9. “Wanneer julle in ’n kamp woon omdat julle oorlog gaan maak teen vyande, dan moet julle oppas, julle moet niks doen wat verkeerd is nie.
10. Wanneer daar in die nag met ’n man iets gebeur het wat hom onrein laat word, dan moet hy uit die kamp gaan, hy mag nie in die kamp bly nie.
11. Wanneer dit aand word, dan moet hy hom was, en wanneer die son ondergaan, dan mag hy terugkom in die kamp.
12. Julle moet buite die kamp ’n plek maak wat julle kan gebruik soos ’n toilet en julle moet daarnatoe gaan wanneer iemand moet gaan ontlas.
13. Die persoon wat daarnatoe gaan, moet ’n tentpen saamneem, en wanneer hy klaar gesit het, moet hy ’n gat grawe en sy ontlasting toemaak.
14. Julle God die Here gaan saam met julle in julle kamp om julle te red en om julle te laat wen teen julle vyande. Daarom moet julle kamp gewyd wees, sodat die Here nie iets sal sien waarvan Hy nie hou nie, want dan sal Hy weggaan van julle.”
15. “Wanneer slawe wegvlug van hulle eienaars en hulle kom na julle toe, dan mag julle nie die slawe teruggee vir hulle eienaars nie.
16. Die slawe mag by julle woon waar hulle wil, hulle mag woon in julle stede, op enige plek wat hulle kies. Julle mag hulle nie laat swaarkry nie.”
17. “’n Israelitiese vrou of man mag nie ’n tempel-prostituut wees nie.
18. Julle mag nie die beloning van ’n prostituut of die geld wat ’n mansprostituut kry, in die tempel gebruik om ’n gelofte te betaal nie. Die Here haat altwee.”
19. “Julle mag nie vir Israeliete sê hulle moet rente betaal wanneer julle geld of kos of enige iets vir hulle leen nie.
20. Jy mag sê mense wat nie Israeliete is nie, moet rente betaal, maar julle mag nie vir Israeliete sê hulle moet rente betaal nie. As julle gehoorsaam is aan julle God die Here, dan sal Hy julle seën in die land waarnatoe julle gaan om dit vir julleself te vat.”
21. “Wanneer jy ’n gelofte gemaak het aan die Here, dan moet jy dadelik doen wat jy belowe het, want jou God die Here wil hê jy moet dit doen. As jy dit nie doen nie, dan doen jy sonde.
22. Maar as jy nie ’n gelofte maak nie, dan sal jy nie sonde doen nie.