1. Nagpakasala na usab batok sa Ginoo ang mga Israelita busa gitugot niya nga harian sila sa mga Midianhon sulod sa pito ka tuig.
2. Ang mga Midianhon mas gamhanan kay sa mga Israelita. Tungod niini nanago ang mga Israelita sa mga langub ug sa ubang dapit sa kabungtoran.
3. Inigpananom sa mga Israelita, sulongon sila sa mga Midianhon, sa mga Amalekanhon ug sa mga tribo nga taga-diserto.
4. Kining mga kaaway sa mga Israelita magkampo sa yuta sa Israel ug laglagon nila ang mga anihon hangtod sa Gaza. Wala silay ibilin nga kabuhian sa mga Israelita bisan ganig karnero, baka o asno.
5. Mangabot sila uban sa ilang mga baka ug tolda sama ka baga sa mga dulon. Sila ug ang ilang mga kamelyo dili maihap. Dako kaayong kadaot ang ilang nahimo
6. ug walay nahimo ang Israel batok kanila. Unya ang katawhan sa Israel mituaw sa Ginoo aron sa pagpakitabang.
7. Sa dihang mituaw ang mga Israelita ngadto sa Ginoo aron sa pagpakitabang batok sa mga Midianhon,
8. ang Ginoo nga Dios sa Israel nagpadala kanilag propeta aron pagsulti kanila niini: “Gikuha ko kamo gikan sa kaulipnan sa Ehipto.
9. Giluwas ko kamo gikan sa mga Ehiptohanon ug sa inyong mga kaaway dinhi. Giabog ko sila sa dihang nangabot kamo ug gihatag ko kaninyo ang ilang yuta.
10. Giingnan ko kamo nga ako mao ang Ginoo nga inyong Dios ug nga kinahanglang dili kamo magsimba sa mga diosdios sa mga Amorihanon nga maoy tag-iya sa yuta nga inyo karong gipuy-an. Apan wala kamo magpatalinghog kanako.”
11. Unya ang anghel sa Ginoo miadto sa balangay sa Ofra ug milingkod tungod sa kahoyng tugas nga iya ni Joas nga sakop sa banay ni Abieser. Si Gideon nga anak ni Joas naggiok ug trigo didto sa usa ka pug-anan sa bino aron dili siya makita sa mga Midianhon.
12. Unya nagpakita kaniya ang anghel sa Ginoo ug miingon, “Ang Ginoo nag-uban kanimo, isog ug kusgan nga tawo.”
13. Si Gideon miingon kaniya, “Nag-uban kanamo? Nganong nahitabo man kini kanamo kon nag-uban pa kanamo ang Ginoo? Hain na man ang mga milagro nga matod pa sa among mga ginikanan gibuhat sa Ginoo labi na kadtong pagkuha niya kanila gikan sa Ehipto? Gibiyaan kami sa Ginoo ug gitugyan ngadto sa mga Midianhon.”
14. Unya giingnan siya sa Ginoo, “Lakaw ug gamita ang tibuok mong kusog ug luwasa ang Israel gikan sa mga Midianhon. Ako mao ang nagsugo kanimo.”
15. Ug mitubag siya, “Apan, Ginoo, unsaon ko man pagluwas ang Israel? Ang akong panimalay mao ang labing mahuyang sa banay ni Manases ug ako ang labing ubos nga sakop sa akong pamilya.”
16. Ug ang Ginoo miingon kaniya, “Mahimo mo kini kay tabangan ko man ikaw. Mabuntog mo ang mga Midianhon sa labing sayon nga paagi sama nga usa ra sila ka tawo.”
17. Si Gideon mitubag, “Kon nahimuot ka kanako hatagi akog timailhan nga ikaw gayod maoy nagsulti.
18. Palihog ayaw paglakaw hangtod kadalitan ko ikaw ug pagkaon.”Siya miingon, “Magpabilin ako hangtod nga mahibalik ka.”
19. Unya si Gideon misulod sa iyang balay, naghikay ug nating kanding ug naghimog pan gikan sa mga 10 ka kilo nga harina nga walay patubo. Gisulod niya sa basket ang karne ug sa kulon ang sabaw ug gidala niya ngadto sa anghel nga didto tungod sa kahoy nga tugas ug gidalit kini kaniya.
20. Unya giingnan siya sa anghel, “Ibutang niining batoha ang karne ug ang pan ug ibubo niini ang sabaw.” Ug gibuhat kini ni Gideon.
21. Gikuhit sa anghel ang karne ug ang pan pinaagi sa tumoy sa lipak nga gikuptan niya. Migula ang kalayo gikan sa bato ug misunog sa karne ug sa pan. Unya nahanaw ang anghel.
