1. ‘Ia fa‘apea ‘outou fafine, ‘ia usiusita‘i ‘iā ‘outou lava tane, ‘āfai fo‘i e lē fa‘alogo nisi i le ‘upu, ‘ia maua i latou i le amio lelei a avā, ‘ae leai se ‘upu,
2. pe a latou va‘ai ane ‘iā ‘outou amio mamā ma le fa‘aaloalo.
3. ‘Aua ne‘i faia i le tino a ‘outou teuga, o le fili lea o le lauulu, ma le teuteu i auro, ma le ‘o‘ofu i ‘ofu.
4. A o le tagata lilo o le loto, ‘iā teua lea i le mea e le pala, o le loto agamalū ma le filemū, o le mea tau tele lava lea i luma a le Atua.
5. Auā sa fa‘apea fo‘i fafine pa‘ia anamua ‘ona teuteu ‘iā i latou, o ē na fa‘amoemoe i le Atua, na usiusita‘i i latou ‘iā latou lava tane.
6. Sa fa‘apea Sara ‘ona fa‘alogo ‘iā Aperaamo, na ia ta‘ua o ia o le ali‘i; ‘ua fai fo‘i ‘outou ma ana tama, pe a agalelei ma le lē mata‘u i se mea e tasi e mata‘u ai.
7. ‘Ia fa‘apea ‘outou tane, ‘ia fai le ‘āiga ma le poto, ‘ia fa‘autauta i le tino vaivai o le fafine ma āva ‘iā te ia ‘ona ‘ua tofia fa‘atasi i le ola e foa‘ifuaina mai, ‘ina ne‘i fa‘alavelaveina a ‘outou tatalo.
8. O le i‘uga lenei, ‘ia loto gatasi ‘outou uma, ‘ia fealofani, ‘ia alolofa i le ‘au uso, ‘ia mutimutivale i le alofa, ‘ia agalelei.
9. ‘Aua le taui atu le leaga i le leaga, po o le agatele mai i le agatele atu; a ‘ia ‘outou fa‘amanuia atu, ‘ina ‘ua iloa o le mea lenei na vala‘auina ai ‘outou, ‘ina ‘ia maua e ‘outou le manuia.
10. Auā,“O lē fia mana‘o i le ola,‘ina ‘ia iloa aso lelei,sōia le tautala lona laulaufaiva i ‘upu leaga,ma ona laugutu ‘aua le tautalatala fa‘a‘ole‘ole.
11. ‘Ia ‘alo ‘ese i le leaga, a ‘ia fai mea lelei;‘ia sā‘ili i le filemū ma tausisi i ai.
12. Auā o fofoga o le Ali‘i o lo‘o fa‘asaga i ē amiotonu,e liliu mai fo‘i ona taliga ‘iā latou fa‘atoga.A o fofoga o le Ali‘i o lo‘o fa‘asaga ma le to‘asā i ē fai amio leaga.”
13. O ai fo‘i na te agaleaga ‘iā te ‘outou, pe ‘āfai tou te fa‘aa‘oa‘o i le lelei?
14. ‘Ae ‘āfai e tigāina ‘outou ‘ona o le amiotonu, ‘amu‘ia ‘outou. ‘Aua fo‘i tou te fefefe i lo latou fa‘amata‘u mai, ‘aua fo‘i le atuatuvale.
15. A ‘ia pa‘ia le Ali‘i le Atua i o ‘outou loto. ‘Ia saunia pea lava ‘outou e tali atu ma le agamalū ma le mata‘u ‘iā i latou uma o ē fesili mai ‘iā te ‘outou i le uiga o le fa‘amoemoe o lo‘o ‘iā te ‘outou.
16. ‘Ia ‘iā te ‘outou le loto fuatia ifo lelei, o le mea fo‘i latou te fa‘aleaga ai ‘iā te ‘outou, peiseaī ‘ua ‘outou amio leaga, ‘ia māsiasi i latou o ē tu‘ua‘i fua la ‘outou amio lelei o ‘iā Keriso.
17. Auā ‘āfai e finagalo le Atua ‘ia tigāina ‘outou ‘ona o le amio lelei, e sili ‘ona lelei o lea i le tigāina ‘ona o le amio leaga.
18. Auā o Keriso fo‘i na maliu o ia fa‘atasi mo agasala, o le amiotonu o ē amioletonu, ‘ina ‘ia ta‘ita‘iina e ia o i tatou i le Atua; na fasiotia o ia i le tino, a ‘ua fa‘aolaina mai i le Agaga,
19. na ia maliu atu ai, ma tala‘i atu ai i agaga i le fale puipui.
20. O ē na lē fa‘alogo anamua, ‘ina o fa‘atalitali mai le ‘onosa‘i o le Atua anamua i ona pō o Noa, a o sauni ai le va‘a, na fa‘asaoina ai tagata e to‘aitiiti, e to‘avalu lava ia i le vai.
21. O le fa‘atusa fo‘i lea mea o le papatisoga, o lo‘o fa‘aola mai ai nei ‘iā te ‘outou, e lē o le fa‘ate‘a‘eseina o le ‘ele‘ele o le tino, a o le tali a le loto fuatia ifo lelei i le Atua, i le toetū mai o Iesu Keriso.
22. o ia o lo‘o i le itū taumatau o le Atua, ‘ina ‘ua afio a‘e o ia i le lagi, na to‘ilalo ‘iā te ia o agelu, ma faipule, ‘atoa ma ē malolosi.#