Hosea 5 O LE TUSI PA'IA - Ekalesia Katoliko Roma (RSCB)

O le To‘asā o le Atua i Tagata uma o Isaraelu

1. Le ‘au ositaulaga e, fa‘alogologo mai ia i lenei mea. Le ‘āiga o Isaraelu e, ‘inā fa‘alogologo mai ia. Le ‘āiga o le tupu e, ‘inā liliu mai ia o ‘outou fofoga, auā ‘ua fa‘asalaina ‘outou, ‘ua ‘avea ‘outou ma matāsele i Mesepa ma ‘upega ‘ua folasia i Tapora.

2. ‘Ua fa‘ateleina le fasi e i latou ‘ua liliu ‘ese, a o a‘u, ‘ou te a‘oa‘i atu ‘iā te i latou uma.

3. O a‘u ‘ua ‘ou iloa Efaraima, o Isaraelu fo‘i ‘ua lē lilo lava ia ‘iā te a‘u; auā, Efaraima e, ‘ua e faita‘aga nei, ‘ua leaga Isaraelu.

O le Lapata‘iga a Hosea i le Ifo i Tupua

4. Latou te lē sauniuni a latou galuega ‘ina ‘ia latou liliu mai i lo latou Atua; auā o i totonu ‘iā te i latou le fia faita‘aga, latou te lē iloa le ALI‘I.

5. ‘Ua molimau le fa‘amaualuga o Isaraelu i o latou luma, e pa‘u‘ū Isaraelu ma Efaraima ‘iā latou agasala; e pa‘ū fo‘i Iuta fa‘atasi ma i latou.

6. Latou te ō atu ma a latou mamoe ma a latou povi e sā‘ili‘ili atu ai i le ALI‘I; ‘ae latou te lē maua; ‘ua afio ‘ese o ia ‘iā te i latou.

7. ‘Ua pepelo i latou i le ALI‘I; auā ‘ua fānau e i latou a latou tama ‘ese; o le a ‘aina nei i latou, ‘atoa ma o latou tofi i le masina e tasi.

O le Tau‘a a Iuta ma Isaraelu

8. ‘Ia ‘outou ilia le sofao i Kipea ma le pū i Rama; ‘ia ‘outou ‘alalaga i Petavene; Peniamina e, o lo‘o mulimuli atu o ia ‘iā te oe.

9. E fa‘atafunaina Efaraima i ona po o le a‘oa‘iga; ‘ua ‘ou fa‘ailoaina atu i itū‘āiga o Isaraelu, o le ‘upu moni lava.

10. O ali‘i o Iuta sa fa‘apei o tagata e si‘i le tuā‘oi i latou; ‘ou te liligi atu lo‘u ita fa‘apei o le vai ‘iā te i latou.

11. ‘Ua fa‘asauāina Efaraima, ‘ua lomia i le fa‘amasinoga; auā ‘ua usiusita‘i o ia ma lona loto i le poloa‘iga.

12. O a‘u fo‘i e pei o se mogamoga i Efaraima; e pei o se mea e pala fo‘i i le ‘āiga o Iuta.

13. Na iloa e Efaraima, lona ma‘i, na iloa fo‘i e Iuta lona manu‘a, ‘ona alu lea o Efaraima i Asuria, na alu lana fe‘au ‘iā Iarepa le tupu; a ‘ua lē mafai lava ‘iā te ia ‘ona fa‘amālōlō ‘iā te ‘outou, pe fa‘amafuina o ‘outou manu‘a.

14. Auā e ‘avea a‘u e pei o se leona ‘iā Efaraima, e pei o se leona ta‘anoa fo‘i i le ‘āiga o Iuta; o a‘u lava ‘ou te saeia ma alu ‘ese, ‘ou te ‘ave‘esea, e leai fo‘i sē na te lavea‘iina.

15. ‘Ou te alu, ‘ou te toe fo‘i lava i le mea ‘ou te nofo ai, se‘ia fa‘asalaina lava i latou ma latou sā‘ili ‘iā te a‘u; latou te vave sā‘ili ‘iā te a‘u pe a puapuagātia i latou:#