1. A o mea e fasia mo tupua: ‘ua tatou iloa, “auā ‘ua tofu i tatou ma le poto.” E fa‘afefete le poto, a o le alofa e fa‘amafanafana lea.
2. ‘Āfai fo‘i e manatu se tasi ‘ua nā iloa se mea, e le‘i iloa lava e ia se mea e tasi pei ‘ona tatau ‘ona iloa;
3. ‘ae ‘āfai e alofa atu se tasi i le Atua, ‘ua silafia lenā tagata e ia.
4. A o le ‘ai i mea e fasia mo tupua, ‘ua tatou iloa, “e lē i ai moni ni tupua;” “e leai fo‘i se tasi Atua, ‘ua na o le to‘atasi lava.”
5. Auā e ui lava ‘ina o i ai ē ‘ua ta‘ua o atua, o i le lagi ma le lalolagi (‘ona ‘ua i ai atua e to‘atele, ma ali‘i e to‘atele)
6. ‘ae peita‘i ‘ua ‘iā te i tatou le Atua e to‘atasi o le Tamā ia, e fua mai ‘iā te ia mea uma, o i tatou fo‘i ‘ua fai mo ia; ma le Ali‘i e to‘atasi o Iesu Keriso, ‘ua faia e ia mea uma, o i tatou fo‘i ‘ua faia e ia.
7. A ‘ua lē tofu poto tagata; o i ai nisi sa masani ma tupua ma o lo‘o ‘a‘ai pea ma le manatu i ai e ui ‘ina fa‘aleagaina o latou loto fuatiaifo ‘ua vaivai.
8. “E lē lelei i tatou i luma o le Atua ‘ona o le mea e ‘ai.” Auā pe ‘āfai tatou te lē ‘a‘ai, e lē sili ai lo tatou leaga, pe ‘āfai fo‘i tatou te ‘a‘ai, e lē sili ai lo tatou lelei.
9. A ‘ia ‘outou fa‘aeteete, ne‘i ‘avea la ‘outou nei faitalia ma mea e tausuai ai ē ‘ua vaivai.
10. Auā a va‘ai se tasi ‘iā te oe le tagata malamalama, o lo‘o e ta‘oto e ‘ai i le fale o le tupua, pe lē fa‘amalosia ‘ea o ia ‘ina ‘ia ‘ai e ia i mea e fasia mo tupua, ‘ona ‘ua vaivai lona loto fuatiaifo?
11. O lo‘u poto fo‘i e fano ai le uso vaivai, o lē na maliu ai Keriso mo ia.
12. A fa‘apea fo‘i ‘ona ‘outou agasala i le ‘au uso, ma fa‘atausuai lo latou loto fuatiaifo vaivai, ‘ua ‘outou agasala ‘iā Keriso.
13. O lenei, ‘āfai e tausuai lo‘u uso ‘ona o le mea e ‘ai, ‘ou te lē toe ‘ai lava i tino o manu e o‘o i le fa‘avavau, ‘ina ne‘i tausuai ai lo‘u uso ‘iā te a‘u.#