Le mataupu

  1. 1
  2. 2
  3. 3
  4. 4
  5. 5

Feagaiga Tuai

Feagaiga Fou

1 Peteru 4 O LE TUSI PA'IA - Ekalesia Katoliko Roma (RSCB)

O le Fa‘amaoni Fa‘a-Kerisiano

1. O lenei, ‘ua tigāina Keriso i le tino ‘ia fai ai ma ‘au‘upega ‘iā te ‘outou fo‘i lea lava loto, auā o lē ‘ua tigā i le tino, ‘ua tu‘u e ia le agasala.

2. ‘Ina ‘ia lē toe usiusita‘i o ia i tu‘inanau o tagata, i ona tausaga ‘ua totoe i le tino, a ‘ia usiusita‘i i le finagalo o le Atua.

3. ‘Ua lava ia aso ‘ua mavae na fai ai e i tatou le mana‘o o ē fa‘apaupau, o sāvavali i le fa‘amatāitu ma tu‘inanau, ma le inu tele i uaina, ma poula, ma inugā‘ava, ma le ifo i tupua e soli ai tulafono.

4. O le mea lea e ofo ai ma fāifai ai i latou, auā tou te lē taufetuli ma i latou i lea lava ulavale silisili;

5. latou te tala atu le tala i lē ‘ua saunia e fa‘amasino i ē ola ma ē ‘ua oti.

6. O le mea lea na folafola atu ai le tala lelei i ē ‘ua oti, ‘ina ‘ia fa‘asalaina i latou i le tino i la tagata, ‘ae ola ai i le agaga i la le Atua.

O le Alofa ma Agalelei Atu

7. A ‘ua lata mai le gata‘aga o mea uma lava; o lenā, ‘ia fa‘autauta ai, ma ‘ia mataala ‘outou ma le tatalo.

8. ‘Ia muamua i mea uma ‘ona maua e ‘outou o le alofa naunau o le tasi i le tasi, auā o le alofa e ufiufi ai agasala e tele.

9. ‘Ia ‘outou talia malaga o ‘outou ma le lē muimui.

10. ‘Ia ta‘ito‘atasi ma ‘au‘auna o le tasi i le tasi i lea lava mea, e pei ‘ona maua e ia o le mea alofa, e pei o ‘au‘auna pule lelei a le alofa tunoa uiga ‘ese‘ese o le Atua.

11. ‘Āfai e tautala se tasi, ‘ia tusa ma afioga a le Atua; ‘āfai e ‘au‘auna se tasi, ‘ia tusa ma le malosi ‘ua foa‘iina mai e le Atua, ‘ina ‘ia vi‘ia le Atua i mea uma lava, ‘ona o Iesu Keriso; ‘ia ‘iā te ia le vi‘iga ma le malosi e fa‘avavau fa‘avavau lava. Amene.

O Puapuagā ‘ona o le Fa‘atuatua ‘iā Keriso

12. Le ‘au pele e, ‘aua tou te ofo i le tofotofoga pei o le afi, ‘ua o‘o ‘iā te ‘outou e fai ma tofotofoga ‘iā te ‘outou, peiseaī o se mea fou ‘ua o‘o ‘iā te ‘outou.

13. ‘Ae fa‘apei ‘ona tofusia o ‘outou fa‘atasi i tigā o Keriso, ‘ia ‘outou ‘oli‘oli ai, ‘ina ‘ia fiafia ‘outou ma le ‘oli‘oli tele pe a fa‘aalia mai lona mamalu.

14. ‘Āfai e ‘upuleagaina ‘outou ‘ona o le suafa o Keriso, ‘amu‘ia ‘outou; auā o lo‘o tumau ‘iā te ‘outou le Agaga mamalu, o le Agaga o le Atua.

15. ‘Aua fo‘i ne‘i ala ‘ona fa‘atigāina so ‘outou ‘ina ‘ua fasioti tagata, pe gaoi, pe amio leaga, po ‘ina ‘ua asiasi fua i mea a isi tagata.

16. ‘Ae ‘āfai e fa‘atigāina se tasi auā o ia o le Kerisiano, ‘aua le māsiasi ai o ia, a ‘ia vivi‘i atu i le Atua ‘ona o lea lava mea.

17. Auā o ona pō nei e amata ai le fa‘amasinoga i le ‘āiga o le Atua; ‘āfai fo‘i e muamua ‘iā i tatou, pe se a le gata‘aga o ē fa‘alogogatā i le tala lelei a le Atua?

18. Pe ‘āfai fo‘i,“E toe ‘ina lē mafai ‘ona fa‘aolaina o lē amiotonu,po o ifea e tu mai ai o lē fa‘alēmata‘u ma le agasala?”

19. O lenei, o i latou ‘ua tigāina e tusa ma le finagalo o le Atua, ‘ia latou tu‘uina atu ma le amio lelei o latou lava ola i lē na faia mea uma, o ia e fa‘amaoni.#