1. Fa‘auta mai ia; ‘Outou e tamao‘āiga, ‘ia ‘outou fētāgisi ma uiō ‘ona o puapuagā e o‘o mai ‘iā te ‘outou.
2. ‘Ua pala la ‘outou ‘oloa, ‘ua ‘ati‘atia ‘outou ‘ofu i mogamoga.
3. ‘Ua ‘elea o ‘outou auro ma ario; e fai fo‘i ma molimau ‘iā te ‘outou o latou ‘ele, e ‘aina ai o ‘outou tino pei o se afi. ‘Ua ‘outou fa‘aputu mea i ona aso e gata ai.
4. Fa‘auta, o le totogi o ē galulue, ē na fa‘aputu le fua o ‘outou fanua, ‘ua tāofia e ‘outou, ‘ua ‘alaga ia; o le ‘alaga fo‘i o ē na selesele saito ‘ua fa‘afofoga lava e le Ali‘i o ‘au.
5. ‘Ua ‘outou nonofo i le nu‘u ma le sololelei, ma le fiafia i la le tino, ‘ua fafagaina ‘outou e ‘outou, fa‘apei o manu mo le aso e fafasi ai.
6. ‘Ua ‘outou fa‘asala ma fasioti le amiotonu, ‘ua lē tete‘e mai o ia ‘iā te ‘outou.
7. O lenei, le ‘au uso e, ‘onosa‘i ia se‘ia o‘o i le afio mai o le Ali‘i. Fa‘auta, e fa‘atali lē galue fanua i le fua aogā o le ‘ele‘ele, e fa‘atalitali i ai, se‘ia maua le timuga muamua ma lē mulimuli.
8. ‘Ia ‘onosa‘i fo‘i ‘outou, ia fa‘atumauina o ‘outou loto, auā ‘ua latalata le afio mai o le Ali‘i.
9. Le ‘au uso e, ‘aua tou te fēmuimuia‘i, ne‘i fa‘asalaina ‘outou; fa‘auta, ‘ua tu mai le fa‘amasino i luma o le faitoto‘a.
10. O‘u uso e, ‘ia ‘outou fa‘aa‘oa‘o i le fa‘ato‘ato‘a i le leaga, ‘atoa ma le ‘onosa‘i o le ‘au perofeta, ē na tautala mai i le suafa o le Ali‘i.
11. Fa‘auta, ‘ua tatou ta‘u‘amu‘ia i ē ‘onosa‘i; ‘ua ‘outou fa‘alogologo i le ‘onosa‘i o Iopu, ‘ua ‘outou iloa fo‘i le i‘uga i la le Ali‘i, ‘ina ‘ua mutimutivale tele le Ali‘i ma le alofa naunau.
12. O‘u uso e, e muamua lava i mea uma lenei, ‘aua lava ne‘i ‘outou tautō, po o i le lagi, po o i le fanua, po o se tasi lava tautoga; ‘ae tau lava o la ‘outou “Ioe,” ioe, ma la ‘outou “Leai,” e leai; ‘ina ne‘i fa‘asalaina ai ‘outou.
13. ‘Ua tigāina ‘ea so ‘outou? ‘Inā tatalo ia. ‘Ua fiafia ‘ea se tasi? ‘Inā pese ia.
14. ‘Ua ma‘i ‘ea so ‘outou ‘inā ‘a‘ami atu ia i toeaina o le ekalesia, ‘ia latou tatalo mo ia, pe a uma ‘ona fa‘au‘u ‘iā te ia i le suāu‘u i le suafa o le Ali‘i.
15. O le tatalo fo‘i e faia i le fa‘atuatua e fa‘aolaina ai le ma‘i, e fa‘atūina fo‘i o ia e le Ali‘i; ‘āfai fo‘i ‘ua agasala, e fa‘amāgaloina ia.
16. ‘Ia feta‘uta‘ua‘i a ‘outou agasala, ma tatalo le tasi mo le tasi, ‘ina ‘ia fa‘amālōlōina ‘outou. ‘Ua aogā tele le tatalo fa‘atauānau a le tagata amiotonu.
17. O Elia o le tagata ia e tusa ma i tatou. ‘Ua matuā tatalo o ia ‘ina ‘ia lē timu, ‘ona lē timu ai lea o le fanua i tausaga e tolu ma masina e ono.
18. ‘Ua toe tatalo fo‘i, ‘ona tō ifo ai lea o le timu mai le lagi, ‘ona fua mai ai lea o le ‘ele‘ele i ona lava fua.
19. Le ‘au uso e, ‘ai se tasi o ‘iā te ‘outou ‘ua sesē i le ‘upu moni, a ‘ua fa‘afo‘i mai se tasi ‘iā te ia.
20. ‘Ia iloa e ia, o lē fa‘afo‘i mai le tagata agasala nai lona ala sesē, e fa‘aolaina e ia le agaga nai le oti, e ufiufi fo‘i e ia le vao agasala.#