Kapitulo

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21

Daang Tugon

Bag-ong Tugon

Mga Maghuhukom 1 Ang Bag-ong Maayong Balita Biblia (RCPV)

Si Adonibezec Gibuntog sa mga Banay ni Juda ug ni Simeon

1. Human mamatay si Josue, ang katawhan sa Israel nagpakisayod sa Ginoo kon kinsa sa ilang mga banay ang mouna pagsulong sa mga Canaanhon.

2. Mitubag ang Ginoo, “Ang banay ni Juda maoy mouna kay gitugyan ko na kanila ang yuta.”

3. Ang banay ni Juda miingon sa banay ni Simeon, “Ubani kami sa kayutaan nga gigahin alang kanamo ug maghiusa kita sa pagpakiggubat sa mga Canaanhon. Unya mokuyog usab kami kaninyo sa kayutaan nga gigahin alang kaninyo.” Busa ang mga banay ni Simeon

4. ug ni Juda nag-uban ngadto sa panggubatan. Pinaagi sa tabang sa Ginoo gibuntog nila ang mga Canaanhon ug ang mga Perisihanon ug gibuntog nila ang 10,000 ka tawo didto sa Bezec.

5. Naabtan nila didto si Adonibezec ug nakiggubat sila kaniya.

6. Midagan si Adonibezec apan naapsan nila siya, gidakop ug giputol nila ang iyang mga kumagko sa kamot ug tiil.

7. Miingon si Adonibezec, “Kaniadto 70 ka hari nga giputlan nako sa ilang mga kumagko sa kamot ug tiil ang namunit ug mga mumho ilalom sa akong lamisa. Karon gibuhat sa Dios kanako ang gibuhat ko kanila.” Gidala nila si Adonibezec ngadto sa Jerusalem ug didto namatay siya.

Gibuntog sa Banay ni Juda ang Jerusalem ug Hebron

8. Giataki sa banay ni Juda ang Jerusalem ug nailog nila kini. Gipatay nila ang katawhan niini ug gisunog ang siyudad.

9. Human niini nakiggubat sila sa mga Canaanhon nga namuyo sa kabungtoran, kapatagan ug sa Negeb.

10. Ang banay ni Juda midasdas sa mga Canaanhon nga namuyo sa siyudad sa Hebron nga kaniadto ginganlag siyudad sa Arba. Gibuntog nila ang kabanayan ni Sesai, Ahiman ug Talmai.

Gibuntog ni Otniel ang Siyudad sa Dabir

11. Gikan didto gisulong sa banay ni Juda ang siyudad sa Dabir nga kaniadto ginganlag siyudad sa Sefer.

12. Mipahibalo si Caleb, “Ipaasawa ko ang akong anak nga si Acsa sa lalaki nga makabuntog sa siyudad sa Sefer.”

13. Si Otniel nga anak sa manghod ni Caleb nga si Kenes maoy nakabuntog sa siyudad. Busa gipaasawa ni Caleb kang Otniel ang iyang anak nga si Acsa.

14. Sa dihang naminyo na sila gihangyo ni Otniel si Acsa sa pagpangayog uma sa iyang amahan. Busa giadto ni Acsa si Caleb ug sa pagkanaog niya gikan sa iyang asno, nangutana si Caleb kon unsay tuyo sa iyang anak.

15. Mitubag siya, “Hatagi akog gasa. Kay adto mo man ako papuy-a sa Negeb, hatagi usab akog mga tubod.” Busa gihatag ni Caleb kaniya ang mga tubod sa bungtod ug sa kapatagan.

Ang mga Kadaogan sa Banay ni Juda ug ni Benjamin

16. Ang mga Kenihanon nga kaliwat sa ugangan ni Moises nanungas uban sa katawhan sa Juda gikan sa siyudad sa mga palmera ngadto sa kamingawan sa Judea sa habagatan sa Arad. Namuyo sila didto uban sa mga Amalekanhon.

