1. ‘Ai so ‘outou la te fai se finauga ma se isi i se tasi mea, e fa‘amalosi ‘ea ia ‘ina ‘ia fa‘amasinoina i luma o ē amioletonu, ‘ae lē o luma o le ‘au pa‘ia?
2. Tou te lē iloa ‘ea e fa‘amasinoina le lalolagi e le ‘au pa‘ia? ‘Āfai fo‘i e fa‘amasinoina le lalolagi e ‘outou, e tusa ‘ea ‘outou ‘ona fai o fa‘amasinoga i mea aupito iti?
3. Tou te lē iloa ‘ea, tatou te fa‘amasino i agelu? E lē fa‘amasino ‘ea i mea a le olaga nei i se a?
4. ‘Āfai la ‘ua ‘iā te ‘outou ni matā‘upu fa‘apenā pe ‘ai se a ‘ea ‘ua ‘outou tu‘uina atu ai i luma o ē ‘ua aupito lē aloa‘ia e le ekalesia?
5. ‘Ou te fa‘apea atu ‘iā te ‘outou ‘ina ‘ia ‘outou māsiasi. Pe moni ‘ea e leai sē poto e to‘atasi o ‘iā te ‘outou, o lē na te mafaia ‘ona fa‘amasino i mea a lona uso?
6. ‘Ae peita‘i ‘ua fai finauga a le uso, ma ‘ua faia lea mea i luma o ē lē fa‘atuatua.
7. O lenei, ‘ua ‘outou matuā sesē lava, ‘ina ‘ua ‘iā te ‘outou finauga o le tasi i le tasi. Tou te lē ‘onosa‘i ‘ea i lē agaleaga i se a? Tou te lē ‘onosa‘i i sē a pe a gaoia a ‘outou mea?
8. ‘Ae peita‘i ‘ua ‘outou agaleaga atu ma fa‘agaoi, ma ‘ua faia ia mea i le ‘au uso.
9. Tou te lē iloa ‘ea o ē amio leaga, e lē fai mo latou tofi le mālō o le Atua? ‘Aua ne‘i fa‘asesēina ‘outou; o ē faita‘aga, ma ē ifo i tupua, ma ē mulilulua, ma ē tauātane, ma ē fa‘asotoma,
10. ma ē gaoi, ma ē matape‘ape‘a, ma ē ‘onā, ma ē agatele, ma ē fao mea, e lē fai mo latou tofi le mālō o le Atua.
11. Sa fa‘apea fo‘i nisi o ‘outou; a ‘ua tā‘e‘ele ‘outou, a ‘ua fa‘apa‘iaina ‘outou, a ‘ua ta‘uamiotonuina ‘outou i le suafa o le Ali‘i o Iesu Keriso, i le Agaga fo‘i o lo tatou Atua.
12. “‘Ua tataga mea uma ‘iā te a‘u,” a ‘ua lē aogā mea uma. “‘Ua tataga mea uma ‘iā te a‘u,” a o a‘u, e lē fa‘ato‘ilaloina a‘u i se tasi mea.
13. “E tatau mea e ‘ai i le manava, e tatau fo‘i le manava i mea e ‘ai;” ‘ae fa‘atau fa‘aumatia e le Atua o lenā ‘atoa ma ia mea. ‘Ae lē tatau le tino i le faita‘aga, ‘ae tatau i le Ali‘i; e tatau fo‘i le Ali‘i i le tino.
14. A o le Atua ‘ua na toe fa‘atūina le Ali‘i, na te toe fa‘atūina fo‘i i tatou i lona lava mana.
15. Tou te lē iloa ‘ea, o ‘outou tino o itū tino o Keriso ia? O lenei, ‘ou te ‘ave ‘ea itū tino o Keriso, ‘ae faia ma itū tino o le fafine talitane? ‘Aua ne‘i fa‘apea.
16. Tou te lē iloa ‘ea, ‘ua tino e tasi lē ‘ua fa‘atasia ma le fafine talitane? Auā o lo‘o fa‘apea mai, “E ‘avea i lā‘ua ma tino e tasi.”
17. ‘Ae peita‘i o lē ‘ua fa‘atasia ma le Ali‘i ‘ua la agaga e tasi ma ia.
18. ‘Inā sōsōla ‘ese ia ‘outou i le faita‘aga. ‘Ua auliuligia le tino i nisi agasala uma e faia e tagata; a o lē faita‘aga, e agasala ia i lona lava tino.
19. Tou te lē iloa ‘ea, o lo ‘outou tino o le malumalu lea o le Agaga Pa‘ia ‘ua i totonu ‘iā te ‘outou, o lo‘o ‘ua ‘iā te ‘outou mai le Atua, e le ‘aiā fo‘i ‘outou ‘iā te ‘outou?
20. Auā ‘ua fa‘atauina ‘outou i le tau; o lenei, ‘ia ‘outou vivi‘i atu i le Atua i o ‘outou tino ma o ‘outou agaga, o mea a le Atua ia.#