22. Unya mituo si Gideon nga anghel sa Ginoo ang nakita niya ug tungod sa kahadlok miingon siya, “O Ginoong Dios, nakita ug gikaatubang ko ang imong anghel!”
23. Apan giingnan siya sa Ginoo, “Ayaw kalisang. Dili ka mamatay.”
24. Nagtukod si Gideon didto ug halaran alang sa Ginoo ug ginganlan niya kinig “Ang Ginoo mao ang pakigdait.” (Hangtod karon ang halaran anaa gihapon sa Ofra nga iya sa banay ni Abieser.)
25. Nianang gabhiona ang Ginoo miingon kaniya, “Kuhaa ang torong baka sa imong amahan ug laing torong baka nga pito ka tuig ang kagulangon. Gub-a ang halaran sa imong amahan nga alang kang Baal ug putla ang tukon ni Asera nga tupad niini.
26. Pagtukod ug halaran alang sa Ginoo nga imong Dios ibabaw niining bungtod. Unya kuhaa ang ikaduhang torong baka ug sunoga kini ingon nga halad ug maoy gamita nga sugnod ang tukon ni Asera nga imong giputol.”
27. Busa nagdala si Gideon ug napulo ka sulugoon ug gibuhat niya ang gisugo sa Ginoo kaniya. Nahadlok siya pag-ayo sa iyang pamilya ug sa katawhan sa lungsod sa pagbuhat niini sa panahon sa adlaw busa gibuhat niya kini sa gabii.
28. Sayo sa buntag sa pagmata sa mga tawo sa lungsod, nakita nila nga naguba na ang halaran alang kang Baal ug ang tukon ni Asera. Nakita usab nila ang ikaduhang torong baka nga gisunog ibabaw sa halaran nga gipuli pagtukod didto.
29. Nagpangutan-anay sila, “Kinsa bay nagbuhat niini?” Gisusi nila kini ug nasayran nila nga si Gideon nga anak ni Joas maoy nagbuhat niini.
30. Unya giingnan nila si Joas, “Dad-a ngari ang imong anak aron among patyon! Giguba niya ang halaran alang kang Baal ug giputol ang tukon ni Asera nga tupad niini.”
31. Apan giingnan ni Joas ang tanan nga miatubang kaniya, “Molaban ba kamo kang Baal? Bisan kinsa nga molaban kaniya patyon sa dili pa mabuntag. Kon dios si Baal, siya maoy manalipod sa iyang kaugalingon. Halaran niya kining giguba.”
32. Sukad niadto si Gideon naila nga si Jerubaal tungod kay miingon man si Joas, “Si Baal maoy manalipod sa iyang kaugalingon. Halaran niya kining giguba.”
33. Unya ang tanang mga Midianhon, ang mga Amalekanhon ug ang mga katawhan sa kamingawan nagtigom unya nanabok sa Suba sa Jordan ug nagkampo sa Patag sa Jezreel.
34. Unya si Gideon gigamhan sa espiritu sa Ginoo. Gipatingog niya ang budyong nga sungay sa laking karnero aron pagtawag sa mga sakop sa banay ni Abieser aron pagsunod kaniya.
35. Nagpadala siyag mga mensahe sa tibuok kayutaan sa banay ni Manases aron pag-awhag kanila pagsunod kaniya. Nagsugo siyag mga mensahero ngadto sa mga banay ni Aser, ni Zabulon ug ni Neftali ug nangadto usab sila aron pagtipon kaniya.
36. Unya si Gideon miingon sa Dios, “Nagsulti ka nga gamiton mo ako pagluwas sa Israel.
37. Kon mao kana, magbutang akog balhibo sa karnero diha sa yuta nga among giukanag trigo. Kon sa pagkabuntag may yamog ang balhibo sa karnero apan uga ang yuta, masayran ko nga tinuod gayod nga luwason mo ang Israel pinaagi kanako.”
38. Ug mao gayod kini ang nahitabo. Sayong mibangon si Gideon pagkabuntag, gilubag niya ang balhibo ug nakapuga siyag tubig nga igong makapuno ug panaksan.
39. Unya si Gideon miingon sa Dios, “Ayaw kasuko kanako. Pasultiha pa akog kausa. Tugoti ako nga sulayan ko kini pag-usab. Paugha ang balhibo ug diha lamang sa yuta ang yamog.”
40. Niadtong gabhiona gibuhat kini sa Dios. Ang balhibo lamang ang uga apan ang yuta nahumod sa yamog.