Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19

Feagaiga Tuai

Feagaiga Fou

Le Poto 16 O LE TUSI PA'IA - Ekalesia Katoliko Roma (RSCB)

E Agalelei le Atua i lona Nu‘u

1. O le mea lea na fa‘apuapuagātia ai i latou, e pei ‘ona tatau ai,i ni manu e tusa ma manu ia sa latou ifo i ai ma ‘ua fa‘aumatia i latou e le vao manu ‘ese‘ese.

2. A ‘ua lē puapuagātia ai lou nu‘u; peita‘i ‘ua e agaalofa i ai,na e foa‘i i ai le mea ‘ua ‘ese lona manogi sa latou matuā tu‘inanau i ai,o salu e fai ma latou mea e ‘ai.

3. O i latou ia sa naunau i mea e ‘ai, a ‘ua latou ‘alo ‘ese i le fia ‘ai ‘ua tusa ai,‘ona o manu ‘ua fa‘aalia atu ma ‘auina atu ‘iā te i latou;a o lou nu‘u, ‘ua pu‘upu‘u si o latou oge, ‘ona latou tofotofo ai lea i se mea e ‘ai ‘ua uiga ‘ese.

4. Auā sa tatau ‘ona taia i se mala ‘ua lē mafai ‘ona ‘alo ‘ese ai o i latou sa pule ma le fa‘asauā,a ‘ua na ‘ona fa‘aalia i lou nu‘u le ala sa fa‘aumatia ai o latou fili.

5. E moni, na o‘o fo‘i ‘iā te i latou le ita o manu fe‘ai,na fano ai i latou i le utia e gata.

6. A ‘ua lē tumau lou to‘asā e o‘o i le i‘uga; ‘ua na ‘ona puapuagātia i latou i nai aso pupu‘u,‘ia ‘avea ma a‘oa‘iga, ‘ona latou maua ai lea le faula‘iga o le fa‘aolataga, e fai ma fa‘amanatuga i poloa‘iga o lau tulafono.

7. Auā o lē sa tepa atu i ai, sa fa‘amālōlōina o ia, e lē ‘ona o le mea sa ia va‘ai atu i ai,‘ae ‘ona o oe o le Fa‘aola o tagata uma.

8. O le mea fo‘i lea ‘ua e fa‘aali atu ai i o matou fili o oe lava o lē lavea‘i ai mea leaga uma,

9. auā o i latou ia ‘ua fasiotia i le utia e sē ma lagomumu ma ‘ua lē mafai ‘ona sao ai o latou ola,auā sa tatau lava ‘ona fa‘aumatia i latou i lea itū‘āiga manu.

10. ‘Ae peita‘i ‘ua manumālō lau fānau i le nifo o gata uogo,auā ‘ua fesoasoani mai lou agaalofa ma fa‘amālōlō ‘iā te i latou.

11. Sa manunu‘a i latou ma vave fa‘amālōlōina ‘ina ‘ia latou manatua ai au fetalaiga,‘ina ne‘i galo ‘ato‘atoa ‘iā te i latou, ‘ona lē toe aogā lea i latou i lou agalelei.

12. Auā e le‘i fa‘amālōlōina i latou i ni laumea po o ni vaila‘au; a o lau lava fetalaiga,le Ali‘i e, e fa‘amālōlōina ai mea uma.

13. Auā o oe lava, le Ali‘i e, na i ai le pule i le ola ma le oti;‘e te fa‘ao‘o ifo i faitoto‘a o le tu‘ugamau ma fa‘afo‘i a‘e.

14. ‘Ua mafai i le tagata ‘ona fasioti i le uso i lona loto leaga,‘ae a te‘a ‘ese le agaga, e lē mafai ‘iā te ia ‘ona toe fa‘afo‘i mai,po o le toe ‘a‘ami mai le agaga ‘ua faiilagi le folauga.

O le Afā Mata‘utia na Lavea ai Aikupito

15. ‘Ae lē mafai i se tasi ‘ona ‘alo ‘ese i ou ‘a‘ao.

