1. ‘Ona poloa‘i atu lea o Tariu le tupu, ‘ona latou su‘esu‘e lea i le fale tusi na tu‘uina ai ‘oloa i Papelonia.
2. ‘Ona maua lea i Akemeta i le ‘olo o i le itū mālō o Metai le tusi ta‘ai: “‘Ua fa‘apea fo‘i ‘ona tusia i ona totonu le ‘upu o fa‘amanatu ai.
3. O le tausaga muamua o Kuresa le tupu ‘ua poloa‘i atu ai Kuresa le tupu i le fale o le Atua i Ierusalema, ‘Ia faia le fale, o le mea na latou fai ai taulaga ma ‘ia atiina a‘e ona fa‘avae; e onogafulu o kupita lona maualuga, e onogafulu o kupita lona lautele;
4. e tolu atu ma‘a tetele ma le atu la‘au fou; ma ‘ia avatua le totogi a‘i le fale o le tupu.
5. O mea fo‘i o auro ma ario o le fale o le Atua na ‘avea e Nepukanesa a‘i le malumalu o Ierusalema, na na ‘aumai fo‘i i Papelonia, ‘ia toe avatua ma ‘ia tu‘u atu i le malumalu o i Ierusalema, e ta‘itasi le mea ma tau i le mea e tu‘u ai i le fale o le Atua.”
6. O lenei,“Tatenai e, le ali‘i e pule i ona tala atu o le vaitafe; Setara-posenai e, ma ē pule fa‘atasi ma ‘oulua, o tagata o Afareseka o i ona tala atu o le vaitafe.‘Ia taumamao ‘outou ma lenā mea;
7. tu‘u pea ia le galuega o lenā fale o le Atua; ‘ia faia lenā fale o le Atua i lona tulaga tuai e le ali‘i e pule i tagata o Iuta ma toeaina o Iuta.
8. ‘Ou te fai atu fo‘i i mea tou te faia i toeaina o Iuta e fai ai lenā fale o le Atua, ‘ia vave fo‘i ‘ona avatua i na tagata ‘oloa a le tupu, o taulaga fo‘i ia i ona tala atu o le vaitafe, e totogi ai le galuega ‘ina ‘ia lē tu‘ua e i latou le galuega.
9. O mea fo‘i e tatau ‘iā i latou, o povi ta‘anoa ma mamoe po‘a ma tama‘i mamoe, e fai ma taulaga mū i le Atua o le lagi, o saito, o masima, o uaina ma suāu‘u, e pei ‘ona fai mai ai o ositaulaga o i Ierusalema, ‘ia tu‘uina atu ai ‘iā te i latou i lea aso ma lea aso, ‘aua ne‘i fa‘atamala.
10. ‘Ina ‘ia latou faitaulaga ai i mea manogi i le Atua o le lagi ma tatalo ‘ia ola le tupu ma ona atali‘i.
11. ‘Ua ‘ou poloa‘i atu fo‘i, ‘ai se tagata na te liua lenei ‘upu, ‘ia tōina se la‘au a‘i lona fale, ‘ia si‘itia fo‘i o ia ma ia fa‘amauina i ona luga; ‘ia fai fo‘i lona fale ma fa‘atafunaga ‘ona o lea mea.
12. O le Atua fo‘i o lē na fa‘atumauina lona suafa i lea mea, ‘ia lafo i lalo e ia ‘atoa uma tupu ma nu‘u, o ē fa‘aloaloa o latou lima e liliu ma fa‘atauma‘oi lenei fale o le Atua o i Ierusalema. O a‘u o Tariu ‘ua ‘ou poloa‘i atu; ‘ia matuā faia lava.”
13. ‘Ona vave faia lea e Tatenai o le ali‘i e pule i ona tala mai o le vaitafe, o Setara-posenai ma ē pule fa‘atasi ma i lā‘ua e pei o le fe‘au mai le tupu o Tariu.
14. ‘Ona fai lea e toeaina o Iuta o le fale, ‘ua manuia fo‘i ‘ona o le perofeta ane a Hakai le perofeta ma Sakaria le atali‘i o Ito. Sa latou faia le fale ma fa‘aumaina ai, e tusa ma le poloa‘iga a le Atua o Isaraelu, ma le poloa‘iga a Kuresa ma Tariu ma Aretaseta le tupu o Peresia.
15. ‘Ua fa‘aumaina lenei fale i le aso tolu o le masina o Atara, o le ono lea o tausaga o le nofoa‘iga a le tupu o Tariu.
16. ‘Ua faia le fa‘aulufalega o lenei fale o le Atua ma le fiafia e le fānauga a Isaraelu, o ositaulaga ma sa Levī ma tagata uma o le tāfeaga.
17. ‘Ua latou fai taulaga fo‘i i le fa‘aulufalega o lenei fale o le Atua, o povi po‘a e selau, o mamoe po‘a e lua selau ma tama‘i mamoe e fa selau ma ‘oti po‘a e fai ma taulaga mo le agasala ‘ona o Isaraelu uma e sefulu ma le lua ia, e tusa ma le faitau o itū‘āiga o Isaraelu.
18. ‘Ua latou tofia ositaulaga i o latou vasega ma sa Levī, i o latou vasega, e fai ai le galuega a le Atua o i Ierusalema, e pei ‘ona tusia i le tusi a Mose.
19. ‘Ua faia e tagata o le tāfeaga le paseka i le aso e sefulu ma le fa o le ulua‘i masina.
20. Auā sa fa‘amamāina fa‘atasi le ‘au ositaulaga ma sa Levī, ‘ua mamā i latou uma, ‘ua latou fasi fo‘i le tama‘i mamoe o le paseka mo tagata uma o le tāfeaga, ma o latou uso o le ‘au ositaulaga, ‘atoa ma i latou lava.
21. ‘Ua ‘a‘ai ai fo‘i le fānauga a Isaraelu o ē na fo‘i mai i le tāfeaga, ma i latou uma o ē na vavae mai ‘iā te i latou a‘i le leaga o tagata ‘ese o i le nu‘u, e sā‘ili atu ai i le ALI‘I le Atua o Isaraelu;
22. ma latou faia le tausamiga o areto e lē fa‘afefeteina i aso e fitu ma le fiafia; auā sa fa‘afiafiaina i latou e le ALI‘I, na ia liliu fo‘i le loto o le tupu o Asuria ‘iā te i latou e fa‘amalolosi ai o latou lima i le faiga o le fale o le Atua, o le Atua o Isaraelu.#