1. Niining higayona nagtigom ang kasundalohang Filistihanon alang sa gubat. Didto sila magtigom sa Soco nga sakop sa Juda ug nagkampo sila tungatunga sa Soco ug sa Azeka didto sa yuta sa Epesdamim.
2. Sa laing bahin, gitigom usab ni Saul ang kasundalohan sa Israel ug didto sila magkampo sa Walog sa Ela ug nangandam sila sa pagpakig-away sa mga Filistihanon.
3. Ang mga Filistihanon didto sa bukid atbang kanila ug ang nag-ulang kanila mao ang walog.
4. Unya migula gikan sa kampo sa mga Filistihanon ang usa ka maayong laki sa gubat. Siya mao si Goliat nga taga-Gat nga may gitas-on nga mga tulo ka metros.
5. Nagkalo siyag helmet nga bronsi ug may panalipod siya sa iyang lawas ug kini may gibug-aton nga 57 ka kilo nga bronsi.
6. Sa iyang bitiis may panalipod nga bronsi ug usa ka bangkaw nga bronsi usab nga iyang gikabiba.
7. Ang lawas sa iyang bangkaw sama kadako sa likisan sa hablanan ug ang uhas sa iyang bangkaw may gibug-aton nga pito ka kilo nga puthaw ug nag-una kaniya ang tigdala sa iyang taming.
8. Mibarog siya atbang sa mga sundalo sa Israel ug iyang gisinggitan sila, “Nganong nia man mo dinhi? Gubat diay ang inyong tuyo? Nia ko, usa ka Filistihanon, kamo mga sulugoon lang ni Saul. Pagpili kamog tawo aron makigsangka kanako!
9. Kon sa among panagsangka mapatay niya ako, kami mahimong inyong sulugoon. Apan kon mapatay ko siya, kamo mahimong among sulugoon.”
10. Unya miingon si Goliat, “Gihagit ko bisag kinsa kaninyong mga Israelita sa pag-ari diri aron magsangka kami.”
11. Sa pagkadungog ni Saul ug sa tanang mga Israelita niining hagit ni Goliat, nangahadlok sila pag-ayo.
12. Si David anak ni Jesse nga taga-Efrata nga didto magpuyo sa Betlehem sa Juda. Si Jesse may walo ka anak nga lalaki. Sa paghari ni Saul, si Jesse tigulang na kaayo.
13. Ang tulo ka magulang nga anak ni Jesse mikuyog kang Saul sa panggubatan. Sila mao si Eliab, ang kamagulangan, si Abinadab, ang sunod, ug dayon si Sama.
14. Ang kamanghoran mao si David
15. ug samtang ang iyang mga magulang mikuyog kang Saul, si David mag-ulian sa Betlehem aron pag-atiman sa mga karnero sa iyang amahan.
16. Nagpadayon sa paghagit si Goliat sulod sa 40 ka adlaw.
17. Unya si Jesse miingon kang David nga iyang anak, “Kuhaa kining napulo ka gantang nga bugas ug napulo ka buok pan ug dad-a dayon ngadto sa imong mga igsoon didto sa kampo.
18. Dad-a usab kining napulo ka baritang keso ngadto sa pangulo ug susiha unsa nay kahimtang nila ug pagdala usab nganhi bisag unsa gikan kanila.
19. Karon si Saul, ang imong mga igsoon ug ang tanang kasundalohan sa Israel atua didto sa Walog sa Elah nakigsangka sa mga Filistihanon.”
20. Sayo sa buntag gipabantayan ni David ug laing tawo ang mga karnero ug giandam niya ang mga balon ug milakaw siya sumala sa gisugo kaniya ni Jesse. Miabot siya sa gikampohan sa mga Israelita sa diha nga ang kasundalohan nagpaingon na sa panggubatan ug nagsinggit sa singgit sa gubat.
21. Ang mga Israelita ug ang mga Filistihanon pulos na andam sa kombati.
22. Unya gibilin ni David ang iyang dala sa tigbantay sa mga butang ug midagan siya ngadto sa kasundalohan aron paghimamat sa iyang mga igsoon.
23. Samtang nakigsulti siya kanila, ang kampiyon sa mga Filistihanon nga si Goliat nga taga-Gat mibulag sa pundok sa mga sundalo ug nanghagit na usab sa mga Israelita. Ug si David nakadungog kaniya.
24. Sa pagkakita sa mga Israelita kang Goliat, nangahadlok silang tanan ug nagpalayo kaniya.
25. Ug miingon ang mga Israelita ngadto sa usag-usa, “Nakita ba nimo kanang tawo nga nanghagit kanato? Ang makapatay kaniya gantihan sa hari ug daghang salapi ug ipaasawa niya ang iyang anak ug dili pa gayod pabuhison ang panimalay sa iyang amahan.”
26. Ug miingon si David sa mga tawo nga tupad kaniya, “Unsa kadtoy iganti sa tawo nga makapatay nianang Filistihanon ug makaluwas sa Israel gikan sa kaulawan? Kinsa ba kining dili motuog Dios nga Filistihanon nga nanghagit sa kasundalohan sa Dios nga buhi?”
27. Ug gisultihan siya sa mga tawo mahitungod sa ganti nga ihatag ngadto sa tawo nga maoy makapatay kang Goliat.
28. Si Eliab, ang kamagulangan niyang igsoon, nakadungog kang David nga nakigsulti sa mga tawo ug nasuko pag-ayo si Eliab kang David ug miingon, “Nganong mianhi ka man? Kinsa may gibinlan mo sa mga karnero didto sa kamingawan? Nasayod ako sa imong pagkahambugiro ug sa kadaotan sa imong tinguha. Mianhi ka lamang aron pagtan-aw sa gubat!”
29. Ug si David miingon, “Unsa may daotan kong nabuhat? Igo lamang ako nga nangutana.”
30. Ug mitalikod si David ug nangutana na usab sa lain ug mao gihapon ang gitubag nila kaniya.
31. Human makabati ang mga tawo sa gisulti ni David, gitaho nila kini kang Saul ug gipakuha ni Saul si David.
32. Si Saul giingnan ni David, “Dili ka angay mabalaka kay kining imong sulugoon maoy makigsangka niining Filistihanon.”
33. Ug si David giingnan ni Saul, “Dili ka takos nga makig-away nianang Filistihanon kay bata ka pa samtang siya anad na sa gubat sukad pa sa iyang pagkabatan-on.”
34. Apan si David mitubag kang Saul, “Kining imong sulugoon magbalantay sa mga karnero sa iyang amahan. Ug kon may liyon o oso nga motukob sa usa ka nating karnero,
35. gukdon ko kini ug bunalan ug agawon ko ang karnero gikan sa iyang baba. Kon mosumbalik kini kanako, gunitan ko kini sa bungot ug patyon.
36. Napatay sa imong sulugoon ang mga liyon ug mga oso ug kining dili motuog Dios nga Filistihanon mahisama kanila kay iya mang gihagit ang kasundalohan sa Dios nga buhi.”
37. Ug midugang si David, “Giluwas ako sa Ginoo gikan sa kuko ug baba sa mga liyon ug sa mga oso busa luwason usab ako niya gikan niining Filistihanon.”Miingon si Saul kang David, “Lakaw ug panalipdan ka unta sa Ginoo!”
38. Unya si David gipasul-ob ni Saul sa iyang kaugalingon bisti sa gubat. Gipakalo siyag helmet nga bronsi ug gisul-obag bisti alang sa gubat.
39. Gitakin ni David ang espada ni Saul apan naglisod siya paglakang kay wala man siya maanad niini. Miingon si David kang Saul, “Dili maayo nga magsul-ob ako niini kay wala man ako maanad.” Busa gihukas kini ni David.
40. Unya gikuha niya ang iyang sungkod ug nagpili siyag lima ka buok batong hamis didto sa suba ug iya kining gisulod sa iyang puntil. Dala ang iyang lambuyog, miduol siya kang Goliat.
41. Mitagbo usab kang David si Goliat, ug ang tigdala sa iyang kasangkapan sa gubat nag-una kaniya.
42. Sa pagkakita ni Goliat kang David, nakamenos siya kang David kay batan-on pa man si David ug pulapulag aping ug guwapo.
43. Unya iyang giingnan si David, “Iro ba ako nga imo lamang hadlokon ug bunal?” Ug gitunglo niya si David sa ngalan sa iyang mga dios.
44. Miingon siya, “Duol kanako kay ipakaon ko sa mga langgam ug sa mga mananap ang imong unod.”
45. Unya giingnan ni David si Goliat, “Miduol ka kanako dala ang imong espada ug bangkaw apan ako makigsangka kanimo sa ngalan sa Ginoo nga Labing Gamhanan, ang Dios sa kasundalohan sa Israel nga imong gipasipad-an.
46. Niining adlawa itugyan ka kanako sa Ginoo ug patyon ko ikaw ug punggotan sa imong ulo. Ipakaon ko sa mga langgam ug sa ihalas nga mga mananap ang mga patayng lawas sa kasundalohan sa mga Filistihanon aron ang tibuok kalibotan masayod nga may Dios sa Israel
47. ug aron ang tanan nga nagkatigom karon dinhi masayod nga ang Ginoo magluwas dili pinaagi sa espada ug sa bangkaw. Ang Ginoo maoy makig-away ug itugyan ka niya sa among kamot.”
48. Unya si Goliat midasdas kang David ug si David usab nagdagan nga misugat kaniya.
49. Mikuot si David ug bato sa iyang puntil ug gipahimutang niya kini sa iyang lambuyog ug gipunting niya ug naigo ang agtang ni Goliat. Nalubong sa iyang agtang ang bato ug nalukapa siya.
50. Busa pinaagi sa lambuyog nabuntog ug napatay ni David si Goliat; si David walay dalang espada.
51. Unya midagan si David ngadto kang Goliat ug gilunggoan niya siya sa ulo ginamit ang espada niini.Sa pagkakita sa mga Filistihanon nga patay na ang ilang sinaligan, nanagan sila.
52. Ug ang kasundalohan sa Israel ug sa Juda naninggit ug gigukod nila ang mga Filistihanon gikan sa Gat hangtod sa Ekron. Nagpasad ang samdan nga mga Filistihanon gikan sa dalan paingon sa Shaaraim hangtod sa Gat ug Ekron.
53. Unya namalik ang mga Israelita ug ilang gikuha ang kabtangan sa mga Filistihanon nga gipamiyaan didto sa kampo.
54. Unya gikuha ni David ang ulo ni Goliat ug iya kining gidala sa Jerusalem apan gibutang niya ang kasangkapan ni Goliat didto sa iyang tolda.
55. Sa pagkakita ni Saul kang David nga nakig-away kang Goliat, gipangutana niya si Abner, ang pangulo sa kasundalohan, “Abner, kang kinsa mang anak kining batan-ona?”Ug si Abner miingon, “Kamahalan, wala ako masayod.”
56. Unya misugo ang hari, “Pangutana kon kang kinsa kini siyang anak.”
57. Sa pag-abot ni David, gidala siya ni Abner ngadto kang Saul. Gibitbit ni David ang ulo ni Goliat.
58. Ug si Saul miingon kaniya, “Kang kinsa ka mang anak?”Si David mitubag, “Anak ako sa imong sulugoon nga si Jesse nga taga-Betlehem.”