1. Ang mga taga-Efraim nagtigom ug nanabok sa Suba sa Jordan ngadto sa Zafron ug giingnan nila si Jefta, “Nganong wala mo man kami pakuyoga sa inyong pagtabok aron sa pagpakig-away sa mga Amonihanon? Iapil ka namo pagsunog sa imong balay.”
2. Apan miingon si Jefta kanila, “Ang akong katawhan ug ang mga Amonihanon may gikabangian. Gitawag ko kamo apan wala kamo manumbaling.
3. Sa pagkasayod ko nga dili kamo motabang kanako sa pagpakiggubat kanila, nangahas ako pag-asdang sa mga Amonihanon ug ang Ginoo mihatag kanakog kadaogan. Karon, nganong nanganhi man kamo aron makig-away kanako?”
4. Unya gitigom ni Jefta ang tanang mga lumolupyo sa Gilead ug nakiggubat sila sa Efraim ug nabuntog nila kini. (Kay ang katawhan sa Efraim miingon man, “Kamong mga taga-Gilead nga namuyo sa Efraim ug Manases, namiya kamo sa Efraim!”)
5. Giilog sa mga taga-Gilead ang mga dapit diin mahimo nga tabokon ang Jordan aron dili na makatabok ang taga-Efraim. Kon may taga-Efraim nga mosulay paglayas ug mananghid nga motabok, ang mga tawo sa Gilead mangutana, “Taga-Efraim ka ba?” Kon moingon siya, “Dili,”
6. pasultihon nila siya ug “Shibbolet”. Apan kon moingon siya, “Sibbolet” kay dili man siya hustong makalitok niini, patyon nila siya sa tabokanan sa Suba sa Jordan. Niadtong panahona, 42,000 ka taga-Efraim ang napatay.
7. Si Jefta nahimong maghuhukom sa Israel sulod sa unom ka tuig. Unya namatay siya ug gilubong didto sa iyang lungsod sa Gilead.
8. Human kang Jefta, si Ibzan nga taga-Betlehem maoy nahimong maghuhukom sa Israel.
9. May 30 siya ka anak nga lalaki ug may 30 usab siya ka anak nga babaye. Giminyo niya silang tanan sa dili mga sakop sa iyang banay. Si Ibzan nangulo sa Israel sulod sa pito ka tuig,
10. unya namatay siya ug gilubong sa Betlehem.
11. Human kang Ibzan, si Elon nga taga-Zabulon maoy mipuli sa pagkamaghuhukom sa Israel sulod sa napulo ka tuig.
12. Unya namatay siya ug gilubong sa Ayalon sa yuta ni Zabulon.
13. Human kang Elon, si Abdon nga anak ni Ilel sa Faraton maoy nangulo sa Israel.
14. May 40 siya ka anak nga lalaki ug 30 ka apong lalaki nga nagsakay sa 70 ka asno. Si Abdon nahimong maghuhukom sa Israel sulod sa walo ka tuig.
15. Unya namatay siya ug gilubong didto sa Faraton sa yuta sa Efraim didto sa kabungtoran sa mga Amalekanhon.