17. Ang katawhan ni Juda mikuyog sa katawhan ni Simeon. Gibuntog nila ang mga Canaanhon sa siyudad sa Sefat ug gigun-ob nila kini sa hingpit. Gihatagan nila kinig laing ngalan nga Horma.

18. Giataki nila ang Gaza, Ascalon ug Ekron uban sa naglibot nilang kayutaan.

19. Gitabangan sa Ginoo ang katawhan sa Juda ug napanag-iya nila ang kabungtoran. Apan wala sila makabuntog sa katawhan nga nagpuyo sa daplin sa kabaybayonan tungod kay kining mga tawhana may mga karwahi nga gigamitan ug puthaw.

20. Sumala sa sugo ni Moises, ang Hebron gihatag kang Caleb. Giabog niya ang tulo ka banay nga kaliwat ni Anac.

21. Apan wala abuga sa banay ni Benjamin ang mga Jebusihanon nga nagpuyo sa Jerusalem. Busa didto ra gihapon magpuyo sa Jerusalem ang mga Jebusihanon tipon sa katawhan sa Benjamin.

Gibuntog sa Banay ni Jose ang Betel

22-23. Gisulong sa banay ni Jose ang siyudad sa Betel nga kaniadto ginganlag Luz. Gitabangan sila sa Ginoo. Nagpadala silag mga espiya ngadto sa siyudad

24. ug ang mga espiya nakakitag tawo nga migula sa siyudad ug ilang giingnan siya, “Tudloi kami unsaon namo pagsulod sa siyudad ug dili ka namo unsaon.”

25. Busa iya silang gitudloan. Gipamatay nila ang tanan nga namuyo sa siyudad gawas niining tawhana ug ang tibuok niyang panimalay.

26. Miadto kining tawhana sa kayutaan sa mga Hitihanon ug didto nagtukod siyag siyudad ug ginganlan niya kinig Luz. Mao gihapon kini ang ngalan niini hangtod karon.

Ang Katawhan nga Wala Abuga sa mga Israelita

27. Wala abuga sa banay ni Manases ang mga nagpuyo sa mga siyudad sa Betsan, sa Tanac, sa Dor, sa Heblaam, sa Megido ug sa silingang kalungsoran. Busa nagpadayon pagpuyo didto ang mga Canaanhon.

28. Sa nahimo nang gamhanan ang mga Israelita gipugos nila ang mga Canaanhon sa pagpatrabaho alang kanila apan wala nila abuga silang tanan.

29. Wala abuga sa banay ni Efraim ang mga Canaanhon nga nagpuyo sa siyudad sa Geser busa ang mga Canaanhon nagpadayon pagpuyo didto tipon kanila.

30. Wala abuga sa banay ni Zabulon ang mga nagpuyo sa mga siyudad sa Kitron ug Nahalol. Busa ang mga Canaanhon nagpuyo tipon kanila ug ilang gipatrabaho alang kanila.

31. Wala abuga sa banay ni Aser ang mga nagpuyo sa mga siyudad sa Acco, Sidon, Ahulab, Acsib, Helba, Afek ug sa Rehob.

32. Ang banay ni Aser nagpuyo tipon sa mga Canaanhon kay wala man nila abuga ang mga Canaanhon.

33. Wala abuga sa banay ni Neftali ang mga nagpuyo sa mga siyudad sa Betsemes ug sa Bet-anat. Nagpuyo sila tipon niining mga Canaanhon apan ilang gipatrabaho ang mga Canaanhon alang kanila.

34. Giabog sa mga Amorihanon ang banay ni Dan ngadto sa kabungtoran ug wala nila palugsonga sa kapatagan.

35. Ang mga Amorihanon nagpadayon pagpuyo sa Bukid sa Hares, sa Ayalon ug sa Saalbim apan nailalom sila sa pagmando sa banay ni Jose ug gipatrabaho sila alang kanila.

36. Ang utlanan sa mga Edomihanon nagsukad sa agianan nga ginganlag Agianan sa Akrabim, gikan sa Sela paingon sa habagatan.