1. O lo‘o ‘ai Efaraima le matagi, ‘ua naunau atu o ia i le matagi mai sasa‘e; ‘ua fa‘ateleina e ia le pepelo ma le malaia i aso uma lava; ‘ua osia fo‘i la latou feagaiga ma Asuria ma ‘ua avatu i Aikupito suāu‘u.
2. ‘Ua i le ALI‘I le finauga ma Iuta, na te fa‘asalaina Iakopo e tusa ma ana amio; na te taui atu ‘iā te ia e tusa ma ana galuega.
3. Na ia tago i le mulivae o lona uso a o i ai i le manava; o lona malosi na ia mālō ai i le Atua.
4. Na ia mālō i le agelu, na manumālō ai lava; na ia tagi, ma ‘ai‘oi atu ‘iā te ia; na ia iloa ‘iā te ia i Peteli, na tulei mai ai fo‘i lona si‘ufofoga ‘iā te i tatou.
5. O le ALI‘I lava o le Atua o ‘au; o le ALI‘I o lona suafa lea e manatua ai o ia.
6. O lenei, ‘ia e toe fo‘i i lou Atua; ‘ia e tausi le alofa ma le fa‘amasinoga, auā le aunoa ‘ona e fa‘atalitali atu i lou Atua.
7. O le fa‘atau‘oa ia, o i lona lima o fua fa‘atautau fa‘alētatau; e fiafia o ia i le fa‘asauā.
8. ‘Ua fa‘apea mai fo‘i a Efaraima, “E moni, o a‘u o le mau mea, ‘ua ‘ou maua ‘oloa mo a‘u; latou te lē iloa se leaga ‘iā te a‘u, se mea o se agasala i a‘u galuega uma.”
9. O a‘u fo‘i o le ALI‘I lou Atua talu mai le nu‘u o Aikupito, ‘ou te toe fa‘anofo ‘iā te oe i fale ‘ie fa‘apei o ona po o le tausamiga.
10. Na ‘ou tautala atu i perofeta, na ‘ou fa‘ateleina fa‘aaliga; o le ‘au perofeta fo‘i na ‘ou sauni atu ai ‘upu fa‘ata‘oto.
11. ‘Ua leaga lava Kiliata, e pepelo lava i latou; latou te fai taulaga i povi po‘a i Kilikala; o latou fatafaitaulaga fo‘i, e pei o faupu‘egama‘a ia i atu puē o le lau‘ele‘ele.
12. Na sola Iakopo i le nu‘u o Suria; na ‘au‘auna Isaraelu e maua ai lana avā; na ia leoleo mamoe e maua ai lana avā.
13. O le perofeta na ‘aveina a‘e ai Isaraelu e le ALI‘I mai Aikupito; o le perofeta fo‘i na leoleoina ai o ia.
14. Na matuā fa‘a‘ono‘ono Efaraima ‘iā te ia, o le mea lea na te tu‘u ai pea lona toto ‘iā te ia; o lona luma fo‘i e fa‘afoisia ‘iā te ia e lona ALI‘I.#