1. ‘Ia ‘outou fa‘aa‘oa‘o mai ‘iā te a‘u, pei o a‘u ‘iā Keriso.
2. Le ‘au uso e, ‘ou te vivi‘i atu ‘iā te ‘outou, ‘ina ‘ua ‘outou manatua mai a‘u i mea uma, ma ‘outou tāofi mau i ‘uputu‘u pei ‘ona ‘ou tu‘uina atu ai ‘iā te ‘outou.
3. A ‘ou te loto ‘ina ‘ia ‘outou iloa, o le ulu o tane ta‘ito‘atasi o Keriso lea, o le ulu o le avā o le tane lea, a o le ulu o Keriso o le Atua lea.
4. ‘Ai se tane e tatalo pe perofeta ma lona ulu ‘ua ufiufitia, ‘ua fa‘alemigao ia i lona ulu.
5. ‘Ai se fafine fo‘i e tatalo pe perofeta ma lona ulu e lē ufiufitia, ‘ua fa‘alemigao ia i lona lava ulu; auā o le mea e tasi lava lea ma le tafi o lona lauulu.
6. Auā a lē ufiufitia le fafine ‘ia sele mamā lona lauulu; ‘ae ‘āfai o le mea e māsiasi ai ‘ona sele mamā pe tafi, ia ufiufitia lava ia.
7. Auā e lē tatau i le tane ‘ona ufiufitia e ia lona ulu, auā ‘ua foliga o ia i le Atua, ma lē vi‘ia ai o ia; a o le fafine o ia lē e vi‘ia ai le tane.
8. Auā e lē mai le fafine le tane, a o le fafine mai le tane ia.
9. Auā fo‘i na lē faia le tane ‘ona o le fafine, a o le fafine ‘ona o le tane.
10. O le mea lea e tatau ai i le fafine ‘ina ‘ia i ai le ufiufi i lona ulu, ‘ona o agelu.
11. ‘Ae ui lea, i le mafutaga a le Ali‘i, e lē ola to‘atasi le tane po‘o le fafine;
12. auā pei ‘ona maua mai le fafine i le tane, e fa‘apea fo‘i ‘ona fānau mai le tane i le fafine. A o mea uma lava mai le Atua ia.
13. ‘Inā mānatunatu ifo ia ‘outou, pe tatau ‘ona tatalo o le fafine i le Atua ma le lē ufiufitia.
14. E lē a‘oa‘o mai ‘ea le mafaufau ‘iā te ‘outou, a ‘u‘umi le lauulu o le tane, o le mea lava lea e mā ai o ia?
15. ‘Ae ‘āfai e ‘u‘umi le lauulu o le fafine, o le mea lea e vi‘ia ai o ia; auā ‘ua foa‘i mai lona lauulu e fai ma ufiufi ‘iā te ia.
16. ‘Ae ‘āfai e fia fīnau se tasi, e leai se tu fa‘apea ‘iā i matou, e leai fo‘i i ekalesia a le Atua.
17. A ‘ou te lē vivi‘i atu ‘iā te ‘outou i le mea ‘ou te fai atu ai nei, ‘ona ‘ua lē i‘u i se lelei la ‘outou fa‘apotopoto, ‘ae i‘u i le leaga.
18. Auā e muamua lea, ‘ua logo mai ‘iā te a‘u, pe a potopoto ‘outou i le ekalesia, ‘ua ‘iā te ‘outou māseiga; ‘ua ‘ou tāofi fo‘i e moni nisi mea;
19. auā e ao ‘ina tupu o fēvaevaea‘iga ‘iā te ‘outou, ‘ina ‘ia fa‘aalia o ē ‘ua fa‘amaoni o ‘iā te ‘outou.
20. O lenei, pe a potopoto ‘outou i le mea e tasi, e lē fa‘apea ‘outou ‘ina ‘ia ‘outou ‘a‘ai i le talisuaga a le Ali‘i.
21. Auā a ‘a‘ai, ‘ua ta‘ito‘atasi ma mua‘i fai lana lava talisuaga; ‘ua laina le tasi, ‘ua ‘onā le tasi.
22. E leai ‘ea lava ni o ‘outou fale tou te ‘a‘ai ai ma inu ai? Po ‘ua fa‘atauva‘a ‘ea ‘iā te ‘outou le ekalesia a le Atua, ma ‘outou fa‘amāina e ‘ua matitiva? Se a ‘ea se ‘upu ‘ou te fai atu ai ‘iā te ‘outou? ‘Ou te vivi‘i atu ‘ea ‘iā te ‘outou i lenā mea? ‘Ou te lē vivi‘i lava.
23. O a‘u, na ‘ou maua mai le Ali‘i le mea na ‘ou tu‘uina atu ‘iā te ‘outou, o lea lava po na fa‘alataina ai le Ali‘i o Iesu, na ia tago ai i le areto,
24. ‘ua ia fa‘afetai, ‘ona tofitofi ai lea, ma fai atu, “O lo‘u tino lenei mo ‘outou, ‘ia ‘outou faia lenei mea ma fa‘amanatuga ‘iā te a‘u.”
25. ‘Ua ia fa‘apea fo‘i i le ipu ‘ina ‘ua uma ‘ona ‘a‘ai, ‘ua fa‘apea atu, “O le ipu lenei o le feagaiga fou lea i lo‘u toto; ‘ia ‘outou faia lenei mea ma fa‘amanatuga ‘iā te a‘u i aso uma tou te feinu ai.”
26. Auā o aso uma tou te ‘a‘ai ai i lenei areto, ma feinu i lenei ipu, tou te fa‘ailoa atu ai le maliu o le Ali‘i se‘ia afio mai o ia.
27. O lenei, ‘ai sē ‘ai i lenei areto, pe inu i le ipu a le Ali‘i ma le fa‘alētatau, e nofo sala o ia i le fa‘aleagaina o le tino ma le toto o le Ali‘i.
28. A ‘ia su‘esu‘e ifo le tagata ‘iā te ia, i le ‘ai ai o ia i lenei areto, ma inu i lenei ipu.
29. Auā o lē ‘ai ma inu, ‘ua ‘ai ma inu o ia i lona lava fa‘amasinoga pe a lē fa‘autauta o ia i le tino.
30. O le mea lea ‘ua mama‘i ai ma vaivai ai nisi o ‘outou e to‘atele, ma nisi e to‘atele ‘ua latou momoe.
31. Auā ‘āfai ‘ana tatou fa‘amasino ‘iā te i tatou, po ‘ua lē fa‘asalaina i tatou.
32. A ‘ua a‘oa‘iina i tatou e le Ali‘i ‘ina ‘ua fa‘amasinoina, ‘ina ne‘i matuā fa‘asalaina i tatou fa‘atasi ma le lalolagi.
33. O lenei, o‘u uso e, pe a ‘outou fa‘apotopoto e ‘a‘ai, ‘ia fa‘atalitali ‘outou le tasi i le tasi;
34. ‘āfai fo‘i e fia ‘ai se tasi, ‘inā ‘ai ia i lona lava fale; ‘ina ne‘i ‘avea la ‘outou potopotoga ma mea e fa‘asalaina ai ‘outou. O mea o totoe ‘ou te fa‘atonu i ai pe a ‘ou alu atu.