1. Unya namatay si Samuel ug nagtigom ang tanang mga Israelita ug nagbangotan alang kaniya. Gilubong nila siya didto sa iyang puloy-anan sa Rama.Unya miadto si David sa kamingawan sa Paran.
2. Didto may tawo nga taga-Maon nga may negosyo sa Carmel. Dato siya kaayo ug aduna siyay 3,000 ka karnero ug 1,000 ka kanding. Niining higayona nanupi siya sa iyang mga karnero didto sa Carmel.
3. Si Nabal ang iyang ngalan ug ang iyang asawa mao si Abigail, usa ka babaye nga masinabuton ug maanyag, apan si Nabal bastos ug daotag batasan. Kaliwat siya ni Caleb.
4. Samtang didto si David sa kamingawan, nakabalita siya nga si Nabal nanupi sa iyang mga karnero.
5. Busa nagsugo si David ug napulo ka batan-on ug giingnan niya sila, “Ngadto kamo sa Carmel ug ingna si Nabal nga nangomusta si David kanimo.
6. Ug ingna ninyo siya, ‘Ang kalinaw maimo unta ug sa imong banay ug sa tanan nga anaa kanimo.
7. Nakabalita ako nga imong gipatupihan ang imong mga karnero. Nahiari diri ang mga magbalantay sa imong mga karnero ug wala namo sila unsaa ug wala sila kawad-i bisag unsa samtang diri sila sa Carmel.
8. Pangutan-a sila ug sultihan ka nila sa tanan. Abiabiha kining mga batan-on nga akong mga sinugo kay pista man karon. Hatagi kutob sa imong mahimo kining imong mga sulugoon ug ang imong anak nga si David.’”
9. Sa pag-atubang sa mga batan-on nga sinugo ni David, ilang gisultihan si Nabal niini sa ngalan ni David unya naghulat silag tubag.
10. Unya gitubag ni Nabal ang mga sinugo ni David, “Kinsa man kini si David? Kinsa man kining anak ni Jesse? Karong panahona daghang mga sulugoon ang milayas gikan sa ilang mga agalon.
11. Nganong ihatag ko man ang akong pan ug ang akong tubig ug ang akong karne nga gitagana ko sa akong mga manunupi sa mga karnero ug ipakaon kini sa mga tawo nga wala ko gani hisayri kon taga diin?”
12. Busa namauli ang mga sinugo ni David ug gisuginlan nila si David niining tanan.
13. Ug miingon si David sa iyang mga sakop, “Andama ang inyong mga espada.” Busa ang tagsatagsa kanila nagkuha sa iyang espada ingon man si David. Mga 400 ka tawo ang mikuyog kang David samtang nagpabilin ang 200 ka tawo aron pagbantay sa ilang kasangkapan.
14. Apan usa sa mga batan-on ang mibalita kang Abigail, ang asawa ni Nabal, “Si David nagsugog mga tawo gikan sa kamingawan aron pagpangomusta sa among agalon apan iya hinuon silang giinsulto.
15. Maayo kaayo kanamo ang mga tawo ug wala kami pasipad-i ug walay nakulang kanamo samtang didto kami sa kaumahan sa panahon nga amo silang gikauban.
16. Gipanalipdan kami nila sa adlaw ug sa gabii samtang nagbantay kami sa mga karnero.
17. Hunahunaa kini pag-ayo ug himoa ang angay nga buhaton. Makadaot kini sa atong agalon ug sa iyang banay. Daotan siya kaayo ug dili mamati kang bisan kinsa.”
18. Busa midali si Abigail pagkuhag 200 ka buok pan, duha ka sudlanan nga panit nga puno ug bino ug lima ka karnero nga inihaw ug lima ka bakid nga bugas, 100 ka pungpong nga ubas ug 200 ka torta nga hinimo gikan sa bunga sa igera ug gikarga kini sa mga asno.
19. Ug giingnan niya ang iyang mga batan-ong sulugoon, “Una kamo kanako kay mosunod ako kaninyo.” Apan wala niya sultihi ang iyang bana mahitungod niini.
20. Unya sa paglugsong ni Abigail nga nagsakay sa asno gikan sa bukid gikasugat niya si David ug ang iyang mga tawo.
21. Nakaingon si David sa iyang kaugalingon, “Anugon lang ang akong pagbantay sa kabtangan ni Nabal didto sa kamingawan nga tungod niini wala siya kawad-i bisag unsa apan gibaslan niya akog daotan.
