugafulu ma le fitu ma ‘oti po‘a e sefulu ma le lua, o le taulaga mo le agasala; o ia mea uma o taulaga mū i le ALI‘I.

36. ‘Ua latou tu‘uina atu fo‘i le poloa‘iga a le tupu i ali‘i sili na tofia e le tupu ma ali‘i e pule i ona tala mai o le vaitafe, ‘ona latou fesoasoani lea i le nu‘u ma le fale o le Atua.#