1. Ang anghel sa Ginoo miadto sa Boquim gikan sa Gilgal ug giingnan niya ang mga Israelita, “Gikuha ko kamo gikan sa Ehipto ug gidala ngadto sa yuta nga gisaad ko sa inyong mga katigulangan. Miingon ako, ‘Tumanon ko gayod ang kasabotan ko kaninyo.
2. Ayaw kamo paghimog kasabotan sa katawhan nga nagpuyo niining yutaa. Kinahanglan nga gun-obon ninyo ang ilang mga halaran.’ Apan wala ninyo tumana ang gisugo ko kaninyo. Tan-awa unsa hinuon ang inyong gibuhat?
3. Busa sultihan ko kamo karon nga dili ko abugon kining katawhan samtang modasdas kamo. Mahimo silang mga kaaway ninyo ug ang mga diosdios nila mahimong lit-ag alang kaninyo.”
4. Sa pagsulti niini sa anghel, mihilak ang tanang katawhan sa Israel.
5. Tungod niini, ginganlag Boquim ang maong dapit. Didto naghalad silag mga mananap nga ilang gisunog ngadto sa Ginoo.
6. Unya gipalakaw ni Josue ang katawhan ug ang tagsatagsa kanila miadto aron pagpanag-iya sa ilang bahin nga yuta.
7. Ang katawhan sa Israel mialagad sa Ginoo samtang buhi pa si Josue ug human mamatay si Josue nagpadayon sila sa pag-alagad sa Ginoo samtang buhi pa ang mga pangulo nga nasayod sa tanan nga gibuhat sa Ginoo alang sa Israel.
8. Ang alagad sa Ginoo nga si Josue, anak ni Nun, namatay sa panuigong 110.
9. Gilubong siya didto sa iyang bahin nga yuta sa Timnatsera sa kabungtoran sa Efraim, amihanan sa Bukid sa Gaas.
10. Kadtong tibuok nga kaliwatan nangamatay usab ug ang sunod nga kaliwatan wala makaila sa Ginoo o sa mga butang nga gibuhat niya alang sa Israel.
11. Unya ang katawhan sa Israel nagpakasala batok sa Ginoo ug mialagad sa mga Baal.
12. Mihunong sila pagsimba sa Ginoo, ang Dios sa ilang katigulangan nga maoy nagkuha kanila gikan sa Ehipto. Nagsugod sila pagsimba sa laing mga diosdios, ang mga dios sa katawhan nga naglibot kanila. Misimba sila sa maong mga diosdios ug nakapasuko kini sa Ginoo.
13. Mihunong sila pagsimba sa Ginoo ug mialagad sa mga Baal ug sa mga Astarte.
14. Ang Ginoo nasuko pag-ayo sa Israel ug mitugot nga sulongon ug tulison sila sa mga kaaway. Gitugotan niya ang tanang kaaway sa pagbuntog kanila busa ang mga Israelita wala na makapanalipod sa ilang kaugalingon.
15. Sa matag panahon nga makiggubat sila, ang Ginoo nakigbatok kanila sumala sa gipasidaan niya kanila. Nagkalisodlisod gayod sila pag-ayo.
16. Unya ang Ginoo naghatag sa Israel ug mga maghuhukom nga maoy nagluwas kanila gikan sa mga kaaway.
17. Apan wala sila mosunod sa maong mga maghuhukom. Wala sila magmatinumanon sa Ginoo ug gisimba nila ang mga diosdios. Gituman sa ilang katigulangan ang mga sugo sa Ginoo apan kining kaliwatana wala na magpadayon sa pag-alagad sa Ginoo.
18. Inighatag sa Ginoo kanilag maghuhukom, tabangan sa Ginoo ang maghuhukom ug luwason niya ang katawhan gikan sa ilang mga kaaway samtang buhi pa ang maong maghuhukom. Ang Ginoo naluoy kanila kay nag-agulo man sila tungod sa ilang pag-antos ug pagkadinaugdaog.
19. Apan inigkamatay sa maghuhukom, mamalik na usab ang katawhan sa naandan nilang paagi sa pagkinabuhi ug labi pang ngil-ad ang buhaton nila kay sa kaliwatan nga gisundan nila. Simbahon nila ang laing mga dios ug nagdumili sila pagbiya sa ilang daotan ug masupilong kinabuhi.
20. Nasuko pag-ayo ang Ginoo sa Israel ug miingon, “Gilapas niining maong katawhan ang kasabotan nga gipatuman ko sa ilang mga katigulangan. Tungod kay wala man sila mosunod kanako,
21. dili ko na abugon ang mga nasod nga nahibilin pa sa pagkamatay ni Josue.
22. Niining paagiha maila ko kon motuman ba o dili ang mga Israelita sa akong sugo sama sa gibuhat sa ilang mga katigulangan.”
23. Busa gipasagdan sa Ginoo nga magpabilin ang mga nasod nga wala mabuntog ni Josue. Wala dayon niya abuga sila.