1. Na ia ta‘ita‘iina o a latou galuega i le ‘a‘ao o le perofeta pa‘ia.
2. Na latou faimalaga i fanua tu‘ufua ‘ua lē o i ai ni tagata,ma ‘ua latou tolauapi i fanua ‘ua lē o i ai ni ala.
3. ‘Ua latou tutū e tete‘e atu ai i o latou fili,‘ua latou taui ma sui i ē ‘ino‘ino ‘iā te i latou.
4. Na latou fia inu, ‘ona latou vala‘au atu lea ‘iā te oe;ma ‘ua foa‘iina mai ‘iā te i latou le vai a‘i le papa maualuga;o le papa ma‘a‘a na fa‘amalieina ai lo latou gālala.
5. O le mea na ‘avea ma fa‘asalaga i o latou fili i le ausage o mea e inu,na fa‘afiafiaina ai le fānau a Isaraelu ‘ina ‘ua fa‘afaula‘i ‘iā te i latou.
6. Auā na alofagia lava i latou i le aso o lo latou puapuagā.
7. Auā na e liua le vaitafe sa saga tafe pea,ma sui i ai le toto o tagata mo i latou ‘ua agasala.
8. Ma ‘ua taufa‘aumatia i latou, o le fa‘asalaga lea ‘ona o le poloa‘iga,‘ia fasiotia tamaiti, ‘ae peita‘i ‘ua e foa‘i mai i lou nu‘u le vai tele lava i le itūlā sa lē toe i ai so latou fa‘amoemoe,
9. o fa‘aali ‘iā te i latou, i lo latou gālala i lenā aso,pe fa‘apefea ‘ona e fa‘amamalu i ou lava tagata, ‘ae fasioti i o latou fili.
10. ‘Ua uma ‘ona tofotofoina i latou, e ui lava ‘ina fa‘asalaina i latou ma le agaalofa,a ‘ua latou iloa ai pe fa‘apefea ‘ona puapuagātia i mea fa‘atigā o tagata agasala ‘ua e fa‘amasinoina i lou to‘asā.
11. Na e tofotofoina i latou e pei o le tamā e a‘oa‘i i lana fānau,a o latou fili ‘ua e fa‘asalaina e pei o se tupu faigatā ‘ua na faia le fa‘amasinoga.
12. Auā sa fa‘ataupuapuagātia o ē sa i le ‘āiga,‘atoa ma i latou na ō ‘ese ai,
13. ‘ua sautualua le tigā ma le tagi na o‘otia ai i latou ‘ina ‘ua latou manatu i aso ‘ua mavae atu.
14. Auā ‘ua latou mautinoa o mea sa tigā ai i latou na ‘avea ma mea lelei mo ē na sōsōla,‘ona latou manatua lea le Ali‘i, ma ‘ua ofo i latou i lenā i‘uga.
15. Auā o le nu‘u na latou ulagia ma lafoa‘iina ma le loto leaga,mulimuli ane ‘ua latou ofo lava i ai, ‘ina ‘ua ‘ese lo latou lava gālala i lo tagata amiotonu ia.
16. ‘Ona o manatuga fa‘avalevalea o o latou loto leaga,na fa‘asesēina i latou i le ifo i ni gata ‘ua leai se mafaufau ma ni manu fa‘atauva‘a,o lea na e ‘auina atu ai le vao manu vālelea e taui ma sui a‘i ‘iā te i latou;
17. ‘ina ‘ia latou iloa ai o mea e agasala ai le tagata,o mea fo‘i ia e puapuagātia ai o ia.
18. Auā sa mafai lava i lou ‘a‘ao mamana ‘ua na faia le lalolagi a‘i le mea fa‘alegaosia,‘ona ‘auina atu ‘iā te i latou le vao urosa po o ni leona fe‘ai,
19. po o ni manu fa‘ato‘ā gaosia, manu matuā fe‘ai,‘ua lē masani ai tagata, ‘ua se ‘ausa afi lo latou mānavaga,‘ua sasao mai ai le asu elosia, po ‘ua ‘emo‘emo mai o latou mata i le uila mata‘utia;
20. e lē na ‘ona fasia fo‘i o tagata ‘ua lavea ai,‘ae oti lava i le mata‘u o i latou e tepa atu i ai.
21. Tu‘u ai pea fo‘i o mea ia, ‘ae sa mafai lava ‘ona fano i latou i se mānavaga e tasi,o tuliloaina i latou e a latou lava amio leaga,o ta‘ape‘apeina i latou i le matagi o lou mana; peita‘i,‘ua e fuafuaina le umi ma le tele ma le mamafa o mea ta‘itasi uma na e fa‘atonuina.
22. Auā e a oe to‘atasi le mana uma, e tumau pea lava ‘iā te oe;po o ai fo‘i e lavā tete‘e atu i le malosi o lou ‘a‘ao?
23. Auā o lo‘o i ou luma le lalolagi e pei o sina efuefu i le fua tautau,e pei o sina matāua o le sau e pa‘ū i le lalolagi i le vaveao.
24. A ‘ua e agaalofa i tagata uma, auā e ou le mana uma;ma ‘ua e lē tepa ifo i agasala a tagata, ‘ina ‘ia latou salamō ai.
25. Auā ‘ua e alofa i mea uma lava, ‘e te lē ‘ino‘ino i se mea e tasi o mea na e faia;auā fo‘i ‘ana e ‘ino‘ino i ai, po ‘ua e lē faia lava.
26. E mafai fa‘apefea ‘ona mautū se mea pe ‘ana e lē finagalo i ai?Pe fa‘atumauina se mea ‘ua e lē vala‘auina?
27. A ‘ua e fa‘amāgaloina tagata uma, auā o au mea lava o mea uma,le Ali‘i e, o oe lē agaalofa i agaga o tagata. #