22. Silotan unta ako sa Dios ug labaw pa niana kon inigkabuntag may magpabiling lalaki kanila nga buhi!”
23. Sa pagkakita ni Abigail kang David, midali siya pagkanaog sa asno ug miluhod siya sa atubangan ni David.
24. Miluhod siya sa tiilan ni David ug miingon, “Ako maoy pakasad-a! Tugoti ako sa pagpakigsulti kanimo ug pamatia intawon ang isulti niining ubos mong sulugoon.
25. Ayaw lag tagda kining daotang tawo nga si Nabal kay buangbuang kana siya sumala sa iyang ngalan nga Nabal. Apan wala ako makakita sa mga batan-on nga imong gisugo.
26. Busa ipanumpa ko kanimo sa ngalan sa buhi nga Ginoo nga silotan gayod ang tanang mga kaaway nga buot mopasipala kanimo ingon man si Nabal.
27. Aniay mga gasa nga akong gidala. Ihatag kini sa imong mga sakop.
28. Pasayloa intawon kining imong sulugoon sa bisan unsang sayop nga iyang nahimo. Ang Ginoo maghimo kanimong hari ug ingon man sa imong mga kaliwat kay nakiggubat man ikaw alang kaniya ug walay daotan nga modangat kanimo samtang buhi ka pa.
29. Kon may makigbatok ug maninguha sa pagpatay kanimo, panalipdan ka gayod sa Ginoo nga imong Dios apan isalikway sa Ginoo sama sa bato nga gilambuyog ang imong kaaway.
30. Unya kon matuman na ang tanang maayo nga gisaad sa Ginoo kanimo ug mahimo ka nang hari sa Israel,
31. wala ka unyay kagul-an o basolan kay wala ka man magpatay sa wala lamay hinungdan aron ikaw makapanimalos. Unya kon panalanginan ka na sa Ginoo, hinumdomi kining imong ulipon.”
32. Unya si David miingon kang Abigail, “Dalaygon ang Ginoo, ang Dios sa Israel nga nagpadala kanimo nganhi kanako niining adlawa aron pagpakigkita kanako!
33. Dalaygon ang imong gibuhat ug bulahan ka kay ikaw may nakapugong kanako sa pagpatay ug sa pagpanimalos.
34. Kay ipanumpa ko sa ngalan sa buhing Dios sa Israel nga nagpugong kanako sa pagpasipala kanimo, nga kon wala ka pa modali sa pag-anhi aron sa pagpakigkita kanako, ugma unta sa buntag hutdon ko pagpamatay si Nabal ug ang tanan niyang sakop.”
35. Unya gidawat ni David ang gigasa ni Abigail kaniya ug giingnan niya si Abigail, “Pauli sa inyo nga malinawon ug matuman ang imong gipangayo.”
36. Unya sa paghiuli ni Abigail, nakaplagan niya si Nabal nga nagbangkiteg dako nga buhaton lamang sa usa ka hari. Nagmalipayon siya pag-ayo ug labihang huboga ug tungod niini nagpakahilom lamang si Abigail hangtod sa pagkasunod adlaw.
37. Sa pagkabuntag, sa gihuwasan na sa kahubog si Nabal, gisultihan siya ni Abigail sa tanan ug giataki siya sa kasingkasing ug mitikig.
38. Unya napulo ka adlaw sukad niadtong higayona, gikastigo sa Ginoo si Nabal ug namatay si Nabal.
39. Sa pagkabalita ni David nga patay na si Nabal, miingon siya, “Dalaygon ang Ginoo nga nanimalos kang Nabal sa iyang pagpakaulaw kanako ug nagpalikay kanako sa paghimog daotan! Gisilotan na gayod sa Ginoo ang pagkadaotan ni Nabal.”Unya nagpadala si David ug mga sinugo aron pagsulti kang Abigail nga buot siya nga mangasawa kaniya.
40. Ug sa pag-abot sa mga sinugo didto sa Carmel, giingnan nila si Abigail, “Gipaanhi kami ni David aron pagkuha kanimo kay buot siyang mangasawa kanimo.”
41. Ug si Abigail mitindog ug miyukbo ug miingon, “Alagad ako niya ug andam sa paghugas sa tiil sa mga sulugoon sa akong agalon.”
42. Unya mikabayo si Abigail sa usa ka asno ug uban sa iyang lima ka sulugoong babaye misunod siya sa mga sinugo ni David ug nahimo siyang asawa ni David.
43. Gipangasawa usab ni David si Ahinoam nga taga-Jezreel ug siya ug si Abigail nahimo nga iyang mga asawa.
44. Gikuha ni Saul si Mical nga iyang anak nga asawa ni David ug gipaasawa niya kang Paltiel nga anak ni Lais nga taga-Galim.