1. Na fai a a‘u fa‘amālōlōina o Isaraelu, ‘ona mānu mai ai lea o le leaga o Efaraima ma amio leaga a Samaria; auā ‘ua latou fai le amio pepelo; e ulufale mai le gaoi, ‘ae osofia i fafo e le ‘au fao mea.
2. Latou te lē fa‘apea ifo i o latou loto: ‘Ou te manatua la latou amio leaga uma; o lenei, ‘ua si‘osi‘omia i latou ‘iā latou lava galuega, ‘ua i o‘u luma ia mea.
3. Latou te fa‘afiafia le tupu ‘iā latou amio leaga; ‘atoa ma ali‘i ‘iā latou tala pepelo.
4. ‘Ua mulilulua i latou uma; pei se ‘ogāumu i latou ‘ua fa‘a‘a‘asaina e lē fai areto; ‘ua lē toe tafu pe a uma ‘ona lolomi o le paluga falaoa se‘ia fa‘afefeteina.
5. O le aso o lo tatou tupu na mama‘i ai ali‘i i le ‘o‘ona o uaina; na ia fa‘aloaloa atu lona lima fa‘atasi ma ē tauemu.
6. Auā ‘ua latou fa‘alatalata ma o latou loto, e pei o se ‘ogāumu, a o latou o lamalama, ‘ua aoina o moe lo latou fai areto, ‘ua mū i le taeao pei se afi mumū.
7. ‘Ua ‘a‘asa i latou uma e pei o se ‘ogāumu, ‘ua latou fa‘aumatia o latou ali‘i fa‘amasino; ‘ua pa‘u‘ū o latou tupu uma, e leai so latou e vala‘au ‘iā te a‘u.
8. O Efaraima ‘ua numia o ia e ia fa‘atasi ma le nu‘u; o Efaraima o le pōtoi areto ia e le‘i liua.
9. ‘Ua fa‘aumatia e tagata ‘ese lona malosi, a ‘ua lē iloa e ia; ‘ua pule le sinā o lona lauulu, a ‘ua lē iloa e ia.
10. ‘Ua molimau le fa‘amaualuga o Isaraelu i o latou luma; e ui lava i ia mea uma, ‘ua latou le toe fo‘i i le ALI‘I lo latou Atua, ‘ua latou le sā‘ili fo‘i ‘iā te ia.
11. O Efaraima fo‘i e pei o se lupe valea ia, e leai sona mafaufau; latou te vala‘au ‘iā Aikupito, ‘ua ō fo‘i i latou i Asuria.
12. A latou o, ‘ou te lafo la‘u ‘upega i luga ‘iā te i latou; ‘ou te lafo i lalo ‘iā te i latou pei ni manu felelei; ‘ou te sasa fo‘i ‘iā te i latou e pei ‘ona fa‘alogo i ai lo latou potopotoga.
13. O i talofa ‘iā te i latou! auā ‘ua sōsōla ‘ese i latou ‘iā te a‘u; ‘ia malaia i latou auā ‘ua latou fouvale ‘iā te a‘u; na ‘ou togiola fo‘i ‘iā te i latou, a ‘ua latou tala pepelo ‘ia leaga ai a‘u.
14. ‘Ua lē vala‘au mai i latou ‘iā te a‘u mā o latou loto, ‘ina ‘ua latou uiō i o latou moega; latou te fa‘apotopoto i saito ma uaina; latou te ō ‘ese ‘iā te a‘u.
15. O a‘u fo‘i, na ‘ou a‘oa‘o atu, na ‘ou fa‘amalosiina o latou lima, a ‘ua latou taupulepule i mea e leaga ai a‘u.
16. ‘Ua latou toe fo‘i, ‘ae lē o lē Silisili‘ese ‘ua latou fo‘i i ai; e pei o le ‘aufana pepelo i latou; e pa‘u‘ū o latou ali‘i i le pelu ‘ona o le fa‘asiasia o latou laulaufaiva; e fai mo latou gao lea mea i le nu‘u o Aikupito.#