1. Human mamatay si Ehud, ang mga Israelita nagpakasala na usab sa Ginoo.
2. Busa gitugyan sila sa Ginoo ngadto kang Jabin, usa ka haring Canaanhon nga nagmando sa siyudad sa Hazor. Ang pangulo sa iyang kasundalohan mao si Sisera nga nagpuyo sa Haroset-sa-kanasoran.
3. Si Jabin may 900 ka karwahing puthaw. Gidaugdaog ug gidagmalan niya ang mga Israelita sulod sa 20 ka tuig. Busa ang mga Israelita nagpakitabang sa Ginoo.
4. Niadtong panahona ang maghuhukom sa Israel mao si Deborah nga usa ka propeta ug asawa ni Lapidot.
5. Nabatasan niya ang paglingkod ilalom sa usa ka punoan sa palmera didto sa tungatunga sa Rama ug sa Betel sa kabungtoran sa Efraim. Ang mga Israelita moadto kang Deborah aron mangayo sa iyang hukom.
6. Unya gipakuha ni Deborah si Barac nga anak ni Abinoam nga taga-siyudad sa Cades sa Neftali ug giingnan, “Ang Ginoo nga Dios sa Israel nagsugo kanimo sa pag-adto sa Bukid sa Tabor ug sa pagdalag 10,000 ka tawo nga sakop sa mga banay ni Neftali ug Zabulon.
7. Dad-on sa Ginoo si Sisera, ang pangulo sa kasundalohan ni Jabin, aron makiggubat kaninyo sa Suba sa Kison. Aduna siyay mga karwahi ug mga sundalo apan itugyan siya sa Ginoo nganha kanimo.”
8. Si Barac miingon kang Deborah, “Moadto lamang ako kon mokuyog ka.”
9. Si Deborah mitubag, “Hala, mokuyog ako. Apan dili maimo ang dungog kay si Sisera itugyan ngadto sa usa ka babaye.” Busa mikuyog si Deborah kang Barac ngadto sa Cades.
10. Gitigom ni Barac ang mga banay ni Zabulon ug Neftali ngadto sa Cades ug 10,000 ka tawo ang miuban kaniya. Mikuyog usab kaniya si Deborah.
11. Niadtong higayona si Heber nga Kenihanon nagtolda duol sa Cades duol sa kahoyng tugas sa Saananim. Nagpalayo siya sa ubang Kenihanon nga mga kaliwat ni Hobab nga bayaw ni Moises.
12. Nabalitaan ni Sisera nga si Barac nga anak ni Abinoam mitungas sa Bukid sa Tabor.
13. Busa gitigom dayon niya ang iyang 900 ka karwahi ug ang tanan niyang mga tawo ug mibiya gikan sa Haroset-sa-kanasoran paingon sa Suba sa Kison.
14. Ug miingon si Deborah kang Barac, “Dasdas! Mao kini ang adlawng padag-on ka sa Ginoo batok kang Sisera! Ang Ginoo nag-una kanimo!” Busa milugsong si Barac sa Bukid sa Tabor uban sa iyang 10,000 ka sundalo.
15. Ug pinaagi kang Barac ug sa iyang kasundalohan, gibuntog sa Ginoo si Sisera lakip ang tanan niyang karwahi ug mga sundalo. Nanaog si Sisera sa iyang karwahi ug midagan.
16. Gigukod ni Barac ang mga karwahi ug ang kasundalohan ni Sisera ngadto sa Haroset-sa-kanasoran. Ug nahurot ug kamatay ang kasundalohan ni Sisera.
17. Miikyas si Sisera ngadto sa tolda ni Jael nga asawa ni Heber nga Kenihanon tungod kay managhigala man si Jabin nga hari sa Hazor ug ang pamilya ni Heber.
18. Migula si Jael aron pagsugat kang Sisera ug giingnan niya, “Dayon sa akong tolda. Ayaw kahadlok.” Busa misulod si Sisera ug gitabonan siya ni Jael ug alpombra.
19. Giingnan ni Sisera si Jael, “Paimna intawon ko kay giuhaw ko.” Gibuksan ni Jael ang panit nga sudlanag gatas ug gipainom niya si Sisera ug unya gitabonan na usab siya.
20. Unya giingnan siya ni Sisera, “Tindog diha sa pultahan sa tolda ug kon adunay moabot ug mangutana kanimo kon may tawo ba sa sulod, ingna nga wala.”
21. Labihang kapuya ni Sisera busa nakatulog siya pag-ayo. Unya mikuha si Jael ug martilyo ug ugsok sa tolda ug mihinay siya pagduol ug gidukdok niya ang ugsok ngadto sa kilid sa ulo ni Sisera. Milapos ngadto sa yuta ang ugsok ug namatay si Sisera.
22. Sa pag-abot ni Barac nga nangita kang Sisera, gisugat siya ni Jael ug giingnan, “Dali ngari! Ipakita ko kanimo ang tawo nga imong gipangita.” Busa misulod siya ug didto sa yuta nagbuy-od si Sisera nga patay na nga gilagbasan sa ugsok ang iyang ulo.
23. Niadtong adlawa gihatagan sa Dios ug kadaogan ang katawhan sa Israel batok kang Jabin nga hari sa Canaan.
24. Nagpadayon pagdasdas ang mga Israelita batok kang Jabin hangtod nga nabuntog nila siya sa hingpit.