1. ‘Inā fa‘alogo mai ia i le mea o lo‘o fetalai mai ai le ALI‘I:Tū ia i luga, ‘inā finau atu ia i luma o mauga, ‘ia fa‘alogo fo‘i mauga iti i lou leo.
2. ‘Outou mauga e, fa‘alogo mai ia i le finauga a le ALI‘I, ‘outou fa‘avae tumau fo‘i o le lalolagi; auā ‘ua i le ALI‘I le finauga ma lona nu‘u e fefinaua‘i o ia ma Isaraelu.
3. “A Lo‘u nu‘u e, se a ‘ea sau mea ‘ua ‘ou faia ‘iā te oe ‘ua ‘ou fa‘atigā ‘iā te oe i ni a? ‘inā momoli ia o a‘u.
4. Auā na ‘ou fa‘aa‘e mai ‘iā te oe a‘i le nu‘u o Aikupito ma ‘ou fa‘aola ‘iā te oe a‘i le mea sa nofo pologa ai, na ‘ou ‘a‘auina fo‘i i ou luma o Mose ma Arona ma Miriama.
5. Lo‘u nu‘u e, ‘inā e manatua ia le mea sa filifilia e Palako le tupu o Moapi ma le mea sa tali atu ai ‘iā te ia e Palaamo le atali‘i o Peoro, ‘ia e manatua i mea na faia e āfua i Setima e o‘o i Kilikala; ‘ina ‘ia e iloa le agalelei o le ALI‘I.”
6. “‘Ou te alu atu ma ni a i luma o le ALI‘I, ‘ou te ifo atu ma ni a i le Atua maualuga? ‘Ou te alu atu ‘ea i ona luma ma taulaga mū ma tama‘i povi e tasi lo latou tausaga?
7. E fiafia ‘ea le ALI‘I, i afe o mamoe po‘a ma manomānō alia o tafe suāu‘u. ‘Ou te tu‘uina atu ‘ea la‘u ulumatua e sui a‘i lo‘u solitulafono, o la‘u fānau totino e sui a‘i le agasala a lo‘u agaga.”
8. Sole, ‘ua fa‘aali atu e ia ‘iā te oe le mea lelei; se a fo‘i se mea e finagalo i ai le ALI‘I, ‘iā te oe pe a le o ia mea, ‘ia fai le amiotonu, ‘ia naunau i le alofa, ma ‘ia feoa‘i ma lou Atua ma le loto fa‘amaulalo?
9. O lo‘o ‘alaga le si‘ufofoga o le ALI‘I i le ‘a‘ai, (o le ‘ua poto e iloa e ia lou suafa;) ‘Ia ‘outou fa‘alogo i le sasa ma lē ‘ua pule mai ai.
10. O lo‘o i ai pea ‘ea i le fale o le tagata amio leaga o le fa‘aputuga ‘oloa e maua i le amio leaga ma le efa faimamago e ‘inosia?
11. ‘Ou te amio sa‘o ‘ea a o lo‘o i ai fua fa‘atautau fa‘alētatau ma le taga o lo‘o i ai ma‘a faimamago?
12. ‘Ua tūtūmu ona tagata mau‘oa i le fa‘asauā ‘ua tala pepelo fo‘i i latou o ē mau ai, o latou laulaufaiva fo‘i i o latou gutu ‘ua fa‘a‘ole‘ole ia.
13. O lenei fo‘i, ‘ou te ta ‘iā te oe i e tupu ai lou ma‘i, ‘ou te fa‘atafunaina oe ‘ona o au agasala.
14. ‘E te ‘ai, ‘ae lē mā‘ona ai, o lou fia ‘ai e ‘iā te oe lea; ‘e te tua au mea, ‘ae lē fa‘asaoina ai; o mea fo‘i ‘ua e fa‘asaoina ‘ou te tu‘uina atu ai i le pelu.
15. ‘E te lūlū saito, a ‘e te lē seleseleina; ‘e te soli olive, a ‘e te lē u‘u oe i le suāu‘u; ‘atoa ma le suāvine, a ‘e te lē inu i le uaina.
16. Auā ‘ua tausiusi sauniga a Omeri ma mea uma ‘ua faia e le ‘āiga o Aapo, ‘ua ‘outou sāvavali fo‘i ‘iā latou pule, ‘ina ‘ia ‘ou fa‘atafunaina ai oe, ‘ina ‘ia fai ma mea e uisa ai o ē mau ai; tou te tau‘ave fo‘i le luma o lo‘u nu‘u.#