1. O Peteru, o le ‘aposetolo a Iesu Keriso, o la‘u tusi lenei i ē ‘ua āumau, ma ‘ua fa‘ata‘ape‘apeina i Pono, ma Kalatia, ma Kapatokia, ma Asia, ma Pitunia.
2. O ē ‘ua filifilia e tusa mōna mua‘i silafia e le Atua le Tamā, i le fa‘apa‘iaina e le Agaga, ‘ia i‘u ai i le gaua‘i ma le sa‘alu‘uga o le toto o Iesu Keriso.‘Ia fa‘ateleina ‘iā te ‘outou le alofa tunoa ma le manuia.
3. ‘Ia fa‘afetaia le Atua, le Tamā o lo tatou Ali‘i o Iesu Keriso, o lē na fānaufouina i tatou ‘ona o lona alofa tele, ‘ina ‘ia i‘u i le fa‘amoemoe ‘ua ola, i le toetū mai o Iesu Keriso nai ē ‘ua oti.
4. ‘Ia i‘u i le tofi e lē pala, e leai se leaga o i ai, e lē mamae lava, o lo‘o teu i le lagi mo i ‘outou.
5. O ē o leoleoina e le mana o le Atua, i le fa‘atuatua, ‘ia i‘u i le fa‘aolataga ‘ua saunia, e fa‘aalia mai i ona pō e gata ai.
6. O lea ‘ua ‘outou ‘oli‘oli ai, ē ui lava ‘ina fa‘anoanoa o ‘outou i nai aso nei, i tofotofoga ‘ese‘ese.
7. O le tofotofo fo‘i o lo ‘outou fa‘atuatua, e silisili ‘ona aogā i le auro e fa‘aumatia, e ui lava ‘ina tofotofoina i le afi, e ‘avea ma mea e i‘u i le vi‘iga, ma le mamalu, ma le manuia pe a fa‘aalia mai Iesu Keriso.
8. To‘u te lē iloa atu ‘outou ‘iā te ia, a ‘ua alolofa ‘iā te ia; e lē o va‘ai atu nei fo‘i ‘iā te ia, a o lo‘o fa‘atuatua ‘iā te ia, tou te ‘oli‘oli ai ma le fiafia e lē matalatalaina, e silisili ‘ese lava.
9. E maua fo‘i le i‘uga o lo ‘outou fa‘atuatua, o le fa‘aolaina lea o ‘outou agaga.
10. O le fa‘aolataga lea na tausā‘ili‘ili i ai ma tausu‘esu‘e i ai o perofeta, o ē na valo‘ia mai le alofa tunoa e o‘o ‘iā te ‘outou nā.
11. O ē na sā‘ili‘ili po o afea ona pō, ma le uiga o ona pō na fa‘ailoa mai e le Agaga o Keriso sa i totonu ‘iā te i latou, ‘ina ‘ua mua‘i fa‘ailoa mai o tigā o Keriso, ma le mamalu e mulimuli ane i ai.
12. Na fa‘aalia mai ‘iā te i latou e lē ‘ona o i latou, a o i tatou, na latou tu‘uina mai ai ia mea, o mea ia ‘ua fa‘amatalaina atu nei ‘iā te ‘outou e i latou o ē folafola atu le tala lelei ‘iā te ‘outou, ma o le Agaga Pa‘ia ‘ua ‘auina mai mai le lagi; o mea ia e naunau i ai le ‘au agelu i le fia matamata i ai.
13. O lenei, ‘ia ‘outou fusi a‘e i sulugātiti o ‘outou mafaufau ‘ia fa‘autauta, ‘ia ‘ato‘atoa ‘ona fa‘amoemoe, i le alofa tunoa e molia mai ‘iā te ‘outou pe a fa‘aalia mai Iesu Keriso.
14. ‘Ia pei o fānau gaua‘i, ‘aua ne‘i fa‘atusaina ‘outou e ‘outou i o ‘outou tu‘inanau tuai, a o vālea ‘outou.
15. ‘Ae pei ‘ona pa‘ia o ia na vala‘auina ‘outou, ‘ia fa‘apea fo‘i ‘outou ‘ona pa‘ia ‘iā ‘outou amio uma.
16. Auā ‘ua tusia, “‘Ia pa‘ia ‘outou, auā o a‘u nei e pa‘ia lava a‘u.”
17. ‘Āfai fo‘i tou te vala‘au atu i le Tamā, o lē na te lē fa‘ailogaina tagata, o lē na te fa‘amasino e tusa ma le galuega a tagata e ta‘ito‘atasi, ‘ia ‘outou nonofo ma le mata‘u, a o ‘outou o āumau ‘i‘inei.
18. Auā ‘ua ‘outou iloa e le‘i togiolaina ‘outou i mea e pala, o le ario po o le auro, nai la ‘outou amio lē aogā na tu‘uina mai e o ‘outou tamā.
19. A o le toto tāua o Keriso pei o le tama‘i mamoe e lē pona lava, e leai fo‘i sona ila.
20. Na silafia lava e ia anamua a o le‘i fa‘avaeina le lalolagi, a ‘ua fa‘aalia mai i ona pō nei e gata ai ‘ona o ‘outou.
21. O ē fa‘atuatua i le Atua talu o ia, na ia toe fa‘atū mai ‘iā te ia nai ē ‘ua oti, ma na avatu le mamalu ‘iā te ia, ‘ina ‘ia i ai i le Atua lo ‘outou fa‘atuatua ma lo ‘outou fa‘amoemoe.
22. ‘Ua ‘outou fa‘amamā i o ‘outou loto i le gaua‘i i le ‘upu moni e le Agaga, ‘ua i‘u i le alofa fa‘amaoni i le ‘au uso, o le mea lea ‘ia matuā fealofani ai ‘outou a‘i le loto naunau.
23. ‘Ua fānaufouina ‘outou e lē o le fua e pala, a o le fua e lē pala lava, o le afioga a le Atua lea ‘ua ola ma ‘ua tumau e o‘o i le fa‘avavau.
24. Auā, “O tagata uma lava e tusa ia ma le mutia,o le matagofie uma fo‘i o tagata e pei o le fuga o le vao.E magumagu le mutia, e to‘ulu fo‘i ona fuga.
25. a o le afioga a le Ali‘i e tumau lea e fa‘avavau lava.”O le afioga fo‘i lea ‘ua folafolaina atu ‘iā te ‘outou na.#