1. Auā ‘ua latou fetautalatala‘i i le sesē o latou manatu:“‘Ua pu‘upu‘u aso o lo tatou ola ma ‘ua tumau ai le fa‘anoanoa,e lē o i ai fo‘i se vaifofō i le i‘uga o le tagata,e lē iloa fo‘i se tasi na toe fo‘i mai nai seoli.
2. ‘Ua tatou tutupu ai le leai,a o aso amulī o le a ‘avea fo‘i i tatou e peiseaī ‘ua leai fo‘i i tatou.Auā o le asu le mānavaga o tatou pogaiisu,a o lo tatou mafaufau, o le aloiafi lea e oso i le mānavaga o tatou fatu.
3. A o‘o ‘ina pē lea, ‘ona liu lefulefu lea o tatou tino,e ta‘ape‘ape fo‘i lo tatou agaga e pei o sina savili fa‘atauva‘a;e mavae atu lo tatou ola e pei o sina puao itiiti,e ta‘ape‘apeina e pei o se ao ‘ua tulia e ‘ave o le lā ma ‘ua miti‘ia i lona vevela.
4. E galoina fo‘i o tatou igoa i aso amulī,e leai fo‘i se tasi na te manatua a tatou galuega.
5. Auā o le mavae atu o le ata o lo tatou nei ola,e lē toe fo‘i mai o se tasi o ē na oti;auā ‘ua fa‘amaufa‘ailogaina ma ‘ua leai se tasi e toe fo‘i mai ai.
6. “O lea, ō mai ia tatou te fiafia i mea lelei ‘ua maua,‘ia tatou fa‘aaogā o mea a lalo nei ma le filigā e pei o ni taulele‘a.
7. ‘Ia fa‘atumuina i tatou i le uaina tāua,‘ia ufitia i suāu‘u manogi lelei,‘aua le tu‘u ‘ia mavae ‘ese le fuamatala o le vaitausaga lelei.
8. ‘Ia fa‘apaleina i tatou i fuārosa,a o le‘i mamae; ‘aua le tu‘u se malae e tasi ma le lē faia ai o tatou fa‘afiafiaga.
9. ‘Aua ne‘i ‘alo ‘ese se tasi i o tatou poula.‘Ia tatou tu‘u i mea uma o fa‘ailoga o lo tatou fiafia,auā o la tatou fe‘au lenā ma lo tatou tofi.
10. Ō maia, ‘ia tatou fa‘asauā i le tagata amiotonu ‘ua mativa,‘aua le poipoi i le fafine ‘ua oti lana tane,‘aua fo‘i le āva i le ulusinā o le toeaina ‘ua tele ona tausaga.
11. ‘Ia ‘avea lo tatou malosi ma tulafono o le amiotonu,auā e leai se aogā o lē ‘ua vaivai.
12. “Lenei, ‘ia tatou faimailei i le tagata amiotonu,auā e lē aogā o ia ‘iā te i tatou ma ‘ua te‘ena e ia la tatou amio,‘ua ta‘uleaga o ia ‘iā te i tatou ‘ona ‘ua tatou soli o poloa‘iga,‘ua fa‘amasiasi ‘iā i tatou ‘ona ‘ua tatou soli o tulafono na a‘oa‘oina ai i tatou.
13. ‘Ua fai mai e ‘iā te ia le poto o le Atua,‘ua ta‘u fo‘i o ia e ia o le atali‘i o le Atua.
14. ‘Ua ‘avea o ia ma sē fa‘amasiasi i o tatou faigāmanatu.
15. E mafatia lava i tatou i le va‘ava‘ai i ona mata,auā e lē tusa lona olaga ma lo isi tagata ma ‘ua ‘ese lava ona ala.
16. ‘Ua ia tāofi ifo o i tatou o tagata fa‘afiaula,‘ua ia ‘alo ‘ese i o tatou ala, ‘ua pei lava o ni mea ‘ele‘elea ‘iā te ia;‘ua fa‘asilisili e ia le i‘uga o tagata agatonu;ma ‘ua ia mitamita i ta‘u le Atua o lona tamā.
17. ‘Inā tatou va‘ava‘ai ia pe moni ana ‘upu,‘ia tatou tofotofo po‘o a mea o le a o‘o ‘iā te ia,‘ona tatou iloa lea pe fa‘apefea lona i‘uga.
18. Auā ‘āfai o ia o le atali‘i o le Atua, na te puipui lava ‘iā te ia,na te lavea‘i ‘iā te ia a‘i lima o ona fili.
19. ‘Ia tatou tofotofo ‘iā te ia i tauemuga ma puapuagā,‘ina ‘ia iloa ai po ‘ua agamalū ma ‘ia tofotofoina ai lona ‘onosa‘i.
20. ‘Ia tatou fa‘asala ‘iā te ia i le oti e aupito leaga,pe tausia lava ia e pei ‘ona ia fai mai ai.”
21. O o latou manatu ia ma ‘ua latou sesē ai;auā ‘ua fa‘atauasoina i lo latou lava loto leaga.
22. ‘Ua latou lē iloa o ala lilo o le Atua;‘ua latou lē fa‘amoemoe i se taui o le amiotonuma ‘ua latou tāofi ifo ‘ua leai se mamalu mo agaga amiotonu.
23. Auā sa gaosia le tagata e le Atua ‘ina ‘ia tumau e fa‘avavauma ‘ua na faia o ia i lona fa‘atusa, ‘ia foliga ‘iā te ia.
24. A o le matau‘a o le tiapolo ‘ua ulu mai ai le oti i le lalolagi;
25. ‘ua fa‘aa‘oa‘o fo‘i ‘iā te ia o i latou e ‘au ‘iā te ia. #