16. O tagata amio leaga sa fa‘atagā lē iloa o oe, ‘ua sasaina i latou i le malosi o lou ‘a‘ao;o vaitafe uiga ‘ese, o le uato‘a, o timuga, ‘ua fa‘apuapuagātia ai i latou; ‘ua fa‘aumatia i latou i le afi.

17. O le mea sa ofo ai sa atili ‘ona ‘a‘asa le afi i totonu o le vai e tineia a‘i afi uma;auā o le lalolagi uma na te taui ma sui mo tagata amiotonu.

18. O ni isi aso sa feoloolo ai le afi, ‘ina ne‘i susunuina a‘i o manu sa ‘auina atu i tagata amio leaga,‘ona va‘ai atu lea e i latou ma iloa ai o le fa‘amasinoga lava a le Atua sa tuliloaina ai i latou.

19. A o ni isi aso sa mū ai lava i itū uma i totonu o le vai ma le malosi e sili a‘e i le malosi o isi afi,‘ina ‘ia susunuina ai le fānauga a le nu‘u agasala.

O le Fafagaina o Isaraelu e le Atua i le Vao

20. A o lou nu‘u, ‘ua e fafagaina i latou i le mea e ‘ai a agelu;ma ‘ua e tu‘u ifo ‘iā te i latou, e aunoa ma sa latou galulue i ai,le areto mai le lagi, ‘ua ‘atoa lona manogi lelei ma ‘ua fa‘amalieina a‘i le mana‘oga o tagata ta‘ito‘atasi uma.

21. O lenā mea e ‘ai ‘ua e ‘auina ifo ‘ua tino mai ai lo oe agamālie i lau fānau,sa fetaui ma le mana‘oga o lē sa ia ‘ai ai, sa liliu i so se mea e ‘ai sa naunau i ai le ta‘ito‘atasi.

22. Sa talia e le kiona ma le vaito‘a le malosi o le afi ma ‘ua lē liusuāvai ai,‘ina ‘ia iloatino ai e le fānauga a Isaraelu o le afi sa mū i le uato‘a ma ‘ua pupula mai i le timu,sa fa‘aumatia ai le ulufanua o o latou fili.

23. A ‘ua galo i lea afi o lona ia malosi ‘ina ‘ia fagaina ai o ē amiotonu.

24. Auā o oe o lē na faia ai mea uma, o lo‘o ‘au‘auna i ai o mea uma na faia,o lea ‘ua latou fa‘atigā ma le malosi ‘atoa i tagata agasala,a ‘ua toe agamālie fo‘i ‘ona o le fia fesoasoani atu ‘iā te i latou e fa‘alagolago ‘iā te oe.

25. Sa ‘au‘auna le mana i poloa‘iga a lou agaalofa ‘ua fagaina a‘i o tagata uma;o lea fo‘i sa saga feliuliua‘i pea lona uiga, fa‘atatau ma le loto faitalia o i latou sa talosaga atu ‘iā te oe;

26. ‘ina ‘ia iloatino ai e lau fānau ‘ua pele ‘iā te oe, le Ali‘i e, e lē o fuāla‘au o le fanua e fagaina a‘i tagata,a o lau fetalaiga lava e tausia a‘i o i latou e fa‘atuatua ‘iā te oe.

27. Auā o le mana sa le āu fa‘aumatia i le afi,sa liusuāvai lava ia pe a fa‘amafanafanaina i sina ‘ave se tasi o le lā,

28. ‘ina ‘ia mautinoa ai e tagata uma ‘ua ao lava ‘ina fa‘afetai atu ‘iā te oe a o le‘i oso a‘e le lā,ma ifo atu i lau afioga i le tafa mai o ata.

29. Auā e liusuāvai le fa‘alagolago o le tagata agavale,e pei o le vai e to‘a i le vai tausaga malūlū ma ‘ua so‘ona tafe e pei o se vai ‘ua leai sona aogā.