6. një Perëndi dhe Atë i të gjithëve, që është mbi të gjithë, që vepron përmes të gjithëve dhe që banon në të gjithë.
7. Kështu, secilit nga ne iu dha hiri në atë masë që Krishti deshi të na dhurojë.
8. Prandaj Shkrimi i shenjtë thotë: Kur u ngrit në lartësi, të robëruarit i bëri robër të tij dhe njerëzve u dha dhunti.
9. Fjalët ‘u ngrit’, a nuk do të thonë se ai kishte zbritur më parë në pjesët më të ulëta të tokës?
10. Ai që zbriti është po ai që edhe u ngrit përmbi gjithë qiejt, që të përmbushë gjithçka.
11. Disa ai i bëri apostuj, disa i bëri profetë, disa i bëri ungjilltarë, disa i bëri barinj e mësues,
12. që të përgatisë besimtarët e krishterë për të kryer veprën e shërbimit ndaj të tjerëve, për rritjen në besim të trupit të Krishtit,
13. derisa të arrijmë të gjithë në unitetin e besimit dhe në njohjen e Birit të Perëndisë. Kështu do të bëhemi njerëz të përsosur, sipas masës së përsosmërisë së Krishtit,
14. që të mos jemi më foshnja, të hedhur andej-këtej dhe që i vërtit era e çdo mësimi njerëzor, e që e lënë veten të mashtrohen nga dinakëria e dredhia e njerëzve.
15. Por, duke dëshmuar të vërtetën me dashuri, le të rritemi plotësisht drejt atij që është kreu, Krishtit.
16. Ai bashkon e lidh gjithë trupin nëpërmjet nyjeve dhe çdo gjymtyrë, sipas funksionit, ndihmon në rritjen e trupit dhe në forcimin e tij në dashuri.
17. Prandaj, në emër të Zotit, po ju them e po ju përbetohem: mos jetoni më ashtu siç jetojnë kombet pagane, që mendojnë kotësira.
18. Ata e kanë mendjen të errësuar dhe janë larguar nga jeta e Perëndisë, për shkak të padijes që kanë dhe për shkak të ngurtësimit të zemrave të tyre.
19. Ata janë bërë të pandjeshëm, e kanë lëshuar veten në fëlligështi dhe me lakmi të pangopur kryejnë vepra të ndyra.
20. Por ju nuk e keni njohur kështu Krishtin.
21. Sigurisht ju e keni dëgjuar Jezuin dhe jeni mësuar prej tij, sipas së vërtetës që gjendet në të.
22. Hidhni tej mënyrën e mëparshme të të jetuarit dhe njeriun e vjetër që shkatërrohet nga epshet mashtruese.
23. Përtërihuni në shpirtin dhe në mendjen tuaj
24. dhe vishni njeriun e ri, që Perëndia e krijoi për të jetuar në drejtësinë dhe në shenjtërinë që vijnë nga e vërteta e tij.
25. Prandaj, hidhni tej gënjeshtrat dhe çdonjëri t’i thotë të vërtetën tjetrit, sepse jemi gjymtyrë të njëri-tjetrit.
26. Zemërohuni por mos mëkatoni. Perëndimi i diellit të mos ju gjejë të zemëruar.