1. May usa ka kaliwat ni Benjamin nga ginganlag Kis. Si Kis anak ni Abiel nga anak ni Seror nga anak ni Bekorat nga anak ni Apia. Dato kaayo si Kis.
2. May anak siya nga ginganlag Saul nga batan-on ug guwapo. Sa Israel walay makalabaw kaniya sa kaguwapo ug siyay labing taas kay ang uban taga abaga man lamang niya.
3. Usa ka adlaw niana, nawala ang mga asno ni Kis nga amahan ni Saul. Busa giingnan ni Kis si Saul, “Pauban ug usa sa mga sulugoon ug pangitaa ninyo ang mga asno.”
4. Miagi sila sa kabukiran sa Efraim ug sa yuta sa Salisa apan wala nila makit-i ang mga asno. Unya miadto sila sa yuta sa Saalim apan wala gihapon nila hikit-i didto. Unya gilukop nilag suroy ang yuta sa Benjamin apan wala gayod nila makit-i ang mga asno.
5. Sa pag-abot nila sa yuta sa Zuph, si Saul miingon sa iyang sulugoon, “Mamauli na lamang kita kay tingalig mabalaka kanato ang akong amahan ug dili na hinuon sa mga asno.”
6. Apan miingon ang sulugoon kaniya, “Hulat una! May alagad sa Dios nga nagpuyo niining siyudara ug gitahod siya sa tanan kay matuman man ang tanan nga iyang isulti. Mangadto kita kaniya kay tingalig may ikasulti siya kanato kon asa nato makit-i ang mga asno.”
7. Giingnan ni Saul ang iyang sulugoon, “Unya kon moadto kita, unsa may atong igasa kaniya? Nahurot na ang pagkaon nga atong gidala ug wala kitay ikagasa sa alagad sa Dios. Unsa may atong ihatag?”
8. Mitubag ang sulugoon, “Aniay akong gamayng tipik nga plata ug kini ang ihatag ta kaniya aron sultihan kita niya asa nato makita ang mga asno.”
9-11. Ug si Saul miingon sa iyang sulugoon, “Husto, mangadto kita.” Busa nangadto sila sa siyudad nga gipuy-an sa alagad sa Dios. Sa pagtungas nila sa bungtod paingon sa siyudad, may gikasugat silang mga batan-ong dalaga nga nagkalos ug tubig ug gipangutana nila sila, “Anaa ba sa siyudad ang mananagna?”(Kaniadto sa Israel kon adunay magpakisayod sa Dios, moingon siya, “Mangadto kita sa mananagna,” kay kaniadto ang ginganlag mananagna, karon ginganlan nag propeta.)
12. Mitubag ang mga babaye, “Oo, anaa. Nag-una lamang siyag diyutay kaninyo. Miabot siya sa siyudad kay ang katawhan maghalad karon didto sa halaran sa ibabaw sa bungtod. Apan kon magdali kamo maabtan pa ninyo siya.
13. Inigsulod ninyo sa siyudad makaplagan ninyo siya sa dili pa siya motungas sa bungtod aron pagkaon. Ang mga tawo dili gud mangaon hangtod nga moabot siya kay gikinahanglan man nga iya unang panalanginan ang halad sa dili pa sila mangaon. Kon motungas kamo karon makita dayon ninyo siya.”
14. Busa miadto sila sa siyudad. Sa ilang pagsulod gikatagbo nila si Samuel sa iyang pagpaingon sa halaran ibabaw sa bungtod.
15. Sa adlaw sa wala pa moabot si Saul, giingnan na sa Ginoo si Samuel,
16. “Ugma sa ingon niining taknaa, may tawo nga kaliwat ni Benjamin nga paanhion ko kanimo. Dihogi siya aron mahimo siyang pangulo sa akong katawhan, ang Israel. Luwason niya ang akong katawhan gikan sa mga Filistihanon. Nasayod ako sa giantos sa akong katawhan ug nadungog ko ang ilang pagpakitabang.”
17. Sa pagkakita ni Samuel kang Saul, giingnan siya sa Ginoo, “Mao kining tawhana ang giingon ko kanimo nga maghari sa akong katawhan.”
18. Unya miduol si Saul kang Samuel didto sa ganghaan ug miingon kaniya, “Tudloi ako sa balay sa mananagna.”
19. Mitubag si Samuel kang Saul, “Ako ang mananagna. Pag-una kanako ngadto sa bungtod kay karong adlawa makigsalo ako kanimo ug sa pagkabuntag suginlan ko ikaw sa tanan nga anaa sa imong hunahuna ug palakton ko ikaw.
20. Ayaw kabalaka sa imong mga asno nga nawala tulo ka adlaw na karon kay nakaplagan na sila. Ug kinsa may angay magpahimulos sa tanang maayong butang dinhi sa Israel? Dili ba kini alang man kanimo ug sa tibuok banay sa imong amahan?”
21. Mitubag si Saul, “Kaliwat ako sa banay ni Benjamin, ang labing gamay sa mga banay sa Israel ug ang akong panimalay maoy labing ubos sa banay ni Benjamin. Nganong nakasulti ka man niini?”
22. Unya gidala ni Samuel si Saul ug ang iyang sulugoon ngadto sa kan-anan ug gihimo siyang labing pinasidunggan sa 30 ka dinapit.
23. Ug giingnan ni Samuel ang kusinero, “Dad-a nganhi ang bahin nga gipalain ko kanimo.”
24. Busa gikuha sa kusinero ang tibuok paa ug gidulot kang Saul. Unya si Samuel miingon, “Mao kini ang among gitagana kanimo. Kaon uban sa mga dinapit.”Busa mikaon si Saul uban kang Samuel.
25. Ug sa paglugsong nila gikan sa halaran ngadto sa siyudad, giandam alang kang Saul ang usa ka higdaanan didto sa atop, ug natulog si Saul didto.
26. Sayo sa pagkabuntag gitawag ni Samuel si Saul, “Bangon na kay pagikanon ko na kamo.” Busa mibangon si Saul ug kuyog ni Samuel nanggula sila ngadto sa dalan.
27. Samtang naglakaw sila paingon sa gawas sa siyudad, giingnan ni Samuel si Saul, “Paunaha ang imong sulugoon ug unya hunong makadiyot kay sultihan ko ikaw sa pulong sa Dios.”