Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10

Feagaiga Tuai

Feagaiga Fou

Esara 9 O LE TUSI PA'IA - Ekalesia Katoliko Roma (RSCB)

O le Feavaga a‘i o Tagata o Isaraelu ma Nu‘u ‘Ese

1. ‘Ua uma nei mea, ‘ona ō mai lea ‘iā te a‘u o ali‘i, ‘ua fa‘apea mai, “O le nu‘u o Isaraelu ma le ‘au ositaulaga ma sa Levī, ‘ua latou lē vavaeina i latou a‘i tagata o nu‘u ‘ese, a o lo‘o fai e tusa ma a latou mea e ‘inosia, o sa Kananā, o sa Hetī, o sa Perisē, o sa Iepusē, o sa Amonī, o sa Moapī, o tagata Aikupito ma sa Amorī.

2. Auā ‘ua latou fai avā i o latou afafine, o i latou ‘atoa ma o latou atali‘i ma ‘ua fefiloi le fānau pa‘ia ma tagata o ia nu‘u, ma ‘ua solomua i ali‘i ma faipule i lenei agasala.”

3. ‘Ua ‘ou fa‘alogo i lenei mea, ‘ona ‘ou saeia lea o lo‘u ‘ofu ma lo‘u ‘ofu talaloa, ma ‘ou futi ‘ou lauulu ma la‘u ‘ava, ma ‘ou nofo i lalo ‘ua segia lo‘u mauli.

4. ‘Ona potopoto mai ai lea ‘iā te a‘u o i latou uma na matata‘u i afioga a le Atua o Isaraelu, ‘ona o le agasala a le tāfeaga; ‘ua ‘ou nofo fo‘i ‘ua segia lo‘u mauli, ‘ua o‘o i le taulaga o le afiafi.

O le Tatalo a Esera

5. ‘Ua o‘o i le taulaga o le afiafi, ‘ona ‘ou tula‘i lea ai lo‘u tigā, ‘ua saeia lo‘u ‘ofu, ma lo‘u ‘ofu talaloa, ma ‘ua ‘ou to‘otuli i o‘u tulivae, ma fa‘aloaloa atu o‘u lima i le ALI‘I lo‘u Atua,

6. ma ‘ou fa‘apea atu,“Lo‘u Atua e, ‘ua ‘ou mā, ma ‘ou māsiasi i tepa a‘e o‘u mata ‘iā te oe, lo‘u Atua e; auā ‘ua tele lo matou leaga ‘ua o‘o i luga o matou ulu, ma ‘ua tupu tele la matou agasala ‘ua o‘o lava i le lagi.

7. Talu ona po o matou tamā ‘ua ‘iā i matou le agasala tele ‘ua o‘o i le aso nei; ‘ona o lo matou leaga fo‘i ‘ua tu‘uina ai matou, o matou tupu, ma a matou ositaulaga, i lima o tupu o ia nu‘u, i le pelu, ‘ia tafia, ma ‘ia vetea, ma ‘ia māsiasi, e pei ‘ona fai i le aso nei.

8. A o nei ona po, e pei o se ‘emo itiiti, ‘ua ‘iā te i matou le alofa mai i le ALI‘I lo matou Atua, ‘ina ‘ia fa‘atoeina ‘iā te i matou o ē ‘ua sao, ma ‘ia tu‘uina mai ‘iā te i matou se fao i lana mea pa‘ia, e fa‘amalamalamaina ai o matou mata e lo matou Atua, e tu‘uina mai ai fo‘i se olataga itiiti ‘ina o fai i matou ma pologa.

9. Auā o pologa i matou, a ‘ua lē tia‘iina i matou e lo matou Atua ‘ina o fai i matou ma pologa, a ‘ua ia fa‘ao‘o ‘iā te i matou le alofa i luma o tupu o Peresia, ‘ia tu‘uina mai ‘iā te i matou le olataga, ‘ia fa‘atūina le fale o lo matou Atua, ma ‘ia teuteuina mea o i ai ‘ua lepetia, ma ‘ia tu‘uina mai ‘iā te i matou le pā i Iuta ma Ierusalema.

10. “O lenei, lo matou Atua e, se a ‘ea la matou e fai atu ai ‘ina ‘ua e faia na mea? Auā ‘ua tu‘ua e i matou au poloa‘iga,

11. na e poloa‘i mai ai i au ‘au‘auna le ‘au perofeta, ‘ua fa‘apea mai, ‘O le nu‘u tou te ō i ai e fai mo ‘outou o le nu‘u lea ‘ua leaga i le leaga o tagata o ia nu‘u, ‘iā latou mea e ‘inosia ‘ua tūtūmu ai i lea itū ma lea itū i lo latou leaga.

12. O lenei, ‘aua tou te avatua o ‘outou afafine i o latou atali‘i, ‘aua fo‘i tou te ‘aumaia o latou afafine ma o ‘outou atali‘i, ‘aua fo‘i tou te sā‘ilia e fa‘avavau se mea e filemū ai i latou pe manuia ai i latou; ‘ina ‘ia malolosi ai ‘outou, ma ‘ia ‘outou ‘a‘ai ai i mea lelei o i le lau‘ele‘ele, ma fai ai mo ‘outou atali‘i e fa‘avavau.’

13. ‘Ua uma ‘ona o‘o mai o nei mea uma ‘iā te i matou ‘ona o a matou amio leaga, ma la matou agasala tele, auā o oe lo matou Atua e, ‘ua e lavea‘i mai ‘ua lē faia e tusa ma lo matou leaga, ma ‘ua e fa‘asaoina i matou fa‘apenei;

14. a toe solia e i matou au poloa‘iga, ma feavaga a‘i ma tagata e fai ia mea e ‘inosia, ‘e te lē to‘asā mai ai ‘ea ‘iā te i matou se‘ia fa‘aumatia i matou, ‘ina ‘ia leai ni ē totoe pe fa‘asaoina?

15. Le ALI‘I e, le Atua o Isaraelu, o oe o le amiotonu; auā ‘ua fa‘atotoeina i matou, ‘ua fa‘asaoina, e pei ‘ona fai i le aso nei; fa‘auta, o i ou luma i matou ma a matou agasala auā e lē mafai ‘ona tutū i matou i ou luma ‘ona o lenei mea.”#