1. E sili le poto i le malosi,e sili le tagata fa‘autauta i le tagata ‘ua tino malosi.
2. O lenei, ‘outou tupu e, ‘ia ‘outou fa‘alogo ma ‘ia ‘outou lagona;‘ia a‘oa‘oina ‘outou o ē fa‘amasino i tulu‘iga o le lalolagi.
3. ‘Ia ua‘i mai ‘outou taliga, o ‘outou o ē pule i le motu o tagatama ‘outou o ē mitamita i le vao nu‘u ‘ese.
4. Auā ‘ua foa‘iina mai ‘iā te ‘outou le pule e le Ali‘i ma le malosi mai le Silisili‘ese;o ia na te fa‘amasinoina a ‘outou galuega ma su‘esu‘e i o ‘outou manatu.
5. Auā o ‘outou o ‘au‘auna a lona mālō, ‘ae tou te le‘i fa‘amasino tonu,‘ua ‘outou lē tausia le tulafono o le amiotonu,‘ua ‘outou lē sāvavali e tusa ma le finagalo o le Atua.
6. E mata‘utia ma le fa‘afuase‘i o lona aliali mai ‘iā te ‘outou,auā e matuā faigatā le fa‘amasinoga e fa‘amasinoina ai o ē ‘ua i ai le pule.
7. Auā e fa‘amāgaloina o ē iti, ‘ona o le agaalofa;a o ē malolosi, e fai ma le malosi la latou fa‘asalaga.
8. Auā e lē mata‘u le Atua i luma o se to‘atasi,e lē poipoi fo‘i o ia i le mamalu o se to‘atasi,auā o ia lava ‘ua na gaosia o lē itiiti ‘atoa ma lē ‘ua mamalu,ma ‘ua tusa lana tausi alofa ‘iā te i latou uma.
9. A o ē ‘ua sili ‘ona malolosi,‘ua mata e sili fo‘i ‘ona malosi le puapuagātia o i latou.
10. O lenei, o ‘outou, tupu e, e fa‘asaga atu i ai o a‘u nei ‘upu,‘ina ‘ia a‘oa‘o e ‘outou le poto, ‘ina ne‘i pa‘u‘ū ‘outou.
11. Auā e ta‘uamiotonuina o i latou e tausi ma le amiotonu i poloa‘iga tonu;o ē a‘oa‘oina fo‘i i ai, e mautali lava i latou.
12. O lenei, ‘ia ‘outou naunau i a‘u ‘upu, ‘ia ‘outou manana‘o i ai,‘ona ‘outou maua ai lea le a‘oa‘oga.
13. ‘Ua pupula le poto ma ‘ua lē āumamae lava;e iloagofie fo‘i e i latou e naunau i ai,e maua lava ia e i latou e sā‘ili‘ili i ai.
14. E fa‘afetaia‘i lava ia ‘iā te i latou ‘ua manana‘o ‘iā te ia,e muamua ‘ona aliali, ‘iā te i latou.
15. ‘Ai sē tula‘i i le vaveao e sā‘ili ‘iā te ia, e lē mafatia ai o ia;na te mauaina lava o nofonofo i luma o lona faitoto‘a.
16. O lea, o le fa‘autauta sili o le manatu i le poto;o lē alaala ‘ona o ia, e lē pine ‘ona filemū lava ia.
17. Auā e fealua‘i solo lava ia o sā‘ili‘ili ‘iā te i latou ‘ua aogā ‘iā te ia,‘ua aliali mai ‘iā te i latou ma le mata fiafia i o latou ala,‘ua fa‘afetaia‘i ‘iā te i latou ma ‘ua tausi alofa ‘iā te i latou i mea uma.
18. O le amataga o le poto, o le naunau fa‘amaoni i le a‘oa‘oga.
19. O le sā‘iliga o le a‘oa‘oga o le alofa lea,a o le alofa e tausia ai ana poloa‘iga;a o le tausiga o poloa‘iga, o le fa‘amausalīina lea o le ola e fa‘avavau,
20. a o le ola fa‘avavau e soso‘o ai le tagata ma le Atua.
21. O lenei la, o le naunau i le poto e ta‘ita‘iina ai i tatou i le mālō e fa‘avavau.
22. O lea, o ‘outou tupu o mālō,‘āfai ‘ua ‘outou naunau i nofoāli‘i ma to‘oto‘o o le pule,‘ia ‘outou naunau i le poto, ‘ina ‘ia ‘avea ai ‘outou ma tupu e fa‘avavau.
23. ‘Ia naunau i le malamalama o le poto, o ‘outou uma ‘ua pule i tagata.
24. A o le a le poto, o le a fo‘i lona tupu‘aga, o le a ‘ou ta‘u atu nei;‘ou te lē nanā fo‘i ‘iā te ‘outou o matā‘upu loloto a le Atua,‘ae ‘ou te sā‘ili‘ili e āfua mai i lona fa‘ato‘ātupu;‘ou te fa‘amalamalama atu o mea uma ‘ua iloa e uiga ‘iā te ia,‘ou te lē nanā lava se ‘upu moni e tasi.
25. Ma te lē sāvavali fo‘i fa‘atasi ma lē ‘ua sesega ona mata i le matau‘a,auā o lē e fa‘apea, ‘ua lē mautufa‘aga o ia i le poto.
26. O le to‘atele o ē popoto e saogalemū ai le lalolagi uma,o le tupu poto, o le lagolago lava ia o lona nu‘u.
27. O lea, ‘ia ‘outou tali le a‘oa‘oga mai a‘u lava ‘upu,o le a matuā aogā lea ‘iā te ‘outou.