1. Ang Sudlanan sa Kasabotan sa Ginoo nagpabilin didto sa yuta sa mga Filistihanon sulod sa pito ka bulan.
2. Usa ka adlaw niana, gipatawag sa mga kadagkoan sa Filistihanon ang ilang mga pari ug ang mga manalagna ug gipangutana nila, “Unsay angay natong buhaton sa Sudlanan sa Kasabotan sa Ginoo. Unsaon man nato pag-uli niini sa iyang dapit?”
3. Mitubag sila, “Kon iuli ninyo kini, paubanig halad alang sa sala. Unya mangaayo kamo ug mahibaloan ninyo nganong gikastigo kamo niya.”
4. Ug nangutana sila, “Unsa mang halara alang sa sala ang among ihalad sa Ginoo?” Mitubag sila, “Lima ka buok bulawan nga giporma sama sa hubag ug lima ka buok bulawan nga giporma samag ilaga sumala sa gidaghanon sa mga kadagkoan sa mga Filistihanon kay mao kini ang katalagman nga nahiagoman ninyo ug sa inyong kadagkoan.
5. Busa pagpakulit kamog mga hulagway sa mga hubag ug mga ilaga nga midagmal sa inyong kayutaan ug isugid ninyo ang inyong kasal-anan sa Dios sa Israel basin pag dili na kamo niya kastigohon ingon man ang inyong mga dios ug ang inyong nasod.
6. Nganong nagmagahi man kamo sa inyong kasingkasing sama sa gibuhat sa mga Ehiptohanon ug sa Paraon? Human sila duladulai sa Dios, dili ba nga gipalakaw man sa mga Ehiptohanon ang mga Israelita?
7. Busa andama ninyo karon ang usa ka karomata ug duha ka baka nga gatasan nga wala pa kasangonig yugo. Sangoni kini sa karomata apan ibulag kanila ang ilang mga nati.
8. Unya kuhaa ang Sudlanan sa Kasabotan sa Ginoo ug ikarga kini sa karomata ug isulod sa kahon nga anaa sa kilid sa karomata ang mga larawan nga bulawan nga inyong ihalad kaniya ingon nga halad alang sa sala. Unya pasubaya sa dalan ang karomata nga walay tawo nga magdala.
9. Kon mopadulong kini sa yuta sa mga Israelita agi sa Betsemes, ang Dios gayod sa Israel ang naghimo niining dakong kadaot. Apan kon dili, makaingon kita nga dili ang Dios sa Israel maoy nagsilot kanato kondili sulagma lamang kini.”
10. Gituman sa mga tawo ang sugyot. Mikuha silag duha ka baka nga gatasan ug ila kining gisangonan sa karomata ug gisulod nila sa koral ang mga nati.
11. Unya gibutang nila ang Sudlanan sa Kasabotan sa Ginoo didto sa karomata ingon man ang kahon nga may mga bulawan nga gipormag mga ilaga ug mga hubag.
12. Ug ang mga baka midiritso sa Betsemes subay sa usa ka dakong dalan ug nanag-inga kini samtang naglakaw. Wala silay simangsimang ug ang mga kadagkoan sa mga Filistihanon nagsunod kanila hangtod sa utlanan sa Betsemes.
13. Niining higayona nag-ani ang katawhan sa Betsemes sa ilang trigo didto sa walog. Ug sa paglantaw nila ilang nakita ang Sudlanan sa Kasabotan sa Ginoo ug nangalipay sila.
14. Sa pag-abot niini sa uma ni Josue sa Betsemes, mihunong kini. May dakong bato didto ug gibugha sa mga tawo ang karomata ug gipatay nila ang mga baka ug gisunog ingon nga halad ngadto sa Ginoo.
15. Ug gikuha sa mga Levita ang Sudlanan sa Kasabotan ug ang kahon nga tupad niini nga gisudlan sa mga hulagway nga bulawan ug unya ilang gipahimutang kini ibabaw sa dakong bato. Ug niadtong adlawa ang mga tawo sa Betsemes naghalad ngadto sa Ginoo.
16. Unya human kini makita sa lima ka pangulo nga Filistihanon, namauli sila sa Ekron niadtong adlawa.
17. Ang mga bulawang larawan sa mga hubag nga gipadala sa mga Filistihanon ingon nga halad sa sala alang sa Ginoo nagrepresentar sa mga siyudad sa Asdod, sa Gaza, sa Ascalon, sa Gat ug sa Ekron.
18. Ang mga bulawang larawan sa mga ilaga nagrepresentar usab sa mga siyudad sa mga Filistihanon nga gimandoan sa lima ka pangulo, mga siyudad nga gilibotag mga kota ug mga balangay nga walay paril. Maoy saksi hangtod niining adlawa ang dakong bato diin gitungtong nila ang Sudlanan sa Kasabotan didto sa uma ni Josue sa Betsemes.
19. Unya gipamatay sa Ginoo ang pipila ka tawo sa Betsemes kay milili man sila sa Sudlanan sa Kasabotan sa Ginoo. Gipamatay sa Ginoo ang 70 ka tawo ug nagbangotan ang katawhan tungod sa dakong kamatay nga gihimo sa Ginoo.
20. Busa ang mga tawo sa Betsemes miingon, “Kinsay makasukol sa Ginoo, ang Dios nga balaan? Ug kinsa na kaha usab ang isunod niya pagpatay?”
21. Busa ilang gipadad-ag mga mensahero ang mga lumolupyo sa siyudad sa Jearim ug ilang giingnan, “Giuli sa mga Filistihanon ang Sudlanan sa Kasabotan sa Ginoo. Ngari kamo ug kuhaa ninyo